Пентагон раҳбари Пит Хегсет Мексика олий ҳарбий раҳбарияти билан суҳбатда, агар мамлакат наркотик картеллари билан боғлиқ муаммони ҳал қилмаса, бир томонлама чоралар кўриш билан таҳдид қилди.
31 январдаги суҳбатдан хабардор бўлган манбаларга кўра, Пентагон раҳбари расмийларга агар Мексика мамлакат ҳукумати ва наркокартеллар ўртасидаги тил бириктиришни аниқламаса, АҚШ армияси бир томонлама ҳаракатларни амалга оширишга тайёрлигини айтган.
Манбаларнинг таъкидлашича, ушбу суҳбатда иштирок этган Мексиканинг юқори раҳбарияти Мексика ичидаги ҳарбий ҳаракатларга ишора қиляпти, деб ўйлаб, ҳайратда қолган ва ғазабланган.
Бундан аввал Мексикада “Европанинг кокаин қироли” Марко Эббен отиб ўлдирилгани хабар қилинганди.
Аниқланишича, қотиллар Марко Эббенни Мехико яқинидаги Атисапан-де-Сарагоса шаҳрида жойлашган ҳашаматли спорт зали ёнида пойлаб туришган. У ўзининг зирҳли Cadillac автомобилидан бир қадам нарида турганида отиб ўлдирилган. Мексика расмийларининг баёнотига кўра, қотиллар ҳарбий полициядан атиги 14 дақиқа олдин ҳаракатга ўтишган.
Полиция Эббеннинг жасадида АҚШ Наркотикларга қарши кураш бошқармасининг (DЕА) сохта гувоҳномасини топган. Унда “кокаин қироли”нинг тахаллуси Хесус Антонио Веласкес Ривас деб ёзилган. Бу Эббен ўз шахсини сохталаштиришининг биринчи ҳолати эмас: у Россияда Европа иттифоқи дипломати ниқоби остида, Бразилияда эса Европолнинг махсус агенти сифатида саёҳат қилган. Айнан шу ташкилотнинг энг кўп қидирилаётганлар рўйхатига у ананас қутиларида 400 килограмм кокаин контрабандасини амалга оширгани учун киритилган эди.
Изоҳ (0)