Pochtasi, manzili, hatto telefon raqami bir xil “raqobatchilar”, lotni bo‘lishgan sheriklar — 24-yanvardagi shubhali tenderlar
24-yanvar kuni O‘zbekiston Respublikasi tovar-xomashyo birjasida bir qator shubhali tenderlar amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.
Manfaaatlar to‘qnashuvi?
Buxoro viloyati Jondor tumani Tibbiyot birlashmasi ovqat yetkazib berish bo‘yicha autsorsing xizmati uchun 190 million so‘mlik tender o‘tkazgan. Unda “BTT Halol Baraka Ta’minot” va “Universal Ulgurji Savdo Qurilish Invest” MChJlar g‘oliblik uchun kurashgan va yakunda “BTT Halol Baraka Ta’minot” korxonasi 189 million so‘m bilan tenderni yutib olgan.
G‘olib MChJ ta’sischisi va rahbari Bozorov Tojiddin To‘xtamurodovich hisoblanadi.
E’tiborlisi va shubhalisi shundaki, ushbu lot bo‘yicha o‘tkazilgan tender komissiyasi a’zolaridan birining ismi — Xudoyev To‘xtamurod Bozorovich.
“Daryo” muxbiri holat yuzasidan tadbirkor hamda komissiya a’zosidan izoh oldi. Ularning ikkisi ham ism-familiyalardagi o‘xshashliklar tasodif ekanini aytib, ular o‘rtasida qarindoshlik aloqalari yo‘qligini ma’lum qildi.
“E-mail”doshlar
Toshkent viloyati Angren shahar Tibbiyot birlashmasi issiq ovqatlar yetkazib berish uchun tender o‘tkazgan. Shartnoma summasi 57 million so‘mlik jami uchta tenderni “Bunyodkor Namunali Savdo” MChJ yutib olgan. Unga raqobat uyushtirgan “Angren Nish” MChJ esa zaxira g‘olib deb topilgan.
Tender ishtirokchilarining rahbariyati bilan tanishish jarayonida qiziq holatga duch keldik.
Ochiq ma’lumotlarga ko‘ra, g‘olib tadbirkorlik subyektining rahbari Mamarazzoqov Hasan Saidovich. Korxona manzili Toshkent viloyati Angren shahrida deb ko‘rsatilgan.
“Angren Nish” MChJ ta’sischisi Xamrayev Baxtiyor Jumaboyevich. Korxona Toshkent viloyati Angren shahrida joylashgan.
Ma’lumotlarga diqqat bilan qarasak, raqobatchi tadbirkorlik subyektlarining elektron pochta manzili bir xil ekanini payqash mumkin: angren.yadm@umail.uz manziliga xat jo‘natsak, ikkala korxona ham xabardor bo‘larkan. “Bu yo tasodif, yo o‘ta hayratlanarli darajada tasodif”.
Bunisi endi manzildoshlar
Farg‘ona viloyati Yozyovon tumani tibbiyot birlashmasi tayyor issiq ovqat bilan ta’minlash bo‘yicha umumiy qiymati qariyb 310 million so‘mlik 3 ta tender o‘tkazgan. Ushbu lotda ham yuqoridagi kabi holatga duch keldik.
Gap shundaki, tenderni yutib olgan “Sokin Osmon Sexri” MChJ va zaxira g‘olib “Begoyim Savdo Madadkori” MChJ rahbariyati o‘rtasida bog‘liqlik bor.
Statistika agentligi ma’lumotlariga ko‘ra, ushbu ikki “raqobatchi” korxonalarning elektron pochta hamda joylashuv manzillari bir xil. Juda ham qiziq.
Tender-shou
Buxoro elektr bilan ta’minlash distansiyasi avtomototransportlarni ulgurji hamda chakana savdo va ta'mirlash xizmatlari bilan ta’minlash uchun 135 million so‘mlik tender o‘tkazgan. Unda Buxara Auto Leader va Pit Stop Avto MChJlar raqobat uyushtirgan, yakunda birinchi tadbirkorlik subyekti 128 million 250 ming so‘m bilan tenderni yutib olgan.
