Bugun,

  • USD 11095.31
  • RUB 173.84
  • EUR 10772.44

20-yanvar kuni O‘zbekiston Respublikasi Tovar-xomashyo birjasida 100 ga yaqin tender savdolari amalga oshirildi. “Daryo” hujjatlarni monitoring qilib, eng e’tiborga molik savdolar haqida ma’lumot beradi

Foto: “Daryo” / Madina Nurman

Foto: “Daryo” / Madina Nurman

Bir tadbirkorga tegishli ikkita MCHJ “raqobatlashdi”

Samarqand viloyati kardiologiya dispanseri tomonidan muassasaga 2 ta ultratovushli asbob sotib olish bo‘yicha tender e’lon qilingan. Kuzatuvlar natijasida 620 million so‘mlik tenderda ishtirok etgan ikkita tadbirkorlik subyekti bir odamga tegishli ekani ma’lum bo‘ldi.

Skrin: “orginfo.uz”

Skrin: “orginfo.uz”

Ochiq manbadagi ma’lumotlarga ko‘ra, tender g‘olibi bo‘lgan “Tib dunyosi” MCHJning rahbari Bobomurodov Islom Mamadaliyevich hisoblanadi

Skrin: “orginfo.uz”

Skrin: “orginfo.uz”

Zaxira g‘olib “Turhan Islam” MCHJning rahbari Yashiyeva Nilufar Farhodovna. Ammo korxona ta’sischi aynan yuqoridagi Bobomurodov Islom Mamadaliyevich.

Shubhali tender

Avtomobillarga fara va chiroqlar ishlab chiqarishga ixtisoslashgan Uz Chasys MCHJ bojxona terminallaridan kelib tushgan yuklarni olib tushish, ko‘tarish xizmatini bajarish bo‘yicha boshlang‘ich qiymati 474 million so‘m bo‘lgan tender e’lon qilgan. 20-yanvar kuni e’lon qilingan tender natijalari biroz shubhali ko‘rindi.

Skrin: “etender.uzex.uz”

Skrin: “etender.uzex.uz”

Gap shundaki, tenderda o‘z xizmatlarini taklif qilgan ikkita tadbirkorlik subyekti ishtirok etgan. Raqobatda qatnashgan And Cargo Trans Service va Zafarbek Cargo Trans Servis (nomlarning o‘xshashligi ham bir ajablanarli) rahbariyatlari o‘rtasida qarindoshlik aloqalari mavjud bo‘lishi mumkin.

Skrin: “orginfo.uz”

Skrin: “orginfo.uz”

Masalan, 457 800 000 so‘m bilan tenderni yutib olgan Zafarbek Cargo Trans Servis MCHJning manzili Andijon viloyati Jalolquduq tumani Jalolquduq shaharchasi, Namuna ko‘chasi deb ko‘rsatilgan. Rahbar — Ismanov Nuriddin G‘ulomjanovich.

Skrin: “orginfo.uz”

Skrin: “orginfo.uz”

Mag‘lub MCHJ And Cargo Trans Service’ning rahbari boshqa — Kimsanboyev Davronbek Ibroximjonovich. Ammo manzili Andijon viloyati Jalolquduq tumanida deb ko‘rsatilgan korxonaning ta‘sischisi Ismanova Fatmaxon Igemberdiyevna.

Ismanov Nuriddin va Ismanova Fotimaning qarindoshlik aloqalari to‘g‘risida ma’lumot yo‘q.

Tushunarsiz tender

Yangiyer shahar “Muruvvat” nogiron ayollar uchun internat uyi ovqat yetkazib berish bo‘yicha autsorsing xizmati uchun 212 million so‘mlik tender o‘tkazdi. Unda “Demirbek Nigina Hamkor” MChJ, “Xudoyqulova Guloyna” xususiy korxonasi va “Azizbek Supper Biznes” MChJ qatnashdi.

Skrin: “etender.uzex.uz”

Skrin: “etender.uzex.uz”

Yakunda 99 ball bilan “Demirbek Nigina Hamkor” MChJ g‘olib bo‘ldi. “Xudoyqulova Guloyna” xususiy korxonasi esa rezerv yetkazib beruvchi sifatida ikkinchi o‘rinni oldi.

