“Shirin ukam” qo‘shig‘i bilan sanʼat olamiga kirib kelgan qizaloq Shirin Zoitova bugun salkam 20 yillik ijodiy faoliyatga ega xonanda bo‘ldi. Shaxsiy hayotida ko‘plab sinov va mish-mishlarga uchragan xonanda 27-fevral kuni 34 yoshni qarshiladi va uning havas qilgudek oilasi bor.
“Bir yoshimda ota-onam ajrashib ketishgan”
Shirin Zoitova ota-onasi haqida gapirishni, ortda qolgan yoqimsiz yillarni eslashni istamaydi. U kamdan kam intervyularida bolaligi va qiyinchilik kunlarini yodga oladi.
— Ota-onam bolaligimda ajrashib ketishgan. O‘sha vaqtda men bor-yo‘g‘i bir yoshda bo‘lgan ekanman. Aslida ota-onam bir-birlarini sevib oila qurishgan. Nima uchun ajrashishgani esa menga qorong‘i.
Meni ko‘pchilik buxorolik deb o‘ylaydi, aslida, Samarqandda tug‘ilganman. Ota-onam ham Samarqanddan, ammo ular Toshkentga o‘qishga kelishganida tanishishgan ekan.
Bolaligimning ko‘p qismi qishloqda, bobom va buvimning hovlisida o‘tgan. Bir muddat Toshkentda va Buxoroda ham yashaganman, deydi xonanda.
“Buvim va bobomning tarbiyasini olganman”
Xonanda bolalik yillarini va bobo, buvisi bilan bog‘liq xotiralarni quyidagicha eslaydi.
— Onam ish bilan band bo‘lardi, tabiiyki, men buvim va bobom bilan qolardim. Ularning nabirasi ko‘p edi, ammo ichida hech kimga ishonmaydigan, eng erkasi o‘zim bo‘lganman. To‘y-hashamlar tugul, hatto maʼrakalarga ham o‘zlari bilan olib ketishardi.
Bolaligim nihoyatda go‘zal o‘tgan, mehrni his qilganman. Ammo baribir hech biri o‘z ota-onangizning mehriga teng kelmas ekan.
Onamning ishi sabab ko‘p marta maktabimni ko‘chirishimizga to‘g‘ri kelgan. Menimcha, kamida 4-5 ta maktabda o‘qiganman. Shu bois sinfdoshlar bilan bog‘liq xotiralarim juda kam. Ammo hamisha maktabdagi eng faol o‘quvchi bo‘lganimni eslayman. Raqs tushishni va qo‘shiq aytishni yaxshi ko‘rardim, deydi xonanda.
“Butun oilam bo‘lishini orzu qilganman”
Shirin Zoitova ota mehrini qo‘msagani va bolalikdan farzandlarining mehrli otasi bo‘lishini orzu qilgani haqida gapirdi.
— Otamni ko‘p qo‘msardim. “Ey Allohim, menga shunday turmush o‘rtoq berginki, menga va farzandlarimga mehribon bo‘lsin”, deb niyat qilardim. Oila qurgach, turmush o‘rtog‘imga siz mening nafaqat yorim, balki otam va akamdek suyanchig‘im hamsiz, deganman. Bolaligimdan ololmagan mehrni sizdan olishim kerak, deb kulaman.
Inson ulg‘aygan sari butun oilasi bo‘lishini orzu qilarkan. Menga ham bunday orzular o‘tgan. Chunki qiz bola uchun ota mehri qanchalik kerak bo‘lishini bilardim, deydi xonanda.
Farhod va Shirin duetining tashkil topishi
Farhod va Shirin dueti 2011-yilning 11-noyabr sanasida tashkil topgan. O‘sha paytda ijodkorlarning ikkisi ham O‘zbekiston davlat konservatoriyasi talabalari edi.
2012-yil ijodkorlar uchun omadli keldi. Qisqa vaqt mobaynida samarali ijod qilib, 2015-yili yakkaxon konsert dasturlarini taqdim etishdi. Farhod va Shirin faoliyatida shoir Bobur Bobomurodning katta hissasi bor. U nafaqat xonandalarni yaxshi sheʼr bilan taʼminlagan, balki tashkiliy ishlarida ham ko‘maklashgan.
“Turmush o‘rtog‘im bilan kollejda tanishganmiz”
Xonanda turmush o‘rtog‘i bilan kollejda tanishgani va u kutilmaganda oila qurishni taklif qilgani haqida gapirdi.