Ammo mana shu MChJlar bir tadbirkorga tegishli, hujjatlar shunaqa ko‘rsatyapti:
Bunisi endi aniq tasodif emas. Ergashev Shahriyor Baxtiyorovich o‘ziga tegishli ikkita korxona bilan maskarad uyushtirgan va g‘irrom tarzda tenderni yutib olgan. 3 nafar komissiya a’zosi esa bir og‘iz e’tirozsiz, savdoga rozilik bildirgan.
Tenderdagi sheriklar
Toshkent viloyati Nurafshon shahar Tibbiyot birlashmasi tibbiy maqsadlarda ishlatiladigan dorilar va materiallar xarid qilish bo‘yicha tender o‘tkazgan. Unda biz avvalgi materiallarimizning birida eslab o‘tganimiz: Innovamed va Equimed MChJ “raqobatlashgan”.
Gap shundaki, ular 20-yanvar kuni ham Nurafshon shahar tibbiyot birlashmasi o‘tkazgan 500 million so‘mlik tenderda qatnashgan va aslida bir-biriga aloqador korxonalar ekani aniqlangandi.
G‘olib Innovamed’ning rahbari Utkurov Ibrohim Rustam o‘g‘li bo‘lib, u bir vaqtning o‘zida boshqa — Time Ex Logistics MChJning ham ta’sischilaridan biri hisoblanadi.
O‘z navbatida, Time Ex Logistics MChJning yana ikkita ta’sischisi bor. Biri rahbar ham hisoblangan Abdulaziz Sarvar Sanjar o‘g‘li, ikkinchisi esa Farmonov Azamat Raxmat o‘g‘li.
Farmonov Azamat esa tenderda Innovamed’ga raqobat taklif qilgan Equimed’ning rahbari hisoblanadi.
Nazorat qiluvchi organlarning vaziyatga yetarli darajada e’tibor qaratmagani ortidan ushbu shaxslar kamida ikkinchi bor tenderlarni soxtalashtirmoqda.
”Allo? Uzr, adashib raqobatchiga tushibman”
Bunisi endi klassika! Samarqand viloyati Payariq tumani hokimligi Obodonlashtirish boshqarmasi xodimlar uchun maxsus forma tayyorlash bo‘yicha umumiy qiymati 28 million 400 ming so‘mlik 2 ta tender o‘tkazgan. Unda “Burgut LYX” va ”Superstar M” MChJlar raqobatlashgan va yakunda “Burgut LYX” tenderni yutib olgan.
Tender qatnashchilarining rahbariyati bilan tanishish jarayonida qiziq holatga duch keldik:
Rahmatov Mehriddin va Mamatov Sharofiddin tenderni soxtalashtirishda deyarli xatosiz ishlashgan. Na korxona ta’sischilari orasida o‘xshashlik bor, na yuqoridagilar kabi e-mail yoki manzil sotib qo‘ymaydi. Ammo bir qarashda shubhali jihat yo‘qdek tuyulgan vaziyatda ikkala korxonaning aloqa telefon raqamlari bir xil ekani pand berib qo‘ymoqda. Attang...
Komissiya a’zolariga esa har doimgidek farqi yo‘q: ular bir ovozdan rozi!
Mas’ullardan ushbu shubhali tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.
-
Samarqand kardiologiya dispanseri 620 mln so‘mlik tender o‘tkazdi. Unda bir tadbirkorga tegishli ikkita MCHJ “raqobatlashgan”
20 yanvar, 15:26 -
O‘zini o‘zi yenggan tadbirkor, qarindoshiga yordamlashgan hakam, tugatilgan korxonaning ishtiroki — 20-yanvardagi shubhali tenderlar
20 yanvar, 20:30 -
“Yangi yil sovg‘asi”, bir xil familiyali raqobatchilar, soxtalashtirilgan savdo — 23-yanvardagi qiziqarli tenderlar
23 yanvar, 20:54
