HAMAS Isroilni o‘t ochishni to‘xtatish to‘g‘risidagi kelishuvni buzganlikda, jumladan, G‘azodagi falastinliklarga havo hujumlari uyushtirganlikda aybladi va garovga olinganlarni ozod qilish kelasi shanba kuniga qoldirilishini aytdi.
So‘nggi uch hafta davomida biz dushman tomonidan kelishuv shartlarining doimiy ravishda buzilishini kuzatdik, deb yozdi HAMASning harbiy qanoti hisoblanmish “Izzaddin al-Qassam brigadalari” guruhi vakili Abu Ubayda o‘zining Telegram kanalida.
Uning qayd etishicha, shu munosabat bilan HAMAS 15-fevral kuni ozod qilinishi kutilayotgan asirlarni Isroilga qaytarishni keyingi ogohlantirishgacha kechiktirishga qaror qilgan.
U Isroil kelishuv qoidalariga rioya qilishi va so‘nggi haftalarda yetkazilgan zararni qoplashi kerakligini qo‘shimcha qildi. Keyingi almashinuv shanba kuniga belgilangan bo‘lib, unda yuzlab falastinlik mahbuslar evaziga uch nafar isroillik garovga olinganlarni ozod qilish rejalashtirilgan edi.
Isroilni kelishuvni muntazam ravishda buzishda ayblagan Abu Ubaydaning ta’kidlashicha, ayblovlar “ko‘chirilgan falastinliklarga G‘azo shimoliga qaytishga ruxsat berishni kechiktirish, havo hujumlari va sektorning turli hududlarini o‘qqa tutish, shuningdek, kelishuvlarga muvofiq gumanitar yordam yetkazib berishga ko‘maklashishga qodir emaslikni o‘z ichiga oladi”.
HAMAS biroz avval Isroil bilan o‘t ochishni to‘xtatish hamda asirlarni almashish bo‘yicha kelishuv xavf ostida ekanini aytib, u barbod bo‘lishi mumkinligi haqida ogohlantirgan edi. Shuningdek, harakat vakili Qatarda kelishuvning ikkinchi bosqichi tafsilotlarini muhokama qilish uchun Isroil bilan bilvosita muzokaralar o‘tkazishga hamon tayyor ekanligini ta’kidlagan.
Isroil va HAMAS o‘rtasida o‘t ochishni to‘xtatish kelishuvi va asirlar almashinuvi
HAMAS va Isroil o‘rtasida o‘t ochishni to‘xtatish va asirlarni almashish bo‘yicha kelishuv 19-yanvar kuni kuchga kirdi.
Asirlar almashinuvining dastlabki to‘rt bosqichida Isroil qamoqxonalaridan 583 nafar falastinlik mahbus, shuningdek, G‘azo sektoridagi 13 nafar isroillik va 5 nafar taylik mahbus ozod qilindi.
8-fevral kuni Isroil armiyasi uch nafar isroillik asirning ozod etilishiga javoban 183 nafar falastinlik mahbusni qamoqdan chiqardi. Ulardan 18 nafari umrbod, 54 nafari esa uzoq muddatli qamoq jazosiga hukm qilingan. Yana 111 nafari 2023-yil 7-oktyabrda Isroil hujumlari boshlanganidan keyin G‘azo sektorida qo‘lga olingan falastinliklardir.
Umuman olganda, o‘t ochishni to‘xtatish to‘g‘risidagi kelishuvni amalga oshirish uch bosqichda o‘tkaziladi. 42 kun davom etadigan kelishuvning birinchi bosqichi doirasida 1900 dan ortiq falastinlik va 33 nafar isroillik ozod qilinishi kutilmoqda.
Izoh (0)