Skrin: “orginfo.uz”

Skrin: “orginfo.uz”

Qizig‘i shundaki, ochiq ma’lumotlarga ko‘ra, ushbu xususiy korxona faoliyati amalda rasman tugatilgan. Lekin u qanday qilib bu tenderda qatnashdi, qanday qilib zaxira sifatida ko‘rsatildi, buyog‘i tushunarsiz.

Familiyalar juda o‘xshash

Nurafshon shahar tibbiyot birlashmasi 2 ta ultratovushli diagnostika asboblari xarid qilish uchun boshlang‘ich qiymati 500 million so‘m bo‘lgan tender e’lon qildi. Unda Innovamed va Equimed nomli tadbirkorlik subyektlari qatnashdi.

Skrin: Xarid komissiyasi bayonnomasi

Skrin: Xarid komissiyasi bayonnomasi

Komissiya a’zolarining yakuniy natijalariga ko‘ra, Innovamed MChJ kichik ustunlik bilan tenderni yutib oldi. Keling, raqobatchi tadbirkorlik subyektlarining rahbariyatlari bilan qiziqamiz.

Skrin: “orginfo.uz”

Skrin: “orginfo.uz”

G‘olib tashkilot rahbari Utkurov Ibrohim Rustam o‘g‘li. U bir vaqtning o‘zida boshqa — Time Ex Logistics MCHJning ham ta’sischilaridan biri hisoblanadi.

Time Ex Logistics MCHJning yana ikkita ta’sischisi bor. Biri rahbar ham hisoblangan Abdulaziz Sarvar Sanjar o‘g‘li, ikkinchisi esa Farmonov Azamat Raxmat o‘g‘li. Xo‘sh, uning zaxira g‘olib Equimed MCHJga qanday bog‘liqligi bor?

Skrin: “orginfo.uz”

Skrin: “orginfo.uz”

Mana bunday bog‘liqlik. G‘olib tadbirkorga aloqador shaxs bevosita raqobatchi MCHJning rahbari hamda ta’sischisi hisoblanarkan. Yana bir ta’sischi — Utkurov Dovud. Eng avvaldagi Innovamed MCHJning rahbari kim edi? Ha, Utkurov Ibrohim.

Komissiya a’zosi tenderni qarindoshiga yutib berdimi?

Farg‘ona tumani xalq ta’limi bo‘limi 2023-yil yanvar oyida maktablar uchun isitish qozonlari (kotyollar) sotib olish uchun boshlang‘ich qiymati 486 million so‘mlik tender o‘tkazgan. Unda Vodil Marjona Fayzi nomli xususiy korxona g‘olib bo‘lgan.

Skrin: “orginfo.uz”

Skrin: “orginfo.uz”

G‘olib korxonaning rahbari va 100 foizlik ta’sischisi Abdurahmonov Doniyor Abdukodirovich hisoblanadi.

Skrin: Xarid komissiyasi bayonnomasi

Skrin: Xarid komissiyasi bayonnomasi

E’tiborlisi, komissiya a’zolaridan birining ismi g‘olib korxona rahbarinikiga o‘xshash — Abdurahmonov Sardorbek Abdukodirovich.

Sardorbek va Doniyor Abdurahmonovlarning bir-biriga qarindosh bo‘lib chiqishi ehtimoli juda ham yuqori.

O‘zini o‘zi yenggan tadbirkor

Jizzax viloyat Kar bolalar maxsus maktab internati boshlang‘ich qiymati 115 million so‘mlik autsorsing xizmati uchun tender o‘tkazdi. Unda Tesla-S MCHJ va Testy Meal Plus MCHJ bellashdi va yakunda Tesla-S tenderni yutib oldi.

Skrin: “orginfo.uz”

Skrin: “orginfo.uz”

G‘olib tadbirkorlik subyektining rahbari va ta’sischisi — Ubaydullayev Akmaljon Eshturdiyevich.

Skrin: “orginfo.uz”

Skrin: “orginfo.uz”

Raqobatchisiniki-chi? Ana bo‘lmasa, Testy Meal Plus MCHJ rahbari ham Ubaydullayev Akmaljon Eshturdiyevich-ku!

