“Muhtasham yuz yil” seriali turk kino olamida haqiqiy burilish yasagan loyiha bo‘ldi. Undagi tarixiy voqealar, saroydagi ichki kurashlar va mahoratli aktyorlar ijrosi tomoshabinlarni yillar davomida o‘ziga rom etdi. Biroq serialda hammaga birday yoqadigan obrazlar bo‘lmadi. Ayrim qahramonlarning har paydo bo‘lishi tomoshabinlarda salbiy kayfiyat uyg‘otdi.
Rustam posho
Rustam posho serialda yovuz, hiylakor, ikkiyuzlamachi, biroq zukko va maqsadga intiluvchan shaxs sifatida tilga olinadi. U o‘zining aql-zakovati va Xurram sultonga bo‘lgan sadoqati bilan saroyda yuqori martabalarga erishadi va hatto Mehrimoh sultonning turmush o‘rtog‘iga aylandi. Ammo Rustam faqat o‘z manfaatini ko‘zlab yashagan inson edi. Dushmanlari uning hokimiyatdagi obro‘sidan emas, o‘zgaruvchan xarakteridan qo‘rqar edi, chunki undan nimani kutishni hech kim bilmas edi.
Gulshoh
Serial boshidanoq Mohidavron sultonning sadoqatli xizmatchisi sifatida tanishtirilgan Gulshoh dastlab namunali ayoldek tuyuladi, chunki u o‘z rahbariga doim sodiq va fidoyi bo‘ladi. Ammo uning haddan ortiq tashabbuskorligi, har ishga aralashaverishi va uzun tili pand beradi. U hech qachon halol yoki adolatli bo‘lmaydi, boshqa xizmatkorlarni esa doim qo‘rqitishga urinib keladi.
Ayniqsa, Gulshohning o‘ch olishga moyilligi ko‘pchilikda salbiy taassurot uyg‘otgan. Shuning uchun ham serialdagi ayanchli taqdirini tomoshabinlar tabiiy qabul qilgan.
Fotima xonim
Fotima xonim saroyga Xorvatiyadan kelib qoladi va tez orada Topkapi saroyidagi shafqatsiz qoidalarini anglab yetadi. U Mohidavron sultonning yaqin odamiga aylanishi bilan boshqa kanizaklar orasida alohida obro‘ga ega bo‘ladi. Aynan Fotima Gulshohni siqib chiqarib, uning o‘rnini egallaydi.
Mohidavron uni sodiq xizmatkor deb o‘ylasa-da, Fotimaning o‘z rejalari bor edi: u valiahd shahzoda bilan munosabat qurib, undan farzand ko‘rish orqali saroydagi mavqeini mustahkamlashni istardi. Oxir-oqibat u maqsadiga erishib, Mustafodan homilador bo‘ladi. Lekin shunda ham fitna-fasod ishlar qilishni to‘xtatmaydi. Shahzoda Fotimadan yuz o‘girganida, u butkul o‘z yo‘lidan adashadi. O‘g‘lining o‘limidan so‘ng esa u o‘z joniga qasd qiladi va bu fojiaga Xurramni aybdor deb biladi.
Oysha xonim
Shahzoda Mustafoning yana bir xotinlaridan biri Oysha xonim bo‘lib, shahzodadan qiz farzand ko‘radi, ammo saroy fitnalariga aralashmaydi va qizini tarbiyalash bilan band bo‘ladi. Shahzoda Mustafo boshqa ayollarga qarasa ham, Oysha bunga e’tibor bermaydi. Ayrim hollarda rashk bilan mayda janjallar chiqaradi, ammo bu boshqa cho‘rilar qilgan ishlar bilan solishtirganda arzimas ko‘rinadi.
Tomoshabinlarga Oyshaning aynan mana shu befarqligi va passivligi yoqmagan. Serial muxlislari fitnalar va kurashlarga o‘rganib qolgan edi, Oyshaning qoida asosida yashashi esa zerikarli tuyulgan. Serialning to‘rtinchi mavsumida uning shunchaki g‘oyib bo‘lishi ham e’tirozlarga sabab bo‘lgan.
Matrakchi
Zukko, bilimli va dono Matrakchi Nasuh efendi serial davomida ko‘plab tarixiy voqealarning guvohi bo‘lgan, saroydagi muhim shaxslarga yaqin turgan obraz edi. Biroq tomoshabinlarning unga nisbatan munosabati ziddiyatli bo‘ldi. Aksariyat muxlislar Matrakchini yuksak aql egasi deb bilgan bo‘lsalar-da, uning ba’zi qarorlari va harakatlari jiddiy tanqidlarga sabab bo‘ldi.
Eng katta norozilik Ibrohim poshoga nisbatan haddan tashqari sadoqati bilan bog‘liq. U Ibrohimning Nigor bilan bo‘lgan yashirin munosabatini bilib turib, barchasini sir saqlaydi. Bu esa ko‘pchilik tomoshabinlar tomonidan “o‘zini hurmat qilmaslik”, “zaif xarakter” deb baholandi.
Shahzoda Salim
Shahzoda Salim — sulton Sulaymonning o‘g‘li va keyinchalik Usmoniylar taxtini egallagan hukmdor. Biroq u serial davomida tomoshabinlarning eng ko‘p tanqid ostiga olingan qahramonlaridan biri bo‘ldi. Unga nisbatan norozilik faqat syujet voqealari bilan emas, balki xarakterining zaifligi, qarorlarining shafqatsizligi va shaxs sifatida ishonch uyg‘otmasligi bilan bog‘liq edi.
Serialda Salim ko‘pincha qo‘rqoqligi, haddan tashqari ichkilikka berilishi va har doim o‘zini oqlashga urinishi bilan tomoshabinlarda salbiy taassurot uyg‘otadi. U atrofidagilarning, ayniqsa onasi Xurram va rafiqasi Nurbonu sultonning yordami bilan siyosiy maydonda omon qoladi. Tomoshabinlar uni “o‘z kuchi bilan emas, boshqalarning yordami bilan yashovchi voris” deb qabul qilishgan.
Biroq eng katta tanqid — Salimning o‘z ukasi Boyazid va uning o‘g‘illarini qatl etish qarori bilan bog‘liq. Bu voqea serial muxlislari orasida g‘azab va nafrat uyg‘otgan eng ayanchli sahnalardan biri bo‘lgan.
Xadicha sulton
Sulton Sulaymonning singlisi Xadicha sulton dastlab serial tomoshabinlarining ko‘nglini zabt etgan obrazlardan biri edi. U sokin, muloyim, oqila ayol sifatida ko‘rinadi — mehribon opa, sodiq rafiqa va sadoqatli do‘st. Biroq vaqt o‘tishi bilan u haqidagi tasavvurlar keskin o‘zgardi.
Ibrohim bilan boshlagan munosabatlardagi muammolar tufayli Xadicha doimiy yig‘i, janjallar, ayblovlar, atrofdagilar bilan ziddiyatlarga uchradi. Bularning bari tomoshabinlarni charchatdi.
Izoh (0)