Livan parlamenti ikkinchi turdagi saylovda mamlakat qurolli kuchlari bosh qo‘mondoni Jozef Aunni prezidentlik lavozimiga sayladi, deb xabar bermoqda CNN.
2022-yil oktyabr oyida Livanning sobiq prezidenti Mishel Aunning vakolati tugaganidan so‘ng mamlakatdagi prezidentlik lavozimi ikki yildan ortiq vaqt mobaynida bo‘sh qolgan edi. Bugungi kungacha Livanning yangi prezidentini saylashga 12 marta muvaffaqiyatsiz urinishlar bo‘lib o‘tgan.
Ovoz berishning birinchi bosqichi joriy yilning 9-yanvar kuni ertalab o‘tkazilgan, ammo Jozef Aun g‘alaba uchun zarur bo‘lgan 128 ovozdan 86 tasini to‘play olmagan. Ikkinchi turda esa u 99 ta ovozni qo‘lga kiritishga muvaffaq bo‘lgan.
CNN qayd etishicha, Aunni AQSH va Saudiya Arabistoni qo‘llab-quvvatlaydi.
Ovoz berish natijasi Isroil bilan urushdan keyin “Hizbulloh” ta’sirining zaiflashganini ko‘rsatdi, deb yozadi Reuters.
Agentlikning qo‘shimcha qilishicha, Aunning saylanishi Saudiya Arabistoni ta’sirining mamlakatda qayta tiklanishi va Eron ta’sirining zaiflashishidan dalolatdir. Bloomberg nashri ham Aunning g‘alabasi Eron ta’sirining pasayishini anglatishi haqida yozgan.
Aunning ikkinchi turdagi g‘alabasi uni “Hizbulloh” parlamenti a’zolari qo‘llab-quvvatlagandan so‘ng yuzaga keldi. Birinchi turda ular ovoz berishda betaraf qolishgan edi.
Livan siyosiy doiralaridagi manbalarga ko‘ra, ovoz berish arafasida G‘arb va bir qancha arab davlatlari vakillari Aunning saylanishiga ko‘maklashish maqsadida Livan rasmiylari bilan aloqalarni faollashtirgan. BBC’ga ko‘ra, 8-yanvar kuni Fransiya va Saudiya Arabistoni elchilari Livan siyosatchilari guruhi bilan uchrashgan.
60 yoshli Aun Livan armiyasini 2017-yil mart oyidan beri boshqargan va 2024-yil yanvar oyida iste’foga chiqishi kerak edi, ammo uning vakolatlari “Hizbulloh” va Isroil o‘rtasidagi urush tufayli ikki marta uzaytirilgan.
Associated Press tahlilchilariga ko‘ra, Aun tayinlagan Livanning yangi hukumati jiddiy muammolarga duch kelishi kutilmoqda, chunki mamlakat bir necha yillardan beri iqtisodiy inqiroz holatida. Mamlakat rahbarlari 2022-yilda Xalqaro valyuta jamg‘armasi bilan moliyaviy yordam paketi bo‘yicha dastlabki kelishuvga erishishgan, ammo XVJ bilan bitim tuzish uchun zarur bo‘lgan islohotlarning oz miqdorini amalga oshirishga muvaffaq bo‘lgan.
Izoh (0)