Фарғонада ўтказилган тендерда 600 минг сўм таклиф қилган тадбиркор ғолиб чиқди. Шартнома эса 672 млн сўмга тузилган

Фарғона вилоятидаги “Фарғона йўл қуриш-таъмирлаш” унитар корхонаси томонидан ўтказилган тендер иштирокчиси бошланғич қийматига нисбатан минг баробар кам нарх таклифини бериш орқали ғолиб бўлди. Бироқ шартнома 672 миллион сўм учун тузилган. “Дарё” мухбири харид ҳужжатларини ўрганиши давомида бир қатор шубҳали маълумотларга аниқлик киритди.

Ғолиб МЧЖ раҳбарининг бундан хабари бўлмаган

“Фарғона йўл қуриш-таъмирлаш” унитар корхонаси 2024 йилнинг 18-25 декабрь кунлари корхонада иш олиб бораётган қурилиш объектларида траллер техникасидан фойдаланиш ишлари бўйича тендер ўтказди. Лотнинг бошланғич қиймати 700 миллион сўмни ташкил этган.

Унда “Элегант давр дизайн” ва “Фарғона йўл қурилиш УФК” МЧЖлар рақобатлашган. Якуний натижаларга кўра, бошланғич қийматга нисбатан минг баробар, яъни 600 минг сўм нарх таклиф берган “Фарғона йўл қурилиш УФК” МЧЖ ғолиб деб топилган. 13 январь куни шартнома 672 миллион сўм учун имзоланган.

“Дарё” мухбири суҳбатлашган МЧЖ раҳбари Нодиржон Каримовнинг айтишича, тендерда 600 минг сўм таклиф қилинганидан хабари бўлмаган.

“Бундан хабарим йўқ экан. Ҳозир аниқлаштирсам, суммани нотўғри киритиб қўйиб, мендан яширишган экан. Буюртмачи бекор қилмаётган экан лотни. Шартнома тузилмаган дейишди. Агар тузилган бўлса ҳам бекор қиламиз. Бу суммага траллер хизматини кўрсатиш мумкин эмас. Хатони тўғрилаймиз”, дейди Нодиржон Каримов.

Буюртмачи лотни бекор қилиш ниятида эмас

“Фарғона йўл қуриш-таъмирлаш" унитар корхонаси бўлим бошлиғи Сойибжон Абдураззақовнинг айтишича, техник хато туфайли таклиф этилган сумма нотўғри ёзилган, лотни бекор қилишнинг эса имкони бўлмаган.

“Техник хато сабабли лотга билдирилган таклиф 600 минг сўм қилиб нотўғри ёзиб қўйилган. Бунга тасдиқлаб бўлинганидан сўнг эътибор берибмиз.

Танлов якунланиб бўлгандан кейин нархни кўриб, улар билан гаплашганман. Бу жуда паст сумма-ку, ҳақиқатан ҳам шунақами, деб сўраганман. Шундан сўнг техник хато бўлиб қолганини айтиб, бекор қилишимиз ни сўрашди.

Мен эса ушбу хизмат 2025 йил давомида керак бўлишини, қайта ўтказиш учун икки ойча вақт кетишини ҳисобга олиб бекор қилолмаслигимизни айтганман. Анча турди. Охири уларга нимадир зарур бўлди чоғи, ўша пулга шартнома қилаверамиз, майли дейишди ва юборишди. Ҳозир қарасам, шартнома 672 миллион сўмга тузилган экан. Мен 672 минг сўм деб шартномани раҳбарнинг калитидан (ERI калити назарда тутилмоқда) имзолагандим. Суммасига эътибор бермай қолган эканман. Бу менинг хатойим”, дейди Сойибжон Абдураззоқов.

Ўтган йилда ўтказилган тендерларнинг 60 фоизида ғолиб МЧЖ

Эътиборлиси ва шубҳалиси, корхона томонидан 2024 йилда ўтказилган 49 та тендернинг 28 тасида ушбу МЧЖ ғолиб бўлган. Ўтган йилда фирма томонидан тендер асосида 17 миллиард сўмга яқин ишлар бажарилган. 

“Дарё” мухбири ҳолат юзасидан корхона бўлим бошлиғи — харид комиссияси аъзоси Сойибжон Абдураззоқов боғланди. Унинг айтишича, ушбу корхона Фарғона вилоятидаги рейтинги юқори фирмалардан бири ҳисобланади, шунингдек буюртмачиларнинг талабларига жавоб беради.

“Бу ташкилот йўл қурадиган ташкилот ҳисобланади. Рейтингда юқори ўринларда туради, салоҳияти баланд. Танлов мезонларида биз қўйган талабларга жавоб бергани учун натижа яхши чиққан бўлиши мумкин. Кейин бизга доим ҳам пул тушмайди. Ҳисобимизда пул турмайди. Битта ишни қиладиган ёки маҳсулот сотадиган бўлсак кўпроқ насияга бажартирамиз. Шуни кўпчилик билгани учун тендер танловларимизда қатнашмайди. 

Гоҳида бир-икки ой, баъзида эса олти-етти ойгача ҳисобимизда пул бўлмай қолса тўловлар чўзилиб кетиб қолади. Шунга кўнадиганлар, майли қилиб беравераман деганлар кўпроқ қатнашади бизда. 

Кимдир қатнашаман деб келганда ҳам олдиндан шу шароитимизни тушунтирамиз. Шарт қўймаймиз-у, лекин агар тўловлар кечикса бўғилмасдан турасизлар деб огоҳлантирамиз. Чунки пул бўлмай қолса, судлашиб юрмаслигимиз керак.

Фирма йўл қурилиш бўйича бизнинг Фарғона ҳудудида анча бақувват ташкилот ҳисобланади. Анча-мунча нарсани етказиб беролади. Қўрқмасдан “шаффоф”а ҳам кира олади, қўрқмасдан майда ва катта тендерларда ҳам қатнашолади”, дейди Сойибжон Абдураззоқов. 

Тендерларнинг ярмидан кўпи бир корхонага берилиши рақобат муҳитига салбий таъсир кўрсатмайдими?

Масъуллардан ушбу тендерлар натижаларига эътибор қаратиб, шубҳали ҳолатларни назоратга олишни сўраймиз.