Farg‘ona viloyati hokimi Xayrullo Bozorov viloyatning Quvasoy shahridagi barcha bog‘chalarga tayyor ovqat yetkazib berish huquqini hech qanday tanlov yoki tendersiz tadbirkorga tuhfa qildi. Hokimning bu haqdagi qarori jamoatchilikdan yashirilgan. Bu haqda Telegram’dagi Generalissimus kanali yozmoqda.
Kanal muallifining ma’lumot berishicha, qonunchilikka asosan davlat maktabgacha ta’lim tashkilotlarida tadbirkorlar tomonidan sog‘lom ovqatlantirishni tashkil etish — Maktabgacha va maktab ta’lim vazirligi tomonidan o‘tkaziladigan tanlov natijalariga ko‘ra tashkil qilinishi kerak.
Farg‘ona viloyati hokimi o‘z qaroriga asosan Quvasoy shahridagi davlat maktabgacha ta’lim tashkilotlarida tarbiyalanuvchilarni keytering (tayyor ovqat yetkazib berish) usulida ovqatlantirishni tanlov yoki tender o‘tkazmasdan bir korxonaga o‘tkazib berdi. Va eng asosiysi, bu qaror “Ushbu hujjat mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi tufayli yashirilgan” vaji bilan ommadan yashirib qo‘yilgan. Lekin qarorda shaxsga doir ham, vasiylik va homiylikka oid ham, foydalanilishi cheklangan axborot ham mavjud emas, deyiladi bu haqdagi xabarda.
Xabar muallifi, shuningdek, hokim tuhfasiga erishgan Garden catering trade MCHJ rahbari va hokim familiyasi bir xil ekaniga e’tibor qaratgan.
Balki tasodifdir, qarindoshmasdir, deydi u.
“Daryo” jurnalisti hokimning ushbu harakatiga izoh olish maqsadida viloyat hokimligi axborot xizmati rahbari Dilmurod Jumaboyev bilan bog‘landi. Savolni eshitgan mas’ul “Hozir nima haqida gapirayotganingizni bilish uchun o‘sha Telegram kanaliga kirib, xabarni o‘qib, birozdan so‘ng qo‘ng‘iroq qilaman va ma’lumot beraman”, dedi. Biroq aytilgan fursatda na o‘zi qo‘ng‘iroq qildi, na qilingan qo‘ng‘iroqqa javob qaytardi.
“Daryo” viloyat hokimligi axborot xizmatiga minbar berishga tayyorligini ma’lum qiladi.
Izoh (0)