Turk aktyorlarining “Oskar”i: “Oltin kapalak 2024” g‘oliblari aniqlandi

Turkiya kino sanoatining asosiy voqealaridan biri — “Oltin kapalak” marosimi bo‘lib o‘tdi. Bu tadbir Turkiya uchun “Oskar”ga o‘xshaydi, shuning uchun har safar nomzodlar ro‘yxatida eng talabgir turk aktyorlari bo‘ladi. Ammo bu yil tomoshabinlar qizil gilamda Afra Saracho‘g‘lu, Miray Daner, Birja Akalay va boshqalarni ko‘rishni istasalar-da, ko‘plab nomzodlar tadbirda ko‘rinmadi. Turli nominatsiyalar bo‘yicha g‘oliblar bilan tanishtiramiz.

“Marvarid donalari” — 2024-yilning eng yaxshi seriali

“Marvarid donalari” dramasi bu yil g‘oliblikni qo‘lga kiritdi. Talabgorlar orasida “Qizil sharbat”, “Qo‘rg‘on sirlari”, “Bahor”, “Chegarasiz muhabbat”, “Alvon g‘unchalar” seriallari ham bor edi.

Mukofotni bosh rol ijrochisi Hazar Erguchlu qabul qilib oldi va nutq so‘zladi:

Hurmatli hakamlar hay’ati a’zolariga minnatdorlik bildiramiz. Biz juda baxtiyormiz. Men bu yerga mukofot olish uchun kelganman. Biz bu yerda butun jamoa bilan bo‘lishni xohlardik, ammo suratga olish davom etayotgani sababli faqat men ishtirok eta oldim.

Demet Evgar — 2024-yilning eng yaxshi aktrisasi

“Eng yaxshi aktrisa” nominatsiyasida “Bahor” serialidagi roli uchun Demet Evgar g‘alaba qozondi. Demet mukofotni munosib tarzda oldi, chunki u qatnashgan melodrama 2024-yilning eng mashhur asariga aylanib, Turkiyadan boshqa davlatlarda ham shuhrat qozondi.

Ovoz berganlarning barchasiga rahmat. Hakamlar hay’ati a’zolariga minnatdorlik bildiraman. “Bahor” seriali jamoasiga alohida tashakkur aytmoqchiman.

Mert Yazijiog‘lu — 2024-yilning eng yaxshi aktyori

“Eng yaxshi aktyor” nominatsiyasida “Alvon g‘unchalar” serialida bosh rollardan birini ijro etgan Mert Yazijiog‘lu g‘olib bo‘ldi. Bu nominatsiyada Bug‘ra Gulsoy, Burak Deniz, Deniz Jan Aktash va boshqa ko‘plab aktyorlar g‘oliblik uchun kurashishdi. Sahnada aktyor serial jamoasiga minnatdorlik bildirib, hozirda ular keyingi qism ustida ishlayotganligini ma’lum qildi.

Bertan Asllani va Rojbin Erden — “Eng yaxshi juftlik”

Asi va Alaz — “Yovvoyi” serialidagi yorqin juftlik sifatida g‘olib bo‘ldi. Ijtimoiy tarmoqlar tufayli ularning birgalikdagi heshtegi katta qo‘llab-quvvatlashga sazovor bo‘ldi va eslatmalar soni bo‘yicha yuqori ko‘rsatkichga erishdi.

Aytgancha, bu juftlik allaqachon yoshlar marosimida va “Güzel Awards 2024” tadbirida g‘olib chiqishga muvaffaq bo‘lgan. 

Perixan Savash — “Kino afsonasi”

Maxsus nominatsiyada “Saxovat”, “Tilak toshi”, “Begona” seriallarining yulduzi Perixan Savash g‘oliblikni qo‘lga kiritdi.

“Yorqin yulduz” nominatsiyasi g‘oliblari oldindan ma’lum edi. Bu yil mukofotni Sumeye Aydog‘an, Melis Minkari, Alisa Sezen Sever va Yigit Kochak qo‘lga kiritdi.

Marosimning yorqin yulduzlaridan biri Sila Turko‘g‘lu bo‘ldi. Aktrisa “Eng yaxshi aktrisa” nominatsiyasida nomzod bo‘lgandi, ammo bu yil g‘olib bo‘lolmadi.