AQSH prezidenti Donald Tramp G‘azo sektorini sotib olib, uning ustidan nazorat o‘rnatishi va keyin arab davlatlari yordamida qayta tiklashi mumkinligini aytgandi. Turkiya prezidenti Rajab Toyyib Erdo‘g‘on va HAMAS mazkur rejani qoraladi.
“Hech kim Falastin xalqini ikkinchi Nakbani boshidan kechirishga majburlay olmaydi”, deya ta’kidladi Erdo‘g‘on. U G‘azodagi vayronagarchiliklar uchun Isroildan 100 milliard dollar tovon to‘lashni talab qildi.
G‘azodagi vayronagarchiliklar ko‘lami 100 milliard dollarga baholanmoqda. Buning uchun Isroil va Netanyaxu hukumati javobgardir. Isroil hukumati avvalo vayronagarchiliklar uchun to‘lovni amalga oshirishi, so‘ngra G‘azoni qayta tiklash jarayonini boshlashi kerak. Netanyaxu o‘z yerlaridan ko‘chira olmagan G‘azo aholisi uchun joy izlash o‘rniga, G‘azoga yetkazgan 100 mlrd dollarlik zararni qoplash manbalarini topishi lozim, deya ta’kidladi Turkiya prezidenti.
Siyosatchi “Isroil tortib olingan uylar, yerlar va ish o‘rinlarini ularning qonuniy egalari — falastinliklarga qaytarishi shart”ligini ta’kidladi. Erdo‘g‘on islom dunyosi mamlakatlarini G‘azo hududini qayta tiklashga imkon qadar hissa qo‘shishga chaqirdi.
Trampning G‘azoni sotib olish va nazorat qilish rejasini HAMAS ham qoraladi. Bu haqda tashkilot siyosiy byurosi a’zosi Ezzat El Rashq ma’lum qildi.
Biz Trampning G‘azoni sotib olish haqidagi bema’ni bayonotlarini keskin qoralaymiz. Bu so‘zlar Falastin va umuman mintaqaga nisbatan chuqur bilimsizlikni aks ettiradi. G‘azo uning xalqiga tegishli va falastinliklar o‘z yerlarini tashlab ketmaydi. Ular 1948-yilda bosib olingan shahar va qishloqlarga qaytishdan boshqa hech qanday ko‘chirishga rozi bo‘lmaydi, deya ta’kidladi u.
Trampning G’azoni sotib olish bayonoti
G‘azoni sotib olish va unga egalik qilishga qaror qildim. Qayta tiklash masalasiga kelsak, biz uni Yaqin Sharqdagi boshqa davlatlarga topshirishimiz mumkin, ular alohida qismlarni qayta qurishlari uchun yoki boshqalar bizning homiyligimiz ostida buni amalga oshirishi mumkin, degan edi AQSH prezidenti.
U HAMASning hududga qaytishiga yo‘l qo‘ymaslik uchun AQSH G‘azo sektorini o‘z nazoratida saqlab turishga majburligini ta’kidlagan.
Izoh (0)