Har bir qismi uchun 20 ming dollar: “Muhtasham yuz yil” serialidagi bosh qahramonlar qancha gonorar olgan?

Turk seriallari qamrovi va qiziqarli syujeti bilan tomoshabinlar qalbidan joy olganiga ancha bo‘ldi. Ammo “Muhtasham yuz yil” shu qadar mashhur bo‘ldiki, u turk kino sanoatining doimiy yulduziga aylandi. Usmonlilar imperiyasi tarixi, o‘sha davrdagi turli urushlar va saroy ichida bo‘lib o‘tgan mojarolar dizi tomoshabinlarini e’tiborsiz qoldirmadi.

Har bir muvaffaqiyatli loyiha ortida iste’dodli aktyorlarning mehnati yotadi. Bugun “Muhtasham yuz yil” seriali bosh qahramonlari uzoq muddat davom etgan ishi uchun qancha miqdorda gonorar olgani haqida ma’lumot beramiz.

Eng katta gonorar Halit Ergenchga tegishli edi

Sulton Sulaymon rolini ijro etgan aktyor — Halit Ergench har bir epizod uchun 20 ming dollar haq olgan, bu miqdor uni loyihadagi eng ko‘p maosh oluvchi aktyorga aylantirgan. “Muhtasham yuz yil” seriali jami 139 qismdan iborat bo‘lishini hisobga olsak, Ergench birgina loyihadan 2,7 million dollardan ko‘proq daromad olgani aniqlanadi.

Lekin bu hammasi emas. Halit Ergench serialni xorijga sotish huquqidan ma’lum foizda daromad olgan yagona aktyor edi. Shu sababli uning har bir qismdagi umumiy daromadi 40 ming dollargacha yetgan. “Bunday katta miqdordagi gonorar, albatta, boshqa hamkasblarda ham turli savollar va nizolar vujudga kelishiga sabab bo‘lgani shubhasiz”, deb yozadi “Komsomolskaya pravda” nashri.

Maryam Uzerli doim unga kam maoshi to‘langan deb hisoblagan

Sulton Sulaymonning asosiy kanizagi Xurram Sulton rolini o‘ynagan Maryam Uzerli har bir seriya uchun 17 ming dollar miqdorda gonorar olgan. Bu katta miqdor bo‘lishiga qaramay, Halit Ergenchnikidan kamroq. Bundan tashqari, aktrisa bosh rollardan birini ijro etgan bo‘lsa-da, unga xorijda efirga uzatilishdan olingan daromaddan hech qanday foiz to‘lanmagan, shu sababli aktrisa doim oladigan maoshidan norozi bo‘lgan.

Ibrohim posho rolini ijro etgan Okan Yalabik Maryam Uzerli bilan bir xil daromad olgan. Biroq u va boshqa asosiy aktyorlar rejissyorlarga bu haqda shikoyat qilmagan va bor e’tiborini ishga qaratgan.

Boshqa aktyor va aktrisalarning gonorari

Tarixiy serialda suratga tushgan boshqa mashhur turl aktyorlari ham loyihadan mo‘may daromad olgan, jumladan:

Burak O‘zchivit (Balibey) — serialning bir qismi uchun 17 ming dollar;

Nur Fettaho‘g‘lu (Mohidavron) va Mehmet Gunsur (shahzoda Mustafo) — har biri 14 ming dollardan;

Ozan Guven (Rustam posho) —14 ming dollar.