Ijtimoiy tarmoqlarda “Qoratosh” mahallasida joylashgan 324-maktab hududidagi futbol maydoni qulab tushgani haqida xabarlar tarqaldi. Holat yuzasidan Toshkent shahar hokimligi izoh berdi.
Maʼlum qilinishicha, dastlab, sport maydonchasi qulashining sababi 26—27-fevral kunlaridagi qor yog‘ishi deb hisoblangan edi.
Biroq dastlabki texnik tekshiruvlarda maʼlum bo‘lishicha, asosiy sabab — qurilish ishlarining sifatsiz bajarilgani va belgilangan talablarga javob bermaydigan materiallardan foydalanilgani bilan bog‘liq.
Hozirgi kunda loyiha me’yorlariga rioya etilishi batafsil tekshirilmoqda, shuningdek, pudratchi tashkilot bajargan ishlar chuqur tahlil qilinmoqda.
Tekshiruv yakuniga ko‘ra, masʼul shaxslarga nisbatan tegishli choralar ko‘riladi.
Avvalroq Jizzax viloyatidagi maktabda 1,1 mlrd so‘mga qurilgan sun’iy qoplamali stadion tom qismi qulab tushgani haqida xabar berilgandi.
Izoh (0)