Nyu Yorkda tojikistonlik 33 yoshli Mansur Manuchehri ISHID va uning “Viloyat Xuroson” guruhlarini moliyalashtirish, o‘qotar qurollarni noqonuniy saqlash va immigratsiya firibgarligida gumonlanib qo‘lga olindi. Bu haqda AQSH Adliya vazirligi saytida ma’lum qilindi.
-1NnqLvkQ.jpg)
Vazirlik ma’lumotlariga ko‘ra, Manuchehri 2016-yil iyun oyida Tojikistondan AQSHga sayyohlik vizasi bilan kelgan, biroq uning amal qilish muddati tugaganidan keyin mamlakatda qolgan. 2017-yil mart oyida u qonuniy maqom olish maqsadida AQSH fuqarosi bo‘lgan ayol bilan soxta nikoh uchun pul to‘lagan, biroq talab qilingan hujjatlarni taqdim etmagani sababli bu maqomni ololmagan.
2021-yil dekabridan 2023-yil apreligacha u Turkiya va Suriyadagi ISHIDga aloqador shaxslarga, jumladan, 2024-yil yanvar oyida Istanbuldagi cherkovga hujumda gumon qilinib, Turkiya hukumati tomonidan hibsga olingan shaxsga 50 ming dollardan ortiq mablag‘ o‘tkazishga yordam bergani aytilmoqda.
Bundan tashqari, vazirlik ma’lumotlariga ko‘ra, Manuchehri taqiqlangan o‘qotar qurolga egalik qilgan va undan foydalangan. 2022-yil fevral oyida u Nyu-Jersida o‘q uzayotganini videoga olgan. Bu videoni u Turkiyadagi ISHIDga aloqador shaxslardan biriga “Allohga shukr, men tayyorman, birodar” deb yozib yuborgan.
Bosh prokuror Pem Bondining aytishicha, AQSH rasmiylari “Amerika fuqarolariga zarar yetkazishga urinayotganlarni qidirish, hibsga olish va javobgarlikka tortishga tayyor”.
Men amerikaliklarning xavfsizligini saqlash va ko‘chalarimizni yovuzlikdan xalos qilish uchun ishlayotgan federal, shtat va mahalliy huquq-tartibot idoralarimizni qo‘llab-quvvatlayman, deyiladi uning bayonotida.
Agar Manuchehri aybdor deb topilsa, unga maksimal 45 yillik qamoq jazosi berilishi mumkin.
2024-yil iyun oyida AQSHda ISHIDga aloqador bo‘lishi mumkin bo‘lgan tojikistonlik sakkiz nafar erkak qo‘lga olingan edi. OAV ma’lumotlariga ko‘ra, ular AQSHga mamlakatning janubiy chegarasi orqali kirib kelgan.
Ulardan ikkitasi 2023-yil bahorida chegarani kesib o‘tgan, bittasi esa Jo Bayden ma’muriyati tomonidan muhojirlarga boshpana olish uchun hujjat topshirishga yozilish imkonini berish uchun yaratilgan CBP One ilovasidan foydalangan. Sakkiz kishining barchasi AQSHda qolishga muvaffaq bo‘ldi, dastlabki tekshiruv paytida ular tomonidan hech qanday xavf aniqlanmadi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)