Kosta Rika AQSHdan oilasi bilan deportatsiya qilingan markaziy osiyolik va janubiy kavkazlik migrantlarning birinchi guruhini qabul qildi. Bu haqda Reuters xabar berdi.
Noqonuniy migrantlarni qabul qilish Vashington bilan tuzilgan kelishuv doirasida amalga oshgan. Unga ko‘ra, 200 nafargacha deportatsiya qilinganlar Kosta Rikadagi migrantlarni saqlash markazida bo‘ladi. Muhojirlarga u yerda bir oy qolishga ruxsat beriladi. Shu vaqt mobaynida rasmiylar ularning o‘z vatanlariga ixtiyoriy qaytishini muvofiqlashtiradi. Buni San-Xose aeroportida jurnalistlarga xavfsizlik vaziri o‘rinbosari Omer Badilla ma’lum qildi.
Ularning aksariyati o‘z mamlakatlariga qaytishni xohlaydi, dedi Badilla va qaytishni istamaydiganlar ishi alohida ko‘rib chiqilishini aytdi.
Kosta Rikaga kelganlar orasida O‘zbekiston, Xitoy, Armaniston, Turkiya, Afg‘oniston, Rossiya, Gruziya, Vyetnam, Ozarbayjon, Eron, Iordaniya, Qozog‘iston va Gana fuqarolari bor.
Ular qayerda bo‘lishidan qat’i nazar yordam ko‘rsatiladi — TIV AQSHdan deportatsiya qilinadiganlar haqida
Vazirlikka ko‘ra, O‘zbekiston o‘z fuqarolarining vatanga xavfsiz deportatsiyasini ta’minlash uchun AQSH bilan yaqindan hamkorlik qilib kelmoqda. O‘zaro kelishuvlarga asosan, Amerika tomoni deportatsiya qilinadigan fuqarolarining har bir holati haqida tezkorlik bilan xabardor qiladi. O‘rnatilgan amaliyotga ko‘ra, fuqarolar vatanga Nyu York-Toshkent yo‘nalishi orqali qaytadi.
“OAVda O‘zbekiston fuqarolarining boshqa davlatlarga deportatsiya qilinishi mumkinligi haqidagi ma’lumotlarni kuzatib boryapmiz. Ushbu masala yuzasidan diplomatik vakolatxonalarimiz Amerika tomonidan boshqa davlatlarga deportatsiya qilinishi mumkinligi haqida ma’lumot berishni so‘rab murojaat qildi. Bundan tashqari, bu borada Lotin Amerikasi davlatlari bilan diplomatik kanallar orqali ham aloqalar o‘rnatilgan”, dedi matbuot kotibi Ahror Burhonov.
AQSH 970 dan ortiq O‘zbekiston fuqarosini deportatsiya qiladi
Deportatsiya qilinadigan O‘zbekiston fuqarolari soni 975 kishini tashkil etmoqda. Immigratsiya va bojxona xizmati 2024-yil noyabr oyidagi hisobotni tadqim etdi. Umumiy hisobda, turli davlatlardan 1 445 549 nafar chet el fuqarosi chiqarib yuboriladi.
Ular hibsga olinmagan, biroq deportatsiya qilish bo‘yicha yakuniy qaror qabul qilingan. Bundan tashqari, ro‘yxatda allaqachon mavjud bo‘lmagan davlatlar — SSSR va Yugoslaviya ham keltirilgan. Ushbu pasportlarga ega bo‘lgan shaxslar aynan qaysi davlatga yuborilishi noma’lum.
Deportatsiya qilinadiganlar orasida Meksika (252 044), Gvatemala (253 413), Gonduras (261 651) va El-Salvador (203 822 kishi) yetkachilik qilmoqda
Izoh (0)