Jim Kerri 63 yoshda: bolaligi furgonda o‘tgan, farroshlik qilgan, “Oskar”ga hatto nomzodi ham qo‘yilmagan aktyorning ko‘pchilik bilmaydigan mashaqqatli hayoti

Mashhur komik aktyorlaridan biri Jim Kerri 17-yanvar kuni 63 yoshga to‘ldi. “Qudratli Bryus”, “Niqob”, “Beg‘ubor aqlning abadiy quyoshi” filmlari yulduzi bolaligidan har qanday insonni xursand qilish yo‘lini bilgan bo‘lsa-da, o‘zi ko‘p kulavermasdi.

Filmlarini bir necha avlod tomosha qilgan komediya dahosi har doim kulgili yuz ifodalari, havas qilarli tana plastikasi va cheksiz energiya manbayi bilan mashhur bo‘lib, hatto eng ahmoqona filmni ham ajoyib tomoshaga aylantira olgan.

Jim Kerri kambag‘al va katta oilada tug‘ilgan, u oilada to‘rtinchi farzand edi. Aktyorning onasi xonanda bo‘lgan, ammo bolalarini dunyoga keltirganidan keyin ijodini to‘xtatadi. Jim Kerrining otasi esa hisobchi bo‘lib ishlagan, biroq ishdan ketgach, moddiy qiyinchiliklar sabab oilasi bilan furgonda yashashga majbur bo‘ladi.

“16 yoshimda jamiyatning eng past darajasida yashardik. Bola bo‘lsak-da, ishlashga majbur bo‘ldik. Biz oilaviy farroshlarga aylandik — oshxonalarni, uylarni, hojatxonalarni tozalar edik. Men butun dunyodan nafratlanardim, hayot otamga shunday munosabatda bo‘lganidan juda xafa bo‘lganman”, deydi keyinchalik hayoti haqida so‘zlab bergan aktyor.

U oiladagi qiyinchiliklar tufayli maktabni tashlashga majbur bo‘ladi: dars o‘rniga ishga boradi, shu sababli o‘rta ma’lumotni ololmadi.

Jim Kerri bolaligida ham tanishlariga taqlid qilishni yoki qahramonlarni gavdalantirishni yaxshi ko‘rardi. U 15 yoshga to‘lganida otasi mahalliy “Yak-Yak” klubida o‘z sahna asarlarini ijro etish taklifini beradi. Bo‘lajak aktyor olqish o‘rniga kamsitiladi. Keyinchalik Jim o‘sha holat haqida:

“Bu dahshatli edi. Tomoshabinlar ust-boshimga qarab mazax qilishdi. Ular bir og‘iz so‘z aytishimga ham berishmadi: hushtak chalishdi, qichqirishdi, baqirishdi va hatto meni yechintirib, xochga mixlashni talab qilishdi. Kim biladi, qochib ketmaganimda balki, shunday qilishardi ham”, degan.

Birinchi muvaffaqiyatsizliklarga qaramay, komedik aktyor kelajakda yana parodiya yo‘nalishiga qaytadi va hatto bir vaqtlar uning ustidan kulishgan klubda yana chiqish qiladi.

Jim Kerrining karyerasidagi birinchi asosiy rollardan biri Eys Ventura bo‘lgan. Biroq film bunga qadar murakkab yo‘lni bosib o‘tadi: ssenariyga homiy topilmaydi, Amerikadagi eng yaxshi komediyachilar filmda ishtirok etishdan bosh tortadi. Natijada Jim Kerri bosh rolni o‘ynaydi: u qahramonining o‘ziga xos xarakteri va soch turmagini o‘ylab topadi.

Komediya 100 million dollar daromad qilgan, aktyorning mashhurligi keskin oshgan bo‘lsa-da, tanqidchilar loyihani sovuqqonlik bilan qabul qiladi, hatto yangi kashf qilingan yulduzni “Oltin malina” mukofotiga nomzod qilib ko‘rsatishadi. Biroq Jim Kerri hali ham “Eys Ventura: Uy hayvonlari detektivi” filmini o‘z karyerasidagi eng muhim kinokartinalardan biri deb biladi.

Jim Kerri dunyo bo‘ylab tomoshabinlarning muhabbati va olamshumul muvaffaqiyatga erishgan bo‘lishiga qaramay, shaxsiy hayoti havas qilarli emasdi. Aktyor birinchi sevgilisi Melissa Uomer bilan ajrashgandan so‘ng (ular sakkiz yil birga hayot kechirgan), depressiyaga tushib qoladi.

Keyin Loren Xolliga uylanadi, biroq bu nikoh atigi 10 oy davom etadi.

Shundan so‘ng aktyor 2012-yilda Katriona Uayt bilan munosabatlarini ma’lum qiladi, ammo juftlik bir necha oy ichida ajraladi — 3 yildan keyin yana birga bo‘lishga harakat qilishadi. Bu urinish ham muvaffaqiyatli bo‘lmaydi: Katrina Jim bilan oxirgi marta ajrashganidan 5 kun o‘tgach, joniga qasd qiladi. Natijada uning sobiq turmush o‘rtog‘i va onasi Jim Kerrini sudga beradi.

Jim Kerri intervyularning birida “Oskar” mukofotini olishni orzu qilishini aytgan. “Men minnatdorlik nutqim bilan kamera qarshisiga chiqmagunimcha tinmayman. Nima haqda gapirayotganimni tushundingizmi? “Oskar”ni qanday olishimni va uni olish uchun nima qilishim kerakligini bilmayman. Ha, men juda mag‘rurman”, degan Jim Kerri mukofot haqida.

Aktyor kinodagi 50 yillik faoliyati va 70 dan ortiq filmda suratga tushishiga qaramay, jahon miqyosidagi eng nufuzli kino mukofotga nomzodlik ham qila olmadi. Jim Kerri MTV Movie Awards nominatsiyalari (22 ta) va mukofotlar (10 ta) soni bo‘yicha rekordchi hisoblanadi.

Aktyor ishirokidagi eng sara filmlar:

“Truman tomoshasi” (1998)