Farg‘ona viloyatining Toshloq tumanidagi maktabda o‘qituvchi o‘quvchining qarindoshlari tomonidan kaltaklangani haqida xabar berilgandi. Bosh prokuratura axborot xizmati rahbari Hayot Shamsutdinov holat yuzasidan jinoyat ishi qo‘zg‘atilganini “Daryo”ga ma’lum qildi.
“Daryo” manbasiga ko‘ra, o‘qituvchi maktabning 9-sinf o‘quvchisi bilan qarama-qarshilikka borgan. Shundan so‘ng o‘quvchining qarindoshlari maktabga kelib, o‘qituvchini kaltaklagan.
Prokuratura bergan ma’lumotga ko‘ra, 1-aprel kuni Toshloq tumanidagi 25-sonli maktabning tarix fani o‘qituvchisi M.O.ni maktab direktori xonasida 9-sinf o‘quvchisi S.X.ning 20 va 24 yoshli ikki qarindoshi “nima uchun jiyanimizni urdingiz”, deb o‘zaro janjallashib ketgan va yuzi va tanasining boshqa joylariga urib, tan jarohati yetkazgan.
O‘qituvchi tuman markaziy shifoxonasiga murojaat qilgan va unga birinchi yordam ko‘rsatilib, davolanish uchun yotqizilgan.
Sud tibbiy eskpertizaning 2-apreldagi xulosasida o‘qituvchi M.O.da yopiq bosh miya shikasti, bosh miya chayqalishi, chap qosh tashqi burchak sohasi yirtilgan yarasi, bel, chap yelka va tirsak sohalari yumshoq to‘qimalari lat yeyishi aniqlangan. Bu tan jarohatlari sog‘liqning qisqa vaqt — 6 kundan ortiq, ammo 21 kundan ko‘p bo‘lmagan muddatga yomonlashuviga sababchi bo‘lgan shikastlar toifasiga kirishi tasdiqlangan.
O‘quvchi S.X.ning bo‘yin sohasida esa tirnalmalar aniqlangan. Bu tan jarohati 6 kundan ko‘p davom etmaydigan, tez o‘tib ketuvchi yengil shikastlar toifasufa kirishi tasdiqlangan.
Holat yuzasidan Jinoyat kodeksining 109-moddasi (qasddan badanga shikast yetkazish) 2-qismi bilan jinoyat ishi qo‘zg‘atilgan.
Izoh (0)