Turk seriallari yuzlab epizodlardan tashkil topgan faqatgina sevgi haqidagi hikoyalardan iborat emas. Turk kino sanoatida G‘arbning mashhur filmlarini o‘zgacha talqinda qayta suratga olish ham urf bo‘lgan. Ba’zan bunday remeyklar tomoshabinlar tomonidan yuqori baholangan asl filmdan ham muvaffaqiyatliroq chiqadi.
Quyida haqiqatan ham e’tiborga loyiq bo‘lgan xorijiy seriallarning turkiy remeyklarini ko‘rib chiqamiz.
“Behayolar”/ “Bizning hikoya” (“Bizim hikaye”)
“Behayolar” kabi g‘arbga xos syujet, albatta, turk madaniyati uchun to‘g‘ri kelmaydi, ammo mazkur filmning moslashtirilgan varianti Turkiyada, ham xorijda bir zumda muvaffaqiyat qozondi. Turkcha versiyada hikoyalar “qog‘ozga o‘ralgan” holda taqdim etilgan: serialda munozarali sahnalar yo‘q, ammo tomoshabinlarga yoqadigan hayotiy drama va yorqin voqealar rivoji serialni ko‘rishda davom etishga turtki beradi.
“G‘iybatchi qiz” / “Istanbulning kichik sirlari” (“Küçük Sirlar”)
Mazkur serialda Turkiyadagi eng nufuzli oilalardan bo‘lgan o‘smirlar haqida hikoya qilinadi. Ularning har birida o‘ziga xos kichik sirlari bor. Yigit-qizlarning bari qimmatbaho va hashamatli hayot kechirsa-da, xiyonat, yolg‘on, xavfli o‘yinlarni boshidan o‘tkazadi. Shuningdek, har qanday holatda hammadan o‘zib ketish, boyroq va mashhurroq bo‘lish uchun kurash ham olib boriladi. Muxlislar fikriga ko‘ra, serial ajoyib aktyorlik jamoasini o‘zida birlashtirgan. Ayniqsa Burak O‘zchivit va Kadir Dog‘ulu kabi aktyorlar serialdagi hikoyalar yorqinroq chiqishiga o‘z hissasini qo‘shgan.
“Sabrina kichik jodugar” / “Tajribasiz jodugar” (“Acemi Cadi”)
Remeyk syujeti va qahramonlarning barchasi deyarli asl filmdagidek ishlangan, faqatgina serialdagi ismlar o‘zgartirilgan. Sabrinaning o‘rniga Oyshagul, Hilda va Zelda xolalar o‘rniga Melda va Selda xola ismli qahramonlar ekranda gavdalanadi. Amerikacha versiyasidagi kabi, bosh qahramon — o‘smir qiz Oyshagul tasodifan o‘zining sehrli iqtidori haqida bilib qoladi va yangi qobiliyatlarni o‘rganish va rivojlantirishni boshlaydi.
“Umidsiz uy bekalari” / “Umidsiz uy bekalari” (“Umutsuz Ev Kadinlari”)
Mazkur remeyk original serialning syujetini to‘liq saqlab qolgan. Shahar chekkasida besh nafar uy bekasi istiqomat qiladi. Serialda o‘zini doim yosh boladek tutadigan, xayolparast Suzan, ideal rafiqa Berrin, o‘yin-kulgini sevuvchi va kelishgan erkaklarga doim e’tibor qarataveradigan go‘zal Yildiz, barchaga ibratli bo‘lgan ona Leyla, maftunkor va o‘ynoqi Emel kabilar hayoti haqida hikoya qilinadi. Ulardan biri o‘z joniga qasd qilishi barchani sarosimaga soladi va ularning bari bunday fojia qanday qilib sodir bo‘lganini aniqlashga harakat qiladi.
“Doktor Haus” / “Hekimo‘gli” (“Hekimoğlu”)
Atesh Hekimo‘g‘li — infeksiologiya va nevrologiya yo‘nalishlari bo‘yicha professional shifokor. U biroz qo‘pol xarakterli, ammo ajoyib instinkt va aql bovar qilmaydigan bilimga ega. Hekimo‘gli barcha insonlar yolg‘on gapiradi, deb hisoblaydi, shuning uchun har safar bemorlarga tashxis qo‘yish jarayoni haqiqiy tergovga aylanadi. Uning jamoasi Hekimog‘li bilan tez-tez bahslashadi, chunki shifokor barcha ishni o‘z bilganicha hal qiladi. Hamkasblarining noroziligi ham, tibbiy etika ham uni to‘xtata olmaydi. Yosh shifokorlar jamoasi bilan birgalikda u eng umidsiz ishlarni o‘z zimmasiga oladi va doimo kasallikka shifo topadi.
“Sehrlanganlar” / “Atiye”
Atiye ismli yosh rassom Istanbulda yashaydi. U o‘zini baxtli his qilishi uchun hamma narsaga: sevimli ish, ijodiy ilhom uchun shaharning go‘zal manzarasi, O‘zan bilan ishonchli ishqiy munosabatlarga ega bo‘ladi. Kunlarning birida u qadimgi Go‘bekli Tepe majmuasida bir arxeolog qahramon bilan bog‘liq sirli artefaktni topadi. So‘ng u o‘tmish va bugungi kun haqidagi savollarga javob topishning qiyin yo‘liga kirishga majbur bo‘ladi. Bu yo‘l uning atrofidagi hamma narsa haqidagi fikrlarini butunlay o‘zgartirib yuboradi. Atiye “Sehrlanganlar” serialidagi Fibi singari, u ham o‘z taqdirini o‘rganishga kirishadi va turk madaniyati hikoyaga sehrli joziba qo‘shadi.
“Yolg‘iz yuraklar” / “To‘lqin” (“Medcezir”)
Istanbulning xaroba mahallasidagi notinch oilada o‘sgan Yamanning bolaligi drama va sarguzashtlarga boy. Otasi oilani erta tark etadi, onasi boshqa erkakka turmushga chiqadi. Yaman uchun hurmatga sazovor yagona inson — uning akasi Kenan bo‘ladi. Kenan o‘zini butunlay boshqa shaxs sifatida ko‘rsatishga harakat qilsa-da, aslida u jinoyatchi. Bolaligidan ham ishlashni, ham o‘qishni baravar olib borishning uddasidan chiqqan Yaman kunlarning birida Kenanning aybi bilan qamoqqa tushish xavfiga duch keladi.
Izoh (0)