— Qiz bolaning har qanday niyati amalga oshadi, shu bois unga jiddiy eʼtibor berish kerak. Bo‘yim past bo‘lgani uchun har doim turmush o‘rtog‘imning bo‘ylari baland, aqlli, chiroyli va oilaparvar inson bo‘lishini orzu qilganman. U inson orzumdagi inson edi, ammo bu sevgimi yoki shunchaki o‘tkinchi tuyg‘umi, bilolmasdim. Farhod bilan ijod qilib yurgan vaqtimizda Nodir aka bilan yana gaplashib qoldik. Aloqalar tinglandi va raqamlarni almashdik. Bir kuni mendan “Farhod siz uchun kim?” deb so‘radilar. O‘ylab o‘tirmasdan do‘stim ekanligini aytdim. Shundan keyin “Menga turmushga chiqasizmi?” degan xabar keldi. Nima deyishimni bilmay, kulgan smayl jo‘natdim. Hazillashmayapman, niyatim jiddiy deganlaridan keyin o‘ylanib qoldim. Ikki kundan keyin esa tort va gul olib onamning roziliklarini olgani keldi.
Turmush o‘rtog‘im ham hayotda yetarlicha qiynalgan, 19 yoshida onasidan ayrilgan. Shu boisdan ham yaqinlarning qadriga yetadi, oilani ardoqlaydi, deydi xonanda.
“11 yillik deutdoshdan ayrilish…”
2022-yili Farhod va Shirin dueti va prodyuseri o‘rtasida nizo yuzaga keldi va shoir sheʼrlari asosida yaratilgan qo‘shiqlarini kuylashni taqiqladi. Prodyuser bilan hamkorlik uzilgach, oradan hech qancha vaqt o‘tmay Shirin Zoitova Farhod bilan ortiq hamkorlik qilmasligini maʼlum qildi.
-Vn90mLVt.webp)
— Farhod anchadan buyon yakkaxon xonanda sifatida ijod qilishni xohlardi. Ikki oy oldin administratorimiz, men va Farhod o‘tirib, guruhning kelajagi haqida gaplashdik. Shundan keyin u Farhod va Shirin dueti uchun ijod qilmasligini, o‘zi alohida xonanda sifatida kuylashini maʼlum qildi. Biz taklifni qabul qildik, chunki bu uning xohishi. Hech qachon hech kimni hech narsaga majburlab bo‘lmaydi.
Shu bilan ijodni to‘xtatdik. Bir yildan buyon yaxshi ijod qilmayotgan edik. Men juda yaxshi narsalarni qilishni, ko‘p narsalar qilishni xohladim, lekin harakatlarim uncha o‘xshamagandan keyin foydasi yo‘qligini tushundim va o‘zimni o‘zim tayyorlashga harakat qildim. Osonmas, 11 yillik duet, Farhod egizagimdek bo‘lib qolgandi. Qachondir baribir shu narsa bo‘lardi, deydi Shirin Zoitova.
“Duetning bo‘linishi turmush o‘rtog‘imga ham boshqacha taʼsir qildi”
— Turmush o‘rtog‘im har qanday vaziyatda meni qo‘llab-quvvatlaydi. Duetning bo‘linishi turmush o‘rtog‘imga ham boshqacha taʼsir qildi, chunki ular ham sanʼatkor. Bizni nafaqat O‘zbekistonda, balki qo‘shni davlatlarda ham yaxshi ko‘rishadi. O‘n bir yil davomida juda ko‘p yutuqlarga erishganmiz. Farhod bilan 20 yoshimizda ijodni boshlagan bo‘lsak, shu yoshdan juda ko‘p narsalarga erishganmiz. Ko‘pchilik sizlar erishgan yutuqqa 50 ga kirgan sanʼatkor ham erisha olmasligi mumkin, deb aytishadi. Turmush o‘rtog‘im ham buni eshitib achindi.
“Ko‘nglimga og‘ir botadi”
Shirin Zoitova mish-mishlar qalbiga og‘ir botgani va turmush o‘rtog‘ining qo‘llab-quvvatlashi unga ijobiy taʼsir etgani haqida gapirdi.
— Qiz va ayol sanʼatkorlar haqida turli mish-mishlar tarqaladi. Albatta, har xil gap-so‘zlar ko‘ngilga og‘ir botadi. Turmush o‘rtog‘im to‘ydan avval “Sening qandayligingni men bilsam bo‘ldi”, degan. Oila qurdik, ammo shu kungacha falonchi sen haqingda bunday dedi, rostmi-yolg‘onmi, deb ham so‘ramadi. Shu jihatlarini hurmat qilaman, mulohazali va o‘z fikriga ega inson, deydi Shirin Zoitova.
Nodir va Shirin Zoitovalar mashhur, ammo ijtimoiy tarmoqlarda ularning jajji qizaloqlari bu borada ulardan ham o‘zib ketgan. Uni millionlab insonlar kuzatishadi. Reklama narxi ham osmon, mish-mishlarda qaraganda, Yasmina Zoitovaning bitta posti 3 ming AQSH dollari ekan.
Izoh (0)