26-yanvar kuni O‘zbekiston Respublikasi tovar-xomashyo birjasida 100 dan ortiq tenderlar amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.
Xodimlarni ovqatlantirishga 1,361 milliard so‘m
Surxondaryo viloyati hokimligi xodimlariga 2023-yil uchun ovqatlanish xizmatlarini yetkazib berish bo‘yicha tender o‘tkazgan. Protokolga ko‘ra, taomnomada osh, grechka, tovuq sho‘rva, qovurma lag‘mon kabi ovqatlar bo‘lishi kerak.
Tender komissiyasi bayoniga ko‘ra, g‘oliblik uchun ”Diyorbek Oshxonasi” va “Grand-Dekabr” MCHJlar qatnashgan. Yakunda 1 milliard 361 million 360 ming so‘mlik tenderni “Diyorbek Oshxonasi” yutib olgan.
Bir “e-mail”li raqobatchilar
Farg‘ona viloyati Marg‘ilon shahri maktabgacha ta’lim bo‘limi kotyol sotib olish uchun 30 million so‘mlik tender o‘tkazgan. Unda “Zilol Fin Expert” xususiy korxonasi, “Toshloq Shinam” va “Muxammad Umar Building” MCHJlar ishtirok etgan.
Bayonnomaga ko‘ra, tender yakunida “Zilol Fin Expert” g‘olib, “Muxammad Umar Building” esa zaxira g‘olib deb topilgan.
G‘olib XKning ta‘sischisi va rahbari Oripova Zilola Marifjonovna. Korxona Farg‘ona shahrida joylashgan, pochta manzili esa oripova04@mail.ru.
Zaxira g‘olib MCHJ rahbari boshqa — Turaboyev Qobil Xayriddin o‘g‘li. Ammo elektron pochta manzil raqobatchisiniki bilan bir xil.
Yana o‘sha eski tadbirkor
20-yanvar kuni e’lon qilingan materialimizda bir tadbirkorga tegishli ikki korxona bir tenderda qatnashib, “Davlat xaridlari to‘g‘risida”gi qonun moddalari buzilgani haqida yozgandik.
Ammo bir hafta o‘tsa hamki, tender natijalari bo‘yicha tekshiruv o‘tkazilmadi, natijalar bekor qilingani yo‘q. Shu sababli keyingi savdo kunlari davomida ham xuddi shu tadbirkor bilan yana ikki marta qonun buzilish holatlari sodir etildi.
Birinchisi. Jizzax viloyat teri-tanosil kasalliklari dispanseri ovqat yetkazib berish bo‘yicha autsorsing uchun tender e’lon qildi, savdo 26-yanvar kuni yakunlandi. Unda Ubaydullayev Akmaljon Eshturdiyevichga tegishli Tesla-S MCHJ va Testy Meal Plus MCHJ bellashdi. Komissiya a’zolari rozi, g‘olib Testy Meal Plus bilan 13 million 177 ming so‘mlik shartnoma imzolandi.
Ikkinchisi. 27-yanvar kuni ham yana o‘sha Jizzax viloyat teri-tanosil kasalliklari dispanseri ovqat yetkazib berish bo‘yicha o‘tkazgan tender yakunlandi. Yana o‘sha ikki tadbirkorlik subyekti (shuningdek, juda past ball qayd etgan Ota Servicegroup MCHJ) qatnashdi. Tenderni Testy Meal Plus MCHJ yutib oldi. Shartnoma summasi bu safar qariyb 20 million so‘m.
“Daryo” muxbiri tadbirkor bilan bog‘lanishga urindi, ammo MCHJlar bilan aloqa sifatida ko‘rsatilgan raqam “noto‘g‘ri” ekan.
“Yo‘q, adashdingiz”
“Namangandonmahsulotlari” aksiyadorlik jamiyati elevatorga bug‘doy tashish xizmati uchun 200 million so‘mlik tender o‘tkazdi. Lotni Trade Actives yutib oldi, Spark Arena MCHJ esa zaxira g‘olib sifatida ko‘rsatildi.
Ammo ushbu MCHJlar bir tadbirkorga tegishli.
Holat yuzasidan Umarov Fayzullo bilan bog‘lanishga urindik, ammo go‘shakni ko‘targan shaxs adashib boshqa manzilga tushganimizni aytdi.
Dubayga sayohat
O‘zbekiston Davlat jahon tillari universiteti 10 nafar iqtidorli talabani Dubayga dam olishga jo‘natadi. Sayohatni tashkil etish uchun esa 128 million so‘mlik tender o‘tkazildi.
Tenderni Golden Coin-Tour MCHJ yutib oldi. Texnik topshiriqqa ko‘ra, g‘olib quyidagi xizmatlarni ko‘rsatishi kerak:
Tushunmasdan tenderni yutgan tadbirkor
Namangan viloyati Chust tuman Tibbiyot birlashmasi tibbiy tarozi xarid qilish uchun 57,5 million so‘mlik tender o‘tkazgan. Unda g‘olib bo‘lgan Beruniy Medical va zaxira g‘olib Glyucomed MCHJlarning ikkisi ham bir tadbirkor — Obidov Muhammadyusuf Ahmad o‘g‘liga tegishli.
“Daryo” muxbiri Muhammadyusuf Obidov bilan bog‘landi. Unga vaziyat yuzasidan savol berilganida tenderda haqiqatan ham ikkita MCHJ bilan qatnashganini tan oldi.
“Ha, qatnashganman. Ammo buning noto‘g‘ri ekanini bilmagandim, uncha tushunmayman. Buxgalterim bilan gaplashay-chi”, — dedi tadbirkor.
Komissiya a’zolari esa holatni yo payqamagan, yo ko‘rib, ko‘rmaganlikka olgan. Har holda 5 nafar komissiya a’zosining birortasi ham tender natijalariga qarshi ovoz bermagan.
Mas’ullardan ushbu shubhali tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.
Izoh (0)