Turkiyalik mashhurlar o‘z urf-odatlarini hurmat qilsalar ham, to‘y kabi muhim tadbirlar uchun ko‘proq zamonaviy uslubdagi liboslarni tanlashadi. Hech kimga sir emaski, Sharq azaldan G‘arb mamlakatlaridan urf-odatlariga sodiqligi bilan ajralib turgan. Shu bois, turk to‘ylari haqida gap ketganda, qimmatbaho ipaklardan tikilgan liboslar, dabdabali marosimlar, ko‘p miqdordagi tillalar esga tushishi aniq. Quyida turkiyalik mashhurlar to‘ylarini qanday nishonlagani haqida so‘z yuritiladi.
Neslihan Atagul
“Sevgi iztirobi” seriali yulduzi Neslihan Atagul 2016-yilda aktyor Kadir Dog‘uluga turmushga chiqqan. Juftlik Bosforning Osiyo sohilidagi “Ajia” mehmonxonasida tantanali nikoh marosimini o‘tkazgan.
Aktrisa to‘y libosini dunyoning eng yaxshi dizaynerlari liboslari taqdim etiladigan Vakko Wedding’dan sotib oldi. Shuni ta’kidlash kerakki, bu obraz Neslihanning yanada jozibali ko‘rinishini ta’minlagan.
Aksariyat turkiyalik mashhurlar to‘yida “baliq” silueti shaklidagi liboslarni afzal ko‘rishadi.
Fahriye Evjen
Burak O‘zchivit va Fahriye Evjen — Turkiyaning eng mashhur juftliklaridan biri hisoblanadi. Ular “Choliqushi” teleserialining suratga olish jarayonlarida tanishgan va shundan keyin uchrasha boshlagan. Vaqt o‘tishi bilan juftlikning o‘rtasida munosabatlar mustahkamlanib bordi va ular oila qurishga qaror qildi.
Fahriye va Burak 2017-yilda Bosfor sohilidagi Sait Halim Pashining Istanbuldagi saroyida turmush qurgan. Aktrisa tanlagan ko‘ylak Neslihan Atagulning libosiga juda o‘xshaydi.
To‘g‘ri liboslarning bir-biridan farqli jihatlari bor. Masalan, Evjen kiygan libos ko‘p qatlamli va uning orqa qismi juda tor. Qizig‘i shundaki, ikkala kelin to‘y obrazlarining o‘xshashligi shov-shuvli muhokamalarga sabab bo‘ldi: aktrisa Neslihanning libosidan ataylab nusxa ko‘chirganlikda ayblandi. Liboslar chindan ham o‘xshash, ular dizayner Rashit Bag‘zibag‘li tomonidan yaratilgan. Dizayner uzoq vaqt davomida mojarolardan uzoqroq turishga harakat qildi, biroq oxirida u bu holatga o‘z munosabatini bildirdi:
“Fahriyexonim bilan ko‘plab variantlarni ko‘rib chiqdik, u kelinlik libosi qanday bo‘lishi haqida ko‘p bosh qotirdi. Aktrisaga libos juda yoqdi va aynan shunday to‘y libosini istaganini aytdi. Bu uning xohishi edi”, deydi liboslar dizayneri.
Demet O‘zdemir
“Erta uchgan qush” serialida bosh qahramon rolini ijro etgan Demet O‘zdemir 2022-yilning avgust oyida musiqachi O‘guzhan Kochga turmushga chiqdi. Ularning to‘yi noqulay ob-havo tufayli ortga surildi. Istanbulda kuchli yomg‘ir yog‘di, shuning uchun marosim o‘z vaqtidan bir necha kun keyinga qoldirildi.
Biroq Demet mehmonlarni bir vaqtning o‘zida ikkita obraz bilan hayratda qoldira oldi. Uning birinchi libosi to‘qilgan matodan tikilgan edi. Libos o‘zgacha ko‘rinishga ega edi: to‘qilgan matodan tikilgan ko‘ylakning pastki orqa qismi to‘r bilan bezatilgan. Bunday ko‘rinishdagi to‘y libosini kamdan kam hollarda uchratish mumkin.
Shunga qaramay, O‘zdemirning Nihan Peker tomonidan yaratilgan ilk libosi ba’zi muxlislar tomonidan tanqid qilindi. Aktrisaning g‘ayrioddiy libosi hammaga ham yoqmagan bo‘lishi mumkin.
Demet raqsga tushganidan keyin ikkinchi libosda ko‘rinish berdi. Yon cho‘ntaklarga ega libos londonlik dizayner Aleksandr Makkuin tomonidan yaratilgan. Juftlikning turmushi uzoqqa bormagan bo‘lsa-da ularning to‘yi ko‘pchilikning esida qoldi.
Bashak Gyumuljineliolu
“Eshigimni qoq” seriali yulduzlari Bashak Gyumuljineliolu va Chag‘ri Chitanak 2022-yilning oxirida turmush qurdi.
Aktrisa uncha hashamatli bo‘lmagan libosni tanlashga qaror qildi. Bashak to‘yida yumshoq matodan tikilgan uzun libosda ko‘rinish berdi. A-siluetli libosning yeng qismida naqshli nozik to‘r mavjud.
O‘zge Gurel
“Janob xato” seriali yulduzi O‘zge Gurel o‘z taqdirini aktyor Serkan Chayo‘g‘li bilan bog‘lashga qaror qildi. Juftlik Italiyaga alohida mehr qo‘ygan, ularning sevgisi bundan 9 yil oldin aynan o‘sha yerda tug‘ilgan. Shuning uchun ular aynan o‘sha joyda turmush qurishni xohladi, biroq Serkanning ota-onasi nikoh to‘yi aktyorning vatani bo‘lgan Germaniyada bo‘lishini xohladi.
O‘zgening libosini Vakko Couture va mashhur dizayner Galiya Lahav yaratgan. Aktrisaning to‘y obrazi avvalgi aktrisalarning liboslaridan tubdan farq qiladi. Libosning ko‘krak qismidagi bezak uning yanada chiroyli ko‘rinishini ta’minlagan.
Izoh (0)