Ukraina yetakchisi Vladimir Zelenskiy AQSH prezidenti Donald Tramp bilan Oq uyda bo‘lgan dahanaki jang “har ikki tomon uchun ham yomon bo‘lganini” aytdi. Bu haqda u Fox News telekanalida ma'lum qildi.
“Bu ikki tomon uchun ham yomon”, dedi u o‘tkazilgan tadbir Ukraina xalqi uchun yaxshi bo‘ldimi, degan savolga javoban.
Zelenskiy Tramp bilan uchrashuvda “juda nozik narsalar” muhokama qilinganini qayd etdi. Ukraina prezidentining aniqlik kiritishicha, Kiyev hamkorlari “vaziyatni to‘g‘ri tushunishlari” kerak.
Shu bilan birga, Zelenskiy Tramp va Amerika xalqiga qo‘llab-quvvatlagani uchun minnatdorlik bildirdi. Shuningdek, u Ukraina muzokaralarda ishtirok etishga va diplomatiya bilan shug‘ullanishga tayyorligiga ishontirdi.
“Biz tinchlikka tayyormiz, lekin kuchli pozitsiyaga ega bo‘lishimiz kerak. Va bizda xavfsizlik kafolatlari bo‘lishi kerak”, deya qo‘shimcha qildi Zelenskiy.
Vashingtonda Tramp va Zelenskiy o‘rtasidagi tortishuvning asosiy mavzusi Ukrainadagi mojaroni tinch yo‘l bilan hal qilish istiqbollari bo‘ldi. Oq uy rahbari Ukraina prezidentini mas’uliyatsiz yondashuvda ayblab, uning xatti-harakatlari millionlab odamlar hayotini xavf ostiga qo‘yishi, shuningdek, vaziyat uchinchi jahon urushi darajasigacha kuchayishiga tahdid solayotganini aytdi.
Ukrainalik siyosatchi Rossiya bilan mojaroni diplomatik yo‘l bilan hal qilish imkoniyatini qat’iyan rad etib, ilgarigi urinishlar, jumladan, turli kelishuvlar va energetika bo‘yicha kelishuvlar samarasiz bo‘lganini tilga oldi.
Izoh (0)