Jizzax viloyatidagi maktabda 1,1 mlrd so‘mga qurilgan sun’iy qoplamali stadion tom qismi qulab tushdi. Holat yuzasidan viloyat hokimligi “Yagona buyurtmachi xizmati” ma’lumot berdi.
Unda keltirilishicha, mazkur obyekt Jizzax viloyati hokimligi “Yagona buyurtmachi xizmati” DUK buyurtmachiligida hamda “Suvinshoot qurilish loyiha” MCHJ pudratchiligida qurilgan bo‘lib, loyiha shartnoma qiymati 1 milliard 190 million so‘mni tashkil etadi.
Dastlabki o‘rganish natijalariga ko‘ra, stadion tom qismining qulab tushishiga kuchli tabiiy ofat — shamol va qalin qor yog‘ishi sabab bo‘lgani aniqlangan. Buning natijasida sport maydonchasining tom qismi zarar ko‘rgan. Hodisa oqibatida tan jarohati olgan shaxslar aniqlanmagan.
Holat yuzasidan buyurtmachi va pudratchi tashkilotlar tomonidan o‘rganish ishlari olib borilmoqda. Pudrat tashkiloti tomonidan loyihaga muvofiq tiklash ishlari amalga oshiriladi va stadion tez kunlarda qayta tiklanib, foydalanishga topshiriladi.
Bundan avval Toshkentda 26-fevralga o‘tar kechasi qor yog‘ganidan so‘ng poytaxtning qator hududlarida daraxtlar qulagani haqida xabar berilgandi. Oqibatda avtomobil va simyog‘ochlarga zarar yetgan. Ijtimoiy tarmoqlarda qor og‘irligidan daraxtlar qulashiga ularning noto‘g‘ri, “palma” qilib kesilgani sabab qilib ko‘rsatildi. Shahardagi barcha daraxtlar Ekologiya vazirligi reyestrida hisobga olingan va shahar ekologiya boshqarmasi nazorati ostida.
Daraxtlarga nisbatan “palma” atamasi qo‘llanishi noto‘g‘ri, chunki shahardagi qulab tushgan daraxtlarning birortasi ham bu tushunchaga mos kelmaydi. Shox-shabbalarni kesish qat’iy tasdiqlangan qoidalarga muvofiq amalga oshiriladi va daraxtlarning umrini uzaytiradi, deyiladi munosabatda.
Poytaxt hokimligi kommunal xizmatlar oqibatlarini tezkor bartaraf etayotganini bildirib, piyodalar va haydovchilarni ehtiyotkor bo‘lishga chaqirdi.
Izoh (0)