Toshkentda AQSHga borish istagidagi yana bir fuqaro firibgarlarga aldandi

Toshkentning Uchtepa tumanida fuqarodan firibgarlik bilan 20 ming dollar olgan shaxslar ushlandi.

Bosh prokuratura huzuridagi departamentning Uchtepa tumani bo‘limi,  DXX va IIB xodimlari hamkorligida o‘tkazilgan tezkor tadbirda fuqaro S.G‘. fuqaro D.S.ni go‘yoki yuqori lavozimda ishlovchi tanishlari orqali AQSHga yuborishi va u yerda ish bilan ta’minlashi evaziga tanishi A.A. orqali 20 ming dollarni olgan vaqtida ashyoviy dalillar bilan ushlangan.

Holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Bundan avval Toshkentning Chilonzor tumanida AQSHga ishga yuborish uchun 40 ming dollar olgan shaxs ushlangandi. O‘zbekistondan AQSHga noqonuniy borish bilan bog‘liq firibgarlik holatlari haqida xabar berilishiga qaramay, bunday holatlar tez-tez qayd etilmoqda.

AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirgan. 

2024-yilda AQSH hukumati 572 o‘zbekni deportatsiya qilgan. AQSHdan deportatsiya qilinadigan O‘zbekiston fuqarolari soni 975 kishini tashkil etmoqda. Tramp noqonuniy migrantlarning Meksika orqali kirishini taqiqladi.