“Super kelinchak” filmidagi uddaburon kelin obrazi bilan nafaqat O‘zbekiston, balki Rossiya hamda MDH mamlakatlariga tanilgan aktrisa Diana Yagofarova 27-fevral sanasida 36 yoshni qarshiladi. Diananing shu kungacha bor-yo‘g‘i 4-5 ta filmda suratga tushganiga ishonish qiyin. 15 yil davomida ekranlarda ko‘rinmay qolgan aktrisa bugun uch farzandning onasi, uy bekasi, shu bilan birga yana faol ijodga qaytdi.
Bolalik
Diana Yagofarova 1989-yilning 27-fevralida Toshkent shahrida tug‘ilgan. Diananing otasi aviatsiya zavodida ishlagan, onasi esa uy bekasi bo‘lgan. U bolaligidan kino sohasiga qiziqqan hamda aktyorlik mahorati to‘garagiga qatnay boshlagan. Bo‘lajak aktrisa maktabda a’lo baholarga o‘qigan.
Ijodning boshlanishi
Teatr to‘garagiga qatnashda davom etgan 18 yoshli Diana kunlarning birida taniqli o‘zbek kinorejissyori Bahrom Yoqubovning e’tiboriga tushadi. Aynan Bahrom Yoqubov Dianaga o‘zini kinoda sinab ko‘rishni taklif qiladi. Shu tarzda Diana ijodga kirib keladi hamda 2008-yilda Bahrom Yoqubovning “Tashlandiq” deb nomlangan filmida epizod rolni ijro etadi.
Yulduzli onlar
2008-yilda Diana bosh rolni ijro etgan “Super kelinchak” filmi katta ekranlarda namoyish etildi. Film taqdimotidan so‘ng Diana haqiqiy ma’nodagi kino yulduzga aylandi. “Super kelinchak” filmi rus millatiga mansub qizni sevib qolgan o‘zbek yigitining sevgilisiga erishish yo‘lidagi qiyinchiliklari haqida hikoya qiladi. O‘z navbatida Diananing qahramoni ham qattiqqo‘l qaynonaning ko‘ngliga yo‘l topish uchun barcha imkoniyatlarini ishga soladi.
2009-yilda Diana “Ichkuyov” deb nomlangan romantik filmda suratga tushgan. Shu yilning o‘zida aktrisa ishtirokidagi yana bir film — “Zirapcha” tomoshabinlar e’tiboriga havola etildi. Shundan so‘ng Diananing ijodida ma’lum muddat tanaffus kuzatildi.
Behayo video bilan bog‘liq mojaro
Diana Yagofarova o‘zbek kinosidagi eng muvaffaqiyatli debyutant sifatida tanilib borayotgan, tomoshabinlar uning ishtirokidagi yangi loyihalarni intizorlik bilan kutayotgan bir paytda aktrisa ekranlarda umuman ko‘rinmay qoldi. Bunga esa rejissyor Bahrom Yoqubov va Dianaga juda o‘xshaydigan qiz ishtirokidagi behayo videoning tarqalishi sabab bo‘ldi. Aktrisa oradan bir necha yil o‘tganidan keyin bergan intervyusida o‘sha voqea tufayli hatto o‘z joniga qasd qilishga uringani haqida aytadi.
— Bu mavzuni uzil-kesil yopish uchun aytaman: bu video qayerdan tarqab ketganini bilmayman. Men 15 yil bu savolga javob bermadim. Chunki ushbu savolga o‘zimda ham javob yo‘q. Lekin odamlarning qasddan qanchalik jirkanch ishlarga borishini tushundim. Video juda katta ta’sir o‘tkazib, bir necha daqiqalar ichida butun hayotim barbod bo‘lgan. Men o‘shanda o‘z ishim, aktyorlik mahoratim va iste’dodim bilan butun mamlakatga mashhur edim. Ammo ana shu video tufayli hammasi bir zumda yo‘qqa chiqdi. Bu dahshatli tushga o‘xshardi. Qanchadir vaqt umuman ko‘chaga chiqmaganman.
Keyinchalik ma’lum muddat odamlar ‘Siz o‘sha Dianamisiz?’, desa, ‘Yo‘q, u emasman’, derdim. Hatto o‘z shaxsiyatimdan ham voz kechgan paytlarim bo‘lgan. Bu mening o‘sha paytdagi himoya reaksiyam edi. Men u paytda 18 yoshli qizcha edim. O‘shanda yonimda bunday vaziyatda qanday yo‘l tutishim kerakligini o‘rgatuvchi bironta suyangan tog‘im bo‘lmagan. Men hammadan ham ko‘ra buvim bu voqealarga qanday munosabat bildirishidan qo‘rqqanman. Lekin buvim ushbu qayg‘uli holatda boshini baland tutgan holda meni qo‘llab-quvvatlagan. Qanchadir muddatga mamlakatni tark etishga majbur bo‘ldim. O‘zbekistonda bir oy bo‘lmadim.
Buvim shunda bu menga qarshi katta provokatsiya ekanligini aytib, meni yupatgan. Ular butun hayotim davomida yaxshi-yomon kunimda menga doim dalda berib turgan. Bu videoni kim tarqatganini bilmayman. Ammo undagi odamlar bizga juda o‘xshaydi. Video yashin tezligida tarqalib, hamma uni ko‘rdi. Yana bir narsani ta’kidlamoqchiman: o‘shanda ayollar huquqlarini himoya qilish hozirgidek rivojlanmagandi. Bugungi kunda bu yo‘nalish yaxshi tomonga o‘zgardi. Yangi qonunlar qabul qilinmoqda. Ayollar huquqlari haqida ko‘p gapirilmoqda. Lekin afsuski, o‘sha paytda bu narsa yo‘q edi, deydi Diana.
Shaxsiy hayot
Diana Yagofarova 2009-yilda Murod Yunusxo‘jayev ismli yigit bilan oila quradi. Juftlik umumiy do‘stlari orqali, restoranda tanishgani aytiladi. Murod Dianani madaniy tadbirlardan birida ko‘rib qoladi va o‘shandayoq unga uylanish istagi paydo bo‘ladi.
“O‘shanda menda ikkita variant bor edi. Chet elga ketish va aktrisa sifatida rivojlanish yoki turmushga chiqib, o‘zimni oilaga baxshida qilish. Har bir ayol uchun oila muhim bo‘lganidek, men ham ikkinchi variantni tanlaganman”, degandi Diana intervyularidan birida.
Murod va Diana 14 yil birga yashashdi. Bu vaqt ichida ular uch o‘g‘ilning ota-onasi bo‘lishdi. Aktrisa 2024-yilda bergan intervyusida turmush o‘rtog‘i bilan ajrashgani haqida so‘zlab bergan edi.
— Nikohimiz yakunlanganiga bir yil bo‘ldi. Mana bir yildirki, men uydan ketishga qaror qildim. Biz hozirda ajrim jarayonidamiz. Sobiq turmush o‘rtog‘im bilan do‘stona munosabatlarimizni saqlab qolamiz. Shuni aytishim kerakki, u farzandlariga juda yaxshi ota. Hozirda uch o‘g‘lim bor. Har doim mehribonlik uyidan bir qizaloqni asrab olishni orzu qilganman, deydi aktrisa.
Kinoga qaytish
Diananing aytishicha, u o‘zini ko‘p sohalarda sinab ko‘rgan, biroq ularning hech biri kinochalik aktrisaga zavq bermagan.
— 15 yillik tanaffus paytida o‘zimni ko‘p sohalarda sinab ko‘rdim, lekin tushundimki, hech narsa menga kinodan oladigan zavqimni bermas ekan. Shuning uchun yana kinoga qaytishga qaror qildim. Ijodimga befarq bo‘lmagan insonlar uchun yangi seriallarda suratga tusha boshladim.
Diana Yagofarova 2024-yilda qozog‘istonlik kinoijodkorlarning “Ketdik, hammasini tashla” deb nomlangan komedik-kriminal janrdagi filmida suratga tushdi. Ushbu filmda o‘zlarini “Oskar”ga munosib aktyor hisoblaydigan, biroq real hayotda omadi yurishmagan ikki do‘st va ular tushib qolgan qiyin vaziyat haqida so‘z yuritiladi.
Izoh (0)