Chorsu “Ovqat bozori” — Toshkentning eski shahar ruhini o‘zida jamlagan, doimiy shovqin-suroni, tutun va taom hidi bilan yashaydigan jonli maskan. Kirish qismidan kabob tutuni havoga taraladi, peshtaxtalar ortida yillar, baʼzan avlodlar davomida shu yerda ishlagan oshpazlar turadi. Bozor hashamatdan yiroq: quyoshda xiralashgan bannerlar, eskirgan ko‘rpachali stol-stullar bor. Ammo bu yerning asosiy boyligi — taomlar mazasi va samimiy muhit. Palov, somsa, