Pentagon rahbari Pit Xegset Meksika oliy harbiy rahbariyati bilan suhbatda, agar mamlakat narkotik kartellari bilan bog‘liq muammoni hal qilmasa, bir tomonlama choralar ko‘rish bilan tahdid qildi.
31-yanvardagi suhbatdan xabardor bo‘lgan manbalarga ko‘ra, Pentagon rahbari rasmiylarga agar Meksika mamlakat hukumati va narkokartellar o‘rtasidagi til biriktirishni aniqlamasa, AQSH armiyasi bir tomonlama harakatlarni amalga oshirishga tayyorligini aytgan.
Manbalarning ta’kidlashicha, ushbu suhbatda ishtirok etgan Meksikaning yuqori rahbariyati Meksika ichidagi harbiy harakatlarga ishora qilyapti, deb o‘ylab, hayratda qolgan va g‘azablangan.
Bundan avval Meksikada “Yevropaning kokain qiroli” Marko Ebben otib o‘ldirilgani xabar qilingandi.
Aniqlanishicha, qotillar Marko Ebbenni Mexiko yaqinidagi Atisapan-de-Saragosa shahrida joylashgan hashamatli sport zali yonida poylab turishgan. U o‘zining zirhli Cadillac avtomobilidan bir qadam narida turganida otib o‘ldirilgan. Meksika rasmiylarining bayonotiga ko‘ra, qotillar harbiy politsiyadan atigi 14 daqiqa oldin harakatga o‘tishgan.
Politsiya Ebbenning jasadida AQSH Narkotiklarga qarshi kurash boshqarmasining (DEA) soxta guvohnomasini topgan. Unda “kokain qiroli”ning taxallusi Xesus Antonio Velaskes Rivas deb yozilgan. Bu Ebben o‘z shaxsini soxtalashtirishining birinchi holati emas: u Rossiyada Yevropa ittifoqi diplomati niqobi ostida, Braziliyada esa Yevropolning maxsus agenti sifatida sayohat qilgan. Aynan shu tashkilotning eng ko‘p qidirilayotganlar ro‘yxatiga u ananas qutilarida 400 kilogramm kokain kontrabandasini amalga oshirgani uchun kiritilgan edi.
Izoh (0)