Isroil 2025-yil Eron yadroviy obyektlariga “sezilarli” zarbalar berishni rejalashtirmoqda va Vashingtonning qo‘llab-quvvatlashiga umid qilmoqda. Bu haqda AQSH razvedkasiga tayanib, Wall Street Journal xabar berdi.
Ushbu xulosa AQSH sobiq prezidenti Jo Bayden ma’muriyatining so‘nggi kunlarida tayyorlangan hisobotiga kiritilgan. Razvedka ma’lumotlariga ko‘ra, Isroil AQSHning yangi prezidenti Donald Tramp administratsiyasidan yordam olishni rejalashtirmoqda.
“Chunki ular Trampni Baydenga qaraganda zarbalarga qo‘shilish ehtimolini ko‘proq deb hisoblaydi”, deyiladi xabarda.
AQSH razvedkasi Tramp prezidentligining dastlabki kunlarida taqdim etilgan ikkinchi hisobotni tayyorladi, unda ilgari qilingan xulosa tasdiqlangan.
Amerikalik harbiy amaldorlar Eronning “kuchli mustahkamlangan” yadroviy obyektlariga zarba berish uchun Isroilga, ehtimol, AQSHning harbiy yordami va o‘q-dorilari kerak bo‘lishini aytdi.
Isroil bosh vaziri Binyamin Netanyaxu administratsiyasi mazkur xabarga munosabat bildirmadi, Isroil harbiylari ma’lumotlarga izoh berishdan bosh tortdi.
Trampning Eron borasidagi fikrlari
AQSH prezidenti o‘tgan hafta Isroil bosh vaziri Binyamin Netanyaxu bilan uchrashdi. Shu kuni Tramp birinchi prezidentlik muddati davomida Eronga nisbatan qo‘llagan “maksimal bosim” siyosatini qayta boshlash to‘g‘risidagi farmonni imzoladi. Strategiya Tehronning neft eksportidan keladigan daromadlarini kamaytirishga va uning yadro qurolini ishlab chiqishiga to‘sqinlik qilishga qaratilgan.
Tramp bunday qadamdan xursand emasligini va tasdiqlangan yadroviy tinchlik kelishuvini afzal ko‘rishini aytdi. U AQSH Isroil bilan birgalikda “Eronni parchalab tashlamoqchi” degan da’volarni “juda bo‘rttirilgan” deb atadi.
“Men Eron bilan yadroviy bo‘lmagan bitim tuzishni istardim. Men buni bombardimon qilishdan ko‘ra afzal ko‘rgan bo‘lardim”, deya ta’kidlagan AQSH prezidenti.
Inauguratsiyadan oldin u AQSH va Eron o‘rtasida urush bo‘lishi mumkinligini aytgandi.
Izoh (0)