Buyuk Britaniya bosh vaziri Key Starmer AQSH va Ukraina prezidentlari Donald Tramp hamda Vladimir Zelenskiy bilan telefon orqali muloqot qildi.
Bu haqda Britaniya bosh vazirining idorasi ma’lum qildi.
Bosh vazir telefon orqali prezident Tramp va prezident Zelenskiy bilan gaplashdi. U Ukrainani so‘zsiz qo‘llab-quvvatlashini ma’lum qildi. Shuningdek, Ukraina suvereniteti va xavfsizligiga asoslangan mustahkam tinchlik yo‘lini topish uchun qo‘lidan kelgan barcha ishni qilmoqda, deyiladi bayonotda.
Vladimir Zelenskiy va Donald Trampning Vashingtondagi uchrashuvi dahanaki jangga aylangandi. Ukraina prezidenti amerikalik hamkasbini Rossiya tomoni bilan murosa qilmaslikka chaqirdi. Bunga javoban Tramp Ukraina “og‘ir ahvolda” va “qo‘lida kuchli kartalar” yo‘qligini aytdi.
Muloqotga AQSH vitse-prezidenti J.D.Vens ham aralashdi. “Siz bir marta bo‘lsa ham rahmat aytdingizmi?” deb so‘radi u Zelenskiydan Amerika yordamini pisanda qilib.
Tramp Ukraina askarlari aql bovar qilmaydigan jasorat ko‘rsatganini, ammo AQSH janglarni to‘xtatib, pulni “qayta qurish kabi boshqa maqsadlarda” ishlatmoqchi ekanini ta’kidladi.
Keyinroq AQSH prezidenti Truth ijtimoiy tarmog‘ida xabar e’lon qildi va unda Zelenskiy “tinchlikka tayyor emasligini” ta’kidladi.
Izoh (0)