Farg‘ona va Qashqadaryo viloyatlarida avtomobillarga texnik xizmat ko‘rsatish hamda bog‘dorchilik faoliyati bilan shug‘ullanish uchun yer maydoni ajratib berishni vaʼda qilgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Marg‘ilon shahar bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbirda muqaddam firibgarlik jinoyati uchun sudlangan S.Y. fuqaro M.P. bilan o‘zaro til biriktirib, fuqaro I.T.ga go‘yoki o‘zini kadastr xodimi va yer ajratish bo‘yicha tender komissiyasi aʼzosi sifatida tanishtirib, unga Qo‘shtepa tumani hududidagi 12 sotix zaxiradagi ekin yer maydonini 10 ming dollar evaziga avtomobillarga texnik xizmat ko‘rsatish yo‘nalishida ajratib berishini aytib, oldindan 3 ming dollarini olgan vaqtida ashyoviy dalillar bilan ushlangan.
Shu kabi, departamentning Shahrisabz shahar bo‘limi va DXX xodimlari hamkorligida o‘tkazilgan tezkor tadbirda davlat kadastrlari palatasi Yakkabog‘ tumani filiali muhandisi B.X. fuqaro B.O.ga “Darxon” MFY hududidagi tuman hokimligi zaxirasidagi qishloq xo‘jaligiga mo‘ljallangan 1 gektar yer maydonida bog‘dorchilik faoliyati bilan shug‘ullanishi uchun hujjatlarni rasmiylashtirib berishi evaziga 200 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
- Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi.
- Aprel boshlarida esa Navoiyda 80 gektar yerni 1 milliard so‘mga sotishga uringan shaxslar ushlangani,
- Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi.
Izoh (0)