Bundan chiqdiki, Akmal Ubaydullayev o‘ziga tegishli ikkita korxona bilan bir tenderda qatnashib, go‘yoki o‘zini o‘zi yenggan. “Davlat xaridlari to‘g‘risida”gi qonunga ko‘ra esa tender ishtirokchisi faqat bitta taklif berishga haqli.

Mahalladoshlar raqobati

Andijon viloyati Izboskan tumanidagi Chuvama ayollar muruvvat uyi ovqat yetkazib berish bo‘yicha 838 million so‘mlik autsorsing xizmati uchun tender o‘tkazadi. Unda “Biznes Orzu-Maqsad” va “Paxtaobod Orzu Maqsad” MCHJlar g‘oliblik uchun kurashgan. Yakunda “Paxtaobod Orzu-Maqsad” 805 million so‘mlik shartnoma summasi bilan tenderni yutib oladi.

Skrin: “orginfo.uz”

Skrin: “orginfo.uz”

“Orzu-maqsad”li g‘olib tadbirkorlik subyekti Paxtaobod tumani Paxtaobod shahri “Nodirabegim” mahallasi Musaffo ko‘chasida joylashgan.

Balki tasodifdir, ammo zaxira g‘olib ham aynan shu manzilda joylashgan. Bundan tashqari, raqobatchilarning elektron pochta manzillari ham juda o‘xshab ketadi. Bu yerda qonun buzilish holati mavjud bo‘lishi mumkin.

Mas’ullardan ushbu shubhali tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.

Izoh

Timur Tulanov UZCHASYS

25 yanvar, 12:07

Assalomu aleykum xurmatli Daryo.uz jamoasi!

Davlat xaridlari etender.uzex.uz portali orqali eng yaxshi taklifni tanlash uchun 474 million so'mlik e'lon qilingan lot (raqami: 221924) bo'yicha tashkil etilga tanlov natijasi shubxali bo'lganligi sababli ikki ishtirokchidan qo'shimcha xujjatlar taqdim etish so'raldi.

Lekin, ishtirokchilar tomonidan rad javobi olingandan so'ng, ushbu ikki korxonani STIR raqamlari orqali tekshiruv va surishtiruv ishlari olib borildi. Natijada Ta’sischilar va ularning ustav fondidagi ulushi haqida ma’lumotlariga ko'ra bir oilaga tegishli bo'lgan Ismanov Muxiddin Gulamjanovich va Ismanova Fatmaxon Igemberdiyevna 100% ulush bilan afillangan shaxslar ekanligi va Davlat xaridlaridagi Manfaatlar to‘qnashuvida ko'rsatilgan qonun buzilishiga olib kelishi aniqlandi.

Shuni aytib o'tish kerakki - O'tkazilgan Davlat xaridlari etender.uzex.uz portali orqali eng yaxshi taklifni tanlash uchun e'lon qilingan lot (raqami: 221924) bo'yicha tijotiy taklif bergan "ZAFAR CARGO TRANS SERVICE" MCHJ hamda "AND CARGO TRANS SERVICE" MCHJ korxonalari bilan eng yaxshi taklifni tanlash uchun tuzilgan komissiya a'zolari va komissiya sekretarining hech qanday bog'liqlik tomonlari mavjud emas.

Ishtirokchilar ushbu bayonnomani qabul qilmasliklarini va tender natijasini rad etishlarini aytib o'tishdi.

Ikki korxona rahbarlari taqdim etilgan narxlardan voz kechib, tanlov bekor qilishga o'zaro kelishib olindi.

Komissiya a'zolari bilan tuzilgan yig'ish boyicha bayonnomani rasmiy info@daryo.uz elektron pochtangizga ham yuborildi.

Qoshimcha savollar va takliflaringiz bo'lsa, timur.tulanov@uzchasys.uz pochtasiga murojat qilishingiz mumkin.

Hurmat bilan,
Timur Tulanov

Asosiy yangiliklar
Dunyo
Ukraina tashqi ishlar vaziri Putinning “Zelenskiyni o‘ldirmaslik” bo‘yicha bergan va’dasiga munosabat bildirdi
Sport
A Seriya. Eldor Shomurodovning debyut o‘yinida “Spetsiya” o‘zida “Napoli”ga yirik hisobda yutqazdi
Dunyo
Marsdan ham sovuqroq: AQSHda havo harorati tarixiy rekordni yangiladi (video)