7-aprel kuni gonkonglik aktyor, rejissyor, operator, musiqachi, kaskadyor, jang san’ati ustasi Jeki Chan 70 yoshga to‘ldi. Jahon kinosining tirik afsonasi filmdagi ajoyib rollaridan tashqari xayriya ishlariga ham katta mablag‘ sarflashi bilan tomoshabinlar hurmatini qozongan. Quyida aktyor haqida eng qiziqarli fakt va yanglish fikrlarni to‘pladik.
- Jeki Channing ota-onasi shunchalik kambag‘al ediki, ular hatto o‘g‘lini sotib yubormoqchi bo‘lgan
Aktyor haqida tarqalgan bu voqea haqiqatdan yiroq. Jeki tug‘ilgan oila chindan ham kam ta’minlangan edi va ular urush tufayli Xitoydan Gonkongga qochishga majbur bo‘ldi. Aktyorning otasi Xitoy hukumatiga qarshi bo‘lgan Konservativ partiyaning maxfiy agenti sifatda ishlagan va unga xalq dushmani ayblovi qo‘yilgan. Qamoq jazosidan qutulish uchun Jekining oilasi qochishga qaror qiladi. Ularning ijarada yashash va farzandining tug‘ilishi uchun mablag‘i bo‘lmagach, atrofdagilardan yordam so‘rashgan. Shu tariqa Jeki Channi chaqaloqligida sotib yuborish haqidagi mif paydo bo‘lgan.
- Jeki Chan bilan hech qaysi sug‘urta kompaniyasi shartnoma tuzishni istamaydi
Sug‘urta kompaniyalari aktyor bilan shartnoma tuzishdan qochadi yoki doim ishni ortga surib yuradi. Ba’zilar Jeki Channi tuzatib bo‘lmas mazoxist deb ham ataydi, chunki aktyor filmdagi barcha murakkab kaskadyorlik ishlarini mustaqil bajargan va turli jarohatlar olishdan hech qachon qo‘rqmagan. O‘zining “Hech qachon ulg‘aymang” kitobida Chan buni tan oladi:
Masalan Bryus Lini olaylik. U jarohat tufayli vafot etdi va butun umrga afsona bo‘lib qoldi. Men “Mo‘jizaviy aslahalar” filmida vulqon ichiga tushib ketib halok bo‘lganimda ham afsonaviy aktyor sifatida barchaning yodida qolgan va hayotimga chiroyli yakun yasagan bo‘lar edim. Insonlar Jeki Chan sevgan ishi bilan shug‘ullanayotganda vafot etgani haqida gapirardi. Lekin rostini aytsam, men o‘lishni, hatto nafaqaga chiqishni ham istamayman.
- Jeki Channing sinmagan suyaklari qolmagan
Foto: Kinorium
Olgan jarohatlarimning sanog‘i yo‘q: men jag‘imni uch marta sindirdim, burnim, barcha barmoqlarim, tizzam, son suyagi va qovurg‘amni ham sindirdim, bosh suyagimni operatsiya qildirdim, — deydi aktyor.
Ammo bir jarohat uning umriga zomin bo‘lishi mumkin edi. 1991-yilda Yugoslaviyada suratga olingan “Mo‘jizaviy aslahalar” filmida aktyor 12 metrli devordan daraxt shoxiga sakrashi lozim edi. Birinchi dublda Jeki buni uddaladi, ammo ikkinchi dublda u boshi bilan toshga yiqildi va zudlik bilan kasalxonaga olib borildi. Muvaffaqiyatli kechgan operatsiyadan so‘ng Jeki Chan yana suratga olish ishlariga sho‘ng‘ib ketdi. Biroq singan burun, tishlar, eshitmay qolgan bir quloq bilan aktyor yana ishga qaytishiga hech kim ishonmagan edi.
- Jeki Chan ukoldan qo‘rqadi
Oq xalatli insonlardan qo‘rqishi haqida aktyorning o‘zi tan olgan:
Hammasidan ko‘ra inyeksiya yuborishlaridan qo‘rqaman. Balandlik, sichqonlar, ilonlar menda qo‘rquv uyg‘otmaydi, ammo shpritsni ko‘rishim bilan oyoqlarim qaltiray boshlaydi, — deydi aktyor avtobiografiyasida.
- Aktyor Gollivudni yoqtirmaydi
Foto: Dzen
Aktyorning tanilishiga Gollivudning hissasi katta bo‘lsa-da, Chan Amerika filmlarini yoqtirmasligini ochiq aytadi. 2016-yilda kino sanoatiga qo‘shgan hissasi uchun “Oskar” mukofotini olgan bo‘lsa-da, aktyorning bunday fikr bildirishi insonlarni hayratga soladi:
Men Jorj Lukas yoki Stiven Spilberg kabi daholar bilan ishlasam ham, Gollivudda mashhurlikka erishmagan bo‘lardim. “Yura davri parki” filmini eslab ko‘ring. Endi u yerda rol o‘ynagan aktyorlarning ismlarini yodga olishga harakat qiling. Tomoshabin faqat dinozavrlarni va rejissyorning ismini eslaydi. Ammo Osiyoda hamma Jeki Chan filmida Jeki Channi ko‘rish uchun keladi. Film syujeti yoki sarlavhasi qanday bo‘lishi muhim emas. Buni faqat Jeki Chan qila oladi!
- Jeki Chan juda saxiy va mehribon inson
Yulduz o‘zini Xitoyning haqiqiy vatanparvari deb biladi. 1988-yilda u xayriya jamg‘armasi tashkil qilgan va hozirgacha mamlakatning muhtoj aholisiga yordam berdi, talabalarga stipendiya to‘lashda ko‘maklashadi.
Jeki 50 nafar bolani o‘z qaramog‘iga olgan va 10 ta yetimni rasman asrab olgan. Xitoyda aktyorning Chan kasalxonasi ishlaydi. Mamlakat rasmiylari unga juda yaxshi munosabatda bo‘lib, aktyorga xalq qahramoni unvoni berilgan.
- Jeki Chan to‘g‘ri yoza olmaydi va yaxshi o‘qimaydi
Jeki Chan haqiqatan ham deyarli savodsiz va matnlarni o‘qishda ona tilida ham, ingliz tilida ham qiynaladi. Maktabda yosh Jeki darslarni ko‘p qoldirar va yaxshi bahoga o‘qimasdi.
Shu sababli, uzoq kutilgan “Hech qachon ulg‘aymang” kitobi ham uning do‘sti Ju Mo tomonidan uch yil davomida yozilgan.
- Jeki Chan doimo sog‘lom turmush tarziga amal qilgan
Afsuski, bu haqiqat emas. Katta shuhratga erishgan Jeki Chan yulduzlik kasalligiga chalindi va spirtli ichimliklarga ruju qo‘yib, katta miqdorda pul sarflay boshladi. Aktyor bu xatti-harakatini kambag‘allikda o‘tgan bolaligi sabab deb izohlaydi:
Qashshoqlikda yashaganingizdan so‘ng, katta pul sizga xavfsizlik hissi beradi, — deydi aktyor.
- Jeki Chan — yomon ota
Aktyor rafiqasi bilan oilaviy janjal qilayotgan paytda ikki yoshli o‘g‘li Jeysini chetga uloqtirib yuborgan. Yaxshiyamki, bola yerga emas, divanga tushgan. Bu voqeadan hali ham aktyorning vijdoni qiynaladi. Keyinchalik u o‘g‘liga kino sanoatiga kirishiga yordam berishga harakat qildi. Jeysi yulduz otasining izidan borgandek bo‘ldi va hatto filmlarda bir nechta rollarni oldi. Ammo Jeysi yomon insonlar to‘dasiga aralashib qoldi va narkotik savdosi tufayli qamoqqa tushdi. Bu voqea Jeki Channing obro‘siga jiddiy zarba berdi va aktyor og‘ir damlarda o‘g‘lini qo‘llab-quvvatlamadi.
Agar uning aqli bo‘lsa, o‘zi mustaqil pul topishi mumkin. Aqli bo‘lmasa, u shunchaki menikini sarflab yuraveradi, — dedi Jeki.
Shunday qilib, Jeki Chan oilasida hech kim uning merosiga da’vogarlik qila olmasligini ochiqladi. Uning mablag‘i asosan xayriyaga sarflanadi.
Izoh (0)