2024-yilda qo‘shni firma ana shu tenderlar asosida salkam 8 milliard so‘mlik ish bajardi. Bundan tashqari, buyurtmachi bilan jami 5 ta 2,5 milliard so‘mlik to‘g‘ridan to‘g‘ri shartnoma ham imzolangan. “Daryo” muxbiri xarid hujjatlarini o‘rganishi davomida doimiy g‘olib va buyurtmachi bir-biriga juda yaqin manzilda joylashganini aniqladi.
Qarshi magistral kanalidan foydalanish boshqarmasi 6—13-yanvar kunlari Turkmaniston hududiy joylashgan nasos stansiyalarida nasos agregatlarining 14 dona yo‘naltiruvchi podshipniklarini qayta tiklash ishlarini bajarish bo‘yicha tender o‘tkazdi. Lotning boshlang‘ich qiymati salkam 314 million so‘mlikni tashkil etgan.
Unda “Agro Suv Tex Montaj” va “Surxonnasosta’mir” MCHJlar raqobatlashgan va yakuniy natijalarga ko‘ra, “Agro Suv Tex Montaj” g‘olib deb topilgan. Shartnoma summasi — 283 million so‘m deb belgilangan.
Statistika agentligi ma’lumotlariga ko‘ra, g‘olib Qashqadaryo viloyati, Nishon tumani, Talimarjon shahri, Mustaqillik ko‘chasi, 1-uyda joylashgan. Jamiyat ta’sischisi – Baymatova Mohira Turayevna, rahbari esa Niyazov Yorqin Erkinovich hisoblanadi.
E’tiborlisi va shubhalisi shundaki, buyurtmachining manzili ham Talimarjon shahri, Mustaqillik ko‘chasi, 5-uyda joylashgan. Ya’ni, Qarshi magistral kanalidan foydalanish boshqarmasi g‘olibdan to‘rtta uy narida faoliyat yuritadi.
Boshqarma tomonidan O‘zbekiston Respublikasi tovar-xom ashyo birjasiga joylashtirilgan tenderlarni o‘rganish davomida 2024-yilda o‘tkazilgan 39 ta tenderning 21 tasida qo‘shni firma g‘olib bo‘lganligi aniqlandi. O‘tgan yilda firma tomonidan tender asosida salkam 8 milliard so‘mlik ishlar bajarilgan.
“Agro Suv Tex Montaj” MCHJ g‘olib bo‘lgan tenderlar
“Daryo” muxbiri holat yuzasidan xarid komissiyasi raisidan a’zosidan izoh oldi.
Boshqarma boshlig‘ining birinchi o‘rinbosari Safo Polvonov korxona ish bajarishi, Turkmanistonga o‘tish imkoniyati va texnikalar mavjudligiga qarab yutgan bo‘lishi kerakligini bildirgan. To‘liq javob berish uchun hujjatlarni ko‘rish lozimligini bildirgan. Shuningdek, firma Rossiyadan mahsulot olib kelishi ortidan yutgan bo‘lishi mumkinligini aytib, hujjatlarsiz aniq biror narsa deya olmasligini qo‘shimcha qilgan.
Bundan tashqari, boshqarma va “Agro Suv Tex Montaj” MCHJ o‘rtasida 2023—2024-yillar davomida jami 5 ta 2,5 milliard so‘mlik to‘g‘ridan to‘g‘ri shartnoma imzolangan.
Mas’ullardan ushbu tenderlar natijalariga e’tibor qaratib, shubhali holatlarni nazoratga olishni so‘raymiz.
Izoh (0)