O‘zbekiston sporti uchun ortda qolayotgan 2024-yil g‘alabalarga, yuksak natijalarga boy bo‘ldi. “Daryo” ushbu yilda ro‘y bergan o‘zbek sportidagi eng yorqin voqealarni esga oladi.
Osiyo chempionati U 23 da kumush medal
Timur Kapadze boshchiligidagi O‘zbekiston U-23 jamoasi Qatarda o‘tkazilgan Osiyo Kubogida muvaffaqiyatli qatnashdi. Saralash doirasidagi barcha uchrashuvlarni yenggan jamoa, guruh bahslarini ham muvaffaqiyatli o‘tkazdi va birinchi o‘rin bilan chorak finalga yo‘l oldi. 1/4 bosqichida Saudiya Arabistonini, yarim finalda Indoneziyani mag‘lub etib Osiyo Kubogi finaliga yo‘l olgan jamoa O‘zbekiston tarixida ilk bor Olimpiada yo‘llanmasini qo‘lga kiritdi. Hal qiluvchi bahsda jamoa yaponlarga 90+1 daqiqada urilgan gol sabab mag‘lubiyatga uchradi.
Osiyo Kubogida chorak finalda to‘xtadik
Qatar bu yil juda ham ko‘p musobaqalarga mezbonlik qildi. Shu jumladan, futbol bo‘yicha Osiyo Kubogiga ham. B guruhidan o‘rin olgan O‘zbekiston milliy jamoasi 3 turdan 5 ochko yig‘di va 2-o‘rin bilan nimchorak finalga yo‘l oldi. Turg‘unboyev va Fayzullayevning goli Tailand ustidan g‘alaba keltirdi. Chorak finalda mezbonlar penaltilar seriyasida Katanes shogirdlarini mag‘lub etdi. Ashurmatov, Abdurahmatov va Masharipov (Panenka uslubidagi penalti esingizda bo‘lsa kerak) o‘z imkoniyatlaridan foydalana olmadi va Qatar yarim finalga yo‘l oldi. Yakunda Iordaniyani yenggan mezbonlar bosh sovrinni qo‘lga kiritdi.
Tarixiy Olimpiada
Parij Olimpiadasi O‘zbekiston delegatsiyasi uchun omadli keldi. Birinchidan, O‘zbekiston delegatsiyasi birinchi bor o‘z tarixidagi eng katta tarkib bilan musobaqalarga kirishdi.Bundan tashqari, o‘z tarixida birinchi bor jamoaviy sport turlarida Olimpiadaga yo‘l oldi. O‘zbekiston U-23 jamoasi Osiyo chempionatida finalga yo‘l olib mamlakat tarixida ilk bor Olimpiada yo‘llanmasini qo‘lga kiritdi.
O‘zbekiston ushbu Olimpiadada 13 ta medalga ega chiqdi. 8 ta oltin, 2 ta kumush va 3 ta bronza medalini qo‘lga kiritgan Olimpiyachilar umumjamoa hisobida 13-o‘rinni qayd etdi. Ushbu natija ham Olimpiadalar tarixidagi eng yaxshisi hisoblanadi.
Bungacha o‘zbekistonlikning eng yaxshi natijasi Rioda qayd etilgan. O‘shanda mamlakat 21-o‘rindan joy olgan.
O‘zbekiston boks terma jamoasi mamlakatga beshta oltin medalni olib keldi. Bu natija ham tarixiy ahamiyatga ega. Hali hech qaysi jamoa bunday kichik tarkib bilan 5 oltin medalni qo‘lga kiritmagan.
Hozirgacha o‘zbek ayollari hech qachon Olimpiada oltin medalini qo‘lga kiritmagan edi. Diyora Keldiyorova bu noxush an’anani yo‘qqa chiqardi va eng kuchli sportchilarni mag‘lub etib, diyor uchun oltin medalni taqdim etgan birinchi ayol sportchiga aylandi.
Svetlana Osipovaning taekvondo bo‘yicha musobaqadagi kumush medali esa o‘zbek ayol sportchilarining Olimpiadalar tarixidagi eng yaxshi natijasini qayd etishga yordam berdi.
-S0_LG58u-z2LVYchN.jpg)
Boks bo‘yicha musobaqalarda Bahodir Jalolov, Hasanboy Do‘stmatov va taekvondochi Ulug‘bek Rashitov Olimpiadada o‘zlarining ikkinchi oltin medalini qo‘lga kiritdi.
Bundan tashqari, Abeni yenggan Diyora Keldiyorova barchani lol qoldirdi. Qozog‘istonlik bokschiga yordam bergan o‘zbekistonlik murabbiy ham qahramon sifatida esda qoladigan bo‘ldi.
Milliy Olimpiya Qo‘mitasi binosida Olimpiadada g‘olib va sovrindor bo‘lgan sportchilar uchun 8 ta Tahoe (chempionlarga) hamda 5 ta BYD Song Plus Champion (kumush va bronza medali sohiblariga) avtomobillari sovg‘a qilindi.
Shuningdek, chempionlarga prezident sovg‘asi sifatida uy ham berildi.
Olimpiya ortidan Paralimpiyada rekordlar
Parij Paralimpiadasi O‘zbekiston delegatsiyasi uchun omadli keldi. Birinchidan, O‘zbekiston delegatsiyasi katta tarkib bilan musobaqalarga kirishdi. Ikkinchidan, musobaqalarda sportchilar muvaffaqiyatli ishtirok etdi.
O‘zbekiston delegatsiyasi ushbu Paralimpiya bahslarida 26 ta medalga ega chiqdi. 10 ta oltin, 9 ta kumush va 7 ta bronza medalni qo‘lga kiritgan paralimpiyachilar umumjamoa hisobida 13-o‘rinni qayd etdi. Ushbu natija ham ular uchun tarixdagi eng yaxshisi hisoblanadi.
Ushbu musobaqalarda o‘zbekistonlik ayol sportchilar juda ishonchli harakat qildi. O‘zbekiston delegatsiyasi hisobidagi 26 medalning 12 tasini ayol sportchilar qo‘lga kiritdi. Ba’zi sportchilar jahon rekordini yangiladi.
T11 klassida uzunlikka sakrash bahsida ishtirok etgan o‘zbekistonlik Asila Mirzayorova 5,24 metr natija qayd etib, ushbu yo‘nalishda Paralimpiya o‘yinlari rekordini o‘rnatdi va Olimpiada chempioniga aylandi.
Para yengil atletika bo‘yicha ayollar o‘rtasida F54 klassida nayza uloqtirish dasturida final bahslarida O‘zbekiston sharafini himoya qilgan Nurxon Qurbonova 21,12 metr natija qayd etgan holda jahon rekordini yangiladi va oltin medalni qo‘lga kiritdi.
Ushbu musobaqa Nurxon Qurbonova uchun omadli keldi. Nayza uloqtirish bahsida oltin medalni qo‘lga kiritgan o‘zbekistonlik sportchi avvalroq yadro uloqtirish musobaqasida bronza medaliga ega chiqdi.
Para yengil atletika bo‘yicha erkaklar o‘rtasida F37 klassida disk uloqtirish dasturida ishtirok etgan o‘zbekistonlik Tolibboy Yo‘ldashev 57.28 metr natija qayd etgan holda delegatsiya hisobiga oltin medalni yozdirib qo‘ydi.
Parijdagi yadro uloqtirish bahslarida ham qatnashgan sportchi bronza medalni qo‘lga kiritdi.
Parij Paralimpiadasida O‘zbekiston delegatsiyasi 10 ta oltin medalni qo‘lga kiritdi. Bungacha mamlakatning eng ko‘p oltin medalni qo‘lga kiritgan musobaqalari Rio va Tokio (8 ta) Paralimpiya o‘yinlari hisoblanardi. Kumush medallar sonida ham O‘zbekistonning natijasi yaxshilandi. Riodagi musobaqada delegatsiya vakillari 6 ta kumush medalni qo‘lga kiritgan.
Para yengil atletikada yadro uloqtirish bahslarida Husniddin Norbekov 16.82 metr natija bilan Paralimpiada rekordini o‘rnatdi va oltin medalni qo‘lga kiritdi.
E’tiborlisi, delegatsiya bayroqdori 3 karra Paralimpiya o‘yinlari g‘olibi bo‘lgan ilk o‘zbekistonlik sportchiga aylandi. Norbekov bungacha Rio—2016 va Tokio—2020 da ham tengsiz bo‘lgandi.
Paralimpiya g‘oliblari ham xuddi Olimpiada chempionlari singari taqdirlandi.
G‘alabaga teng mag‘lubiyat
3-avgust kuni O‘zbekistonlik Isroil Madrimov faoliyati davomida mag‘lubiyatga uchramagan, dunyoning eng yaxshi bokschilaridan biri Terens Kroufordga qarshi ringga ko‘tarildi.
Ushbu bahs WBA kamari uchun kechdi. To‘liq davom etgan jangda hakamlar amerikalik bokschining g‘alabasini qayd etdi. Ammo jangdan so‘ng juda ko‘p mutaxassislar ushbu jangda o‘zbekistonlik bokschi g‘alaba qozongani haqida fikr bildirdi.
Superligada “qirol” o‘zgardi, kubok “Andijon”ga ketdi.
O‘zbekiston Superligasida uchrashuvlar qiziqarli tarzda kechdi. “Nasaf” klubi muddatidan avval chempionlikni qo‘lga kiritdi. 4 karra Superligada kumush medallarini qo‘lga kiritgan va shuncha bor O‘zbekiston Kubogini qo‘lga kiritgan Qashqadaryo klubi ilk bor bosh sovrinni qo‘lga kiritdi.
“OKMK” o‘z tarixida ilk bor kumush medallariga ega chiqdi. “Navbahor”, “So‘g‘diyona” va “Neftchi” klublarining ochkolari soni teng keldi. Namangan klubi o‘zaro o‘yindagi ustunlik evaziga bronza medallarini qo‘lga kiritdi.
O‘zbekiston Kubogi finalida “Andijon” va “Navbahor” jamoalari to‘qnash keldi. Qiziqarli kechgan uchrashuvda andijonliklar g‘alaba qozondi va o‘z tarixida ilk bor bosh sovringa ega chiqdi.
Jahon nigohidagi o‘zbek futbolchilari
Bu yil bir nechta O‘zbekistonlik sportchilar Yevropa va Osiyo davlatlarida ajoyib o‘yin namoyish etdi. Eng katta o‘sish Abduqodir Husanovda bo‘ldi. O‘tgan yili “Lans” klubiga zaxira futbolchisi sifatida olib kelingan futbolchi hozirda Fransiyaning eng ishonchli himoyachilardan biriga aylandi. Yevropaning grand klublari uni o‘z safida ko‘rishga harakat qilmoqda. Hozirgi kun Abduqodir O‘zbekiston va Markaziy Osiyoning eng qimmat futbolchisiga aylandi.
“SSKA” klubida to‘p tepayotgan Abbosbek Fayzullayev ham yevropalik agentlarning asosiy nishonida turibdi. Hozirgi paytda Abbosbek Rossiya chempionatida eng yorqin o‘yin ko‘rsatayotgan futbolchilardan biri bo‘lib turibdi. Abbosbek Osiyoda eng yaxshi yosh o‘yinchi, O‘zbekistonda esa eng yaxshi futbolchi sovrinini qo‘lga kiritdi. Futbolchining narxi 8 million yevroga yetdi.
Ushbu mavsumni Eldor Shomurodov “Roma”da o‘tkazdi. Futbolchi o‘z o‘yinini topa olmayotgan, bir necha bor murabbiyni almashtirishga majbur bo‘layotgan rimliklar safida zaxira varianti bo‘lib qoldi. Bundan tashqari yosh Lazizbek Mirzayevning “Leganes” klubiga yo‘l olganini e‘tirof etish zarur.
Osiyo chempionatidagi muvaffaqiyatli yurish va mundial mezbonligi
Tailandda o‘tgan Osiyo chempionatida O‘zbekiston futzal jamoasi munosib ishtirok etdi. 17-bor o‘tkazilgan musobaqa o‘zbekistonliklar guruhdagi barcha o‘yinda g‘alaba qozondi. Chorak finalda Vyetnamni 2:1 hisobida mag‘lub etgan futzalchilar, yarim finalda Eron bilan duch keldi. Asosiy vaqtda tengma-teng kurashishni uddalagan Xose Venansio Lopes shogirdlari penaltilar seriyasida mag‘lub bo‘ldi. Yakunda Tojikiston jamoasini mag‘lub etgan O‘zbekiston termasi musobaqada 3-o‘rinni egalladi.
14-sentyabrdan 6-oktyabrga qadar futzal bo‘yicha Jahon Chempionatida bo‘lib o‘tdi. O‘zbekiston mezbonlik qilgan musobaqa finalida Braziliya Argentina ustidan g‘alaba qozondi. A guruhidan o‘rin olgan jamoa uchrashuvlarning 2 tasida mag‘lub bo‘ldi, bir uchrashuvda durang qayd etdi va guruhda qolib ketdi.
Aytib o‘tish joizki, Toshkent, Andijon va Buxoro viloyatlarida bo‘lib o‘tgan musobaqa ko‘tarinki ruhda o‘tdi. Musobaqa ideal tarzda tashkil etilganini Janni Infantino ham e’tirof etib, ushbu musobaqani “futzal tarixidagi eng yaxshi turnir” bo‘lganini ta’kidladi.
Ruslan Nuriddinov jahon rekordini yangilab, uch karra jahon chempioni bo‘ldi
Bahraynda og‘ir atletika bo‘yicha jahon chempionati o‘tkazildi. Chempionatda Ruslan Nuriddinov jahon rekordini yangilab, uch karra jahon chempioni bo‘ldi.
-109 kg vazn toifasida ishtirok etgan Nuriddinov dast ko‘tarish mashqida 182 kg bilan beshinchi o‘rinni band etgan bo‘lsa ham, siltab ko‘tarish dasturida yuksak mahorat ko‘rsatib, 242 kg bilan 3 yil avval Toshkentda o‘zi o‘rnatgan jahon rekordini yangiladi.
Shaxmat Olimpiadasida kuchli uchlikdamiz
Vengriya poytaxti Budapesht shahrida bo‘lib o‘tgan 45-butunjahon shaxmat Olimpiadasi bo‘lib o‘tdi. Musobaqada amaldagi chempionlar sifatida qatnashgan Nodirbek Abdusattorov sardorligidagi jamoa 17 ochko bilan uchinchi o‘rinni qo‘lga kiritdi. Musobaqa g‘olibi Hindiston 21 ochko to‘pladi. Kumush medallarga ega chiqqan AQSH O‘zbekiston termasidan faqatgina qo‘shimcha koeffitsiyentlar evaziga g‘alaba qozondi.
“Prezident sovg‘asi” sifatida BYD Chazor rusumidagi avtomobillar hamda 170 million so‘m pul mukofoti bilan taqdirlandi.
Prezident — Olimpiya qo‘mitasi raisi
Yilning so‘ngi kunlarida yana bir sport uchun ahamiyatli voqea yuz berdi. 25-noyabr kuni O‘zbekiston Milliy olimpiya qo‘mitasining Bosh assambleyasi bo‘lib o‘tdi. Yig‘ilishda tashkiliy masala ko‘rib chiqildi. Milliy olimpiya qo‘mitasi raisi lavozimiga O‘zbekiston prezidenti Shavkat Mirziyoyev nomzodi ilgari surildi va bir ovozdan saylandi.
Shuningdek, Bosh assambleya MOQ raisining birinchi o‘rinbosari lavozimiga Otabek Umarovni, rais o‘rinbosari lavozimiga Sherzod Tashmatovni, qo‘mita bosh kotibi lavozimiga Oybek Qosimovni sayladi.
Eng yaxshilar aniqlandi
O‘zbekistonda yilning eng yaxshilarini aniqlash marosimi bo‘lib o‘tdi. Unga ko‘ra, Hasanboy Do‘stmatov eng yaxshi erkak sportchi, Diyora Keldiyorova esa eng yaxshi ayol sportchi deb topildi. Bundan tashqari, boks bo‘yicha O‘zbekiston terma jamoasi bosh murabbiyi To‘lqin Qilichev yilning eng yaxshi murabbiyi bo‘ldi.
Barcha g‘oliblar ro‘yxati bilan tanishing:
- Yilning eng yaxshi yosh sportchisi: Abduqodir Husanov (futbol)
- Yilning eng yaxshi yosh paralimpiyachisi: Asadbek Toshtemirov (para tayekvondo)
- Noolimpiya sport turlarida yilning eng yaxshi terma jamoasi: Shaxmat bo‘yicha O‘zbekiston terma jamoasi
- Noparalimpiya sport turlarida yilning eng yaxshi terma jamoasi: Para shaxmat bo‘yicha O‘zbekiston terma jamoasi
- Yilning eng yaxshi para terma jamoasi: Para yengil atletika bo‘yicha O‘zbekiston terma jamoasi
- Yilning eng yaxshi terma jamoasi: Boks bo‘yicha O‘zbekiston terma jamoasi
- Yilning eng yaxshi para sport murabbiyi: Yahyo Yakubov
- Muxlislar mehrini qozongan sportchi: Sitora Turdibekova (boks)
- Muxlislar mehrini qozongan para sportchi: Ro‘za Qo‘ziyeva (para pauyerlifting)
- Yilning eng yaxshi ayol paralimpiyachisi: Nurxon Qurbonova (para yengil atletika)
- Yilning eng yaxshi ayol sportchisi: Diyora Keldiyorova (dzyudo)
- Yil kashfiyoti: Razambek Jamalov (erkin kurash)
- Yilning eng yaxshi erkak paralimpiyachisi: Husniddin Norbekov (para yengil atletika)
- Yilning eng yaxshi erkak sportchisi: Hasanboy Do‘smatov (boks)
O‘zbekiston futbol assotsiatsiyasiga ko‘ra yilning eng yaxshi futbolchisi sifatida Abbosbek Fayzullayev, eng yaxshi murabbiy sifatida Timur Kapadze e’tirof etildi.
Dunyoga “mashhur” bo‘lgan Superliga o‘yini
Superliganing 2-turida “Andijon” — “Bunyodkor” uchrashuvida bo‘lib o‘tdi. “Bunyodkor” futbolchisi Ismonaliyev “Andijon” klubi futbolchisini hakam oldida tepgisi kelib qoldi. Hakam bu harakati uchun “Bunyodkor” futbolchisiga qizil kartochka berdi. Qiziqarlisi, yotib olib ayyorlik ishlatmagani uchun jamoadoshi ham Muhammadkarim Toirovni yiqitib, tepdi.
Ushbu video ijtimoiy tarmoqda “virus”dek tarqaldi. Keyinchalik PFL jamoadoshini tepgan Farhod Bekmurodovni ham jazoladi.
Xulosa o‘rnida, 2024-yil o‘zbek sportchilari uchun muvaffaqiyatli o‘tdi. O‘zbekiston terma jamoalari juda ko‘p sport turlarida dunyo reytingida o‘z o‘rnini mustahkamladi. Eng yaxshi Olimpiada, eng yaxshi Paralimpiada, jamoaviy bahsda Olimpiada yo‘llanmasi, boksda jahonda tengsiz jamoa bo‘lish, Og‘ir va yengil atletikada ildam siljish — bularning bari bir kalendar yilida sodir bo‘lgani fikrimizning isboti.
Izoh (0)