Eron hukumati 12-fevral kuni Tehrondagi o‘quv muassasalari, davlat idoralari va banklarni yopiq qoldirishga qaror qildi.
11-fevral kuni Eron poytaxtining g‘arbiy va sharqiy hududlarida bir necha soat davomida elektr ta’minoti to‘xtatildi. Bunga elektr stansiyalari uchun yoqilg‘i tanqisligi sabab qilib ko‘rsatilmoqda. Internet va telefon aloqasida ham uzilishlar yuz berdi.
Kelgusi hafta davomida kuzatiladigan haroratning keskin pasayishi, qor yog‘ishi va sovuq ob-havo, shuningdek, sanoat, tijorat va maishiy gaz iste’molining ko‘payishini hisobga olgan holda, iste’molchilar elektr energiyasi va gaz sarfini 10 foizga kamaytirishlari lozim, deydi elektr kompaniyasi rahbari Mustafo Rajabiy Mashhadiy.
Tabiiy gaz tanqisligi jiddiy tus olgan sharoitda, prezident Mas’ud Pezeshkiyon ma’muriyati Arak, Isfaxon va Karaj kabi shaharlardagi yirik elektr stansiyalarida yuqori oltingugurtli mazutning keng qo‘llanilishiga yo‘l qo‘ymaslikni ustuvor vazifa qilib belgiladi.
Noyabr oyidan boshlab Tehrondagi va boshqa viloyatlardagi elektr energiyasini taqsimlash kompaniyalari yoqilg‘ini tejash hamda mazutga qaramlikni kamaytirish maqsadida hukumat strategiyasi sifatida turar-joy va tijorat hududlarida navbatli elektr uzilishlarini e’lon qilmoqda.
Bundan oldingi keng ko‘lamli elektr uzilishi taxminan bir oy avval yuz bergan edi. O‘shanda “blekaut” nafaqat Tehronga, balki Qum shahriga, Eronning g‘arbiy qismiga va Kaspiy dengizi sohiliga ham ta’sir qilgan. Uzilishlar Isroilning kiberhujumlari va Isroil armiyasi harbiy-havo kuchlarining Eronning muhim infratuzilmasiga bergan zarbalari bilan bog‘liq bo‘lishi mumkinligi aytilgan edi.
- Eronning tasdiqlangan neft zaxiralari 155 milliard barrelni tashkil etadi.
- Tabiiy gaz bo‘yicha mamlakat dunyodagi eng yirik zaxiralarga ega bo‘lib, umumiy hajmi 33,5 trillion kub metrga teng. Bu esa dunyodagi umumiy gaz zaxiralarining taxminan 17 foizini tashkil etadi.
Izoh (0)