Farg‘ona yo‘l qurilish-ta’mirlash unitar korxonasi tomonidan 23—29-mart kunlari qiymati qariyb 170 million so‘mlik tender o‘tkazilgan. “Daryo” muxbiri mazkur ma’lumotlarni kuzatish jarayonida tenderdagi raqobatchi korxonalar bir shaxsga tegishli ekanini aniqladi.
O‘tkazilgan tenderda Damko‘l Aziya xususiy korxonasi va “Barchasi Qurilish Uchun” MCHJ qatnashgan. Loyiha smeta ma’lumotlarida yozilishicha, tender g‘olibi buyurtmachiga qurilish ishlari uchun qum-shag‘al aralashmasi yetkazib berishi kerak.
Hakamlarning yakuniy baholariga ko‘ra, “Barchasi Qurilish Uchun” MCHJ 100 ball bilan tender g‘olibi deb topilgan. Shartnoma summasi 162 milion 698 ming so‘m. Damko‘l Aziya xususiy korxonasi esa zaxira g‘olib sifatida ko‘rsatilgan.
Tender ishtirokchilarining rahbariyati bilan tanishish jarayonida shubhali holatga duch keldik. Statistika agentligi ma’lumotlariga ko‘ra, xaridni qo‘lga kiritgan “Barchasi Qurilish Uchun” MCHJning rahbari Rahimov Mirshod Alisherovich hisoblanadi. Korxonaning yuridik manzili Farg‘ona viloyati Farg‘ona tumanida deb ko‘rsatilgan.
E’tiborlisi, tenderda unga raqobat taklif etgan Damko‘l Aziya xususiy korxonasining yagona ta’sischisi va rahbari ham aynan yuqorida ismi zikr etilgan Rahimov Mirshod Alisherovich hisoblanadi. Bu korxona ham Farg‘ona viloyati Farg‘ona tumanida joylashgan.
Ammo “Davlat xaridlari to‘g‘risida”gi qonunning 68-moddasiga ko‘ra, tender ishtirokchisi faqat bitta taklif berishga haqli.
Tegishli tashkilot va idoralardan holatga munosabat bildirishni kutib qolamiz. “Daryo” voqealar rivojini kuzatishda davom etadi.
Izoh (0)