Турк сериалларидаги гўзал актрисалар ўзининг маҳоратли ижроси билан бирга, гўзал ва мафтункор кўриниши билан томошабинларни ҳайратда қолдиради. Гарчи улар тўхтовсиз иш режими, стресс ва оилавий муаммолар билан банд бўлишса-да, ўзларини доимо яхши формада сақлашни билади. Бугунги мақоладаги турк киноси юлдузларининг озиш ва соғлом турмуш тарзига оид қоидалари кўплаб аёллар учун илҳом манбайи бўлиши мумкин.
Ҳанде Эрчел
“Қалбим эшигини қоқ” сериали юлдузи Ҳанде Эрчелнинг асосий қоидаларидан бири — қатъий кун тартибига амал қилишдир. Актрисанинг иш вақти доим фарқ қилса-да, барибир етарлича ухлаш ва дам олиш учун вақт топишга ҳаракат қилади.
Ҳанде эрталаб кунини долчинли сув билан бошлайди, бундай ичимлик тетиклик беради. Онасининг вафотидан кейин Ҳанде қаттиқ стрессга тушди: у жуда кам овқатланиб, ҳаддан ташқари кўп машқ қилиши натижасида жуда озиб кетди.
Актриса кунига 6 маҳал оз-оздан овқатланиш, тамадди учун олма истеъмол қилиш, ширинлик, ёғли ва унли маҳсулотлардан воз кечиш, олма сиркаси қўшилган сув ёки лимонли сув ичиш каби одатларга амал қила бошлади. Аммо спорт машғулотлари билан янада кўпроқ шуғуллана бошлаган Ҳанде анорексия касаллигига хос тарзда озиб кетди. Ҳозирда унинг мухлислари актрисани бундай қилишдан қайтармоқда, акс ҳолда Эрчел суратга олиш жараёнлари учун куч топа олмай қолиши мумкин.
Фаҳрие Эвжен
Бурак Ўзчивитнинг рафиқаси Фаҳрие Эвжен биринчи фарзандини дунёга келтиргандан сўнг вазн орттирди. Актриса аввалги қоматини қайтаришига унга булгур ёрмаси ёрдам берди. У энг фойдали ёрмалардан бири саналади, чунки булгур махсус ишлов берилган буғдойнинг гликемик индекси паст бўлади. Бу эса қондаги қанд миқдорининг кескин кўтарилиб, ёғ сифатида захира бўлиб қолишига йўл қўймайди. Фаҳрие ўз рационини айнан шу дон маҳсулоти асосида тузди.
Баъзан актриса булгур ўрнига сули ёрмаси истеъмол қилди, унга ёғсиз гўшт, йогурт, сабзавот ва меваларни қўшиш мумкин.
Элчин Афажан
“Қалбим эшигини қоқ” сериали юлдузи Элчин Афажан “Бир оила тарихи” сериалидаги роли учун семириши лозим бўлди. лойиҳа ниҳоясига етгач, актриса аввалги қоматини қайтаришига бир неча йил керак бўлди. У рационидан шакар, углеводлар ва глютенли маҳсулотларни бутунлай чиқариб ташлади. Элчин ҳар куни 10 минг қадам юришни ўзига қоида қилиб олди.
Актриса сўзларига кўра, ортиқча вазндан халос бўлиш жараёнида мутахассис назорати муҳимдир. Шунингдек, ҳар бир одамнинг метаболизми ва организми турлича бўлгани учун диетолог ва мураббийлар тавсияларига амал қилиш керак, деб ҳисоблайди.
Пелин Карахан
“Муҳташам юз йил” сериалида султон Сулаймоннинг ягона қизи — Меҳримоҳ образини гавдалантирган актриса Пелин Карахан фарзандли бўлгач, қисқа вақтда вазн орттирди. Аввалига у ўзининг ортиқча вазнидан асло уялмаслигини айтган бўлса-да, кейинчалик ўз устида ишлашга ва қоматини тиклашга қарор қилди. Актриса рационидан ёғли, ширин ва унли маҳсулотларни олиб ташлади ва оқсилга бой маҳсулотларни, мева ва сабзавотларни кўпроқ истеъмол қилди. Шунингдек, у кундалик сув ичиш тартибига доимо риоя қилди ҳамда жисмоний машғулотлар билан фаол шуғулланди.
Аслида Пелин жиддий ва мураккаб парҳезларни ёқтирмайди. У эски вазнини қайтариш учун калория дефицитига эътибор қаратди ва спорт билан шуғулланди. Натижада актриса 35 килограмм вазндан халос бўлди.
Марям Узерли
Латофатли актриса “Муҳташам юз йил” сериалидаги Хуррам роли учун 13 килограмм вазн йиғди, кейинчалик ҳомиладорликдан сўнг яна семирди. Сўнг озиш учун ўзининг шахсий овқатланиш тамойилларини ишлаб чиқди: Узерли табиий йўл билан етиштирилган маҳсулотлар, қайнатилган мол гўшти, ясмиқ, гречка ва булгур каби маҳсулотларни кўпроқ истеъмол қилди.
У шакар, турли пишириқлар, гуруч, қовурилган овқатларни рационидан чиқариб ташлади. Сут маҳсулотларини ҳам меъёрида истеъмол қилди. Узерли интервал очлик (16/8) усулини қўллади: 16 соат оч юриб, 8 соат ичида фақат 2 маҳал овқатланди. Бироқ бундай режимни шифокор тавсиясисиз бошлаш мумкин эмас.
Ҳуля Авшар
“Муҳташам юз йил: Кўсем империяси” сериалидаги Сафия султон ролини ижро этган Ҳуля Авшар мазали овқатларни яхши кўради, аммо қоматини ҳам эътибордан четда қолдирмайди. Актриса икки маҳал овқатланишни маъқул кўради: нонуштага у бир бурда нон, мева, творог ва тонус берувчи ичимликлар, тушлик учун шўрва, қайнатилган гўшт ва сабзавотлардан иборат таомларни истеъмол қилади. Соат 19:00 дан кейин актриса ҳеч нарса емайди. Бундан ташқари, Ҳуля бўш вақтини спортга бағишлайди: теннис ўйнайди, велосипедда учади, сузади ёки спорт залида машқ қилади.
Жансу Дере
“Муҳташам юз йил” ва “Бевафо” сериалларининг юлдузи Жансу Дере қатъий парҳезлар ва интервал очликни ёқламайди, чунки актрисада диетани бузиб қўйиш эҳтимоли катта. У ўзининг нафис қоматини генларга ҳамда тўғри овқатланиш одатларига боғлиқ деб билади. Унинг шиори: “Сен нима есанг, ўшасан”.
Фастфуд, қовурилган таомлар, зарарли газаклар, чипс, газли ичимликлар, қаҳва ва ширинликлар актрисанинг рационидан узоқ йиллар аввал чиқариб ташланган. Жансу товуқ гўшти, балиқ, хом ва димланган сабзавотлар, дон маҳсулотлари ва ёғ миқдори кам сут маҳсулотларини афзал кўради. Нонушта қилишдан аввал у бир қошиқ ўсимлик ёғини ичади. Шунингдек, актриса фаол ҳаёт тарзига ҳам амал қилади.
Изоҳ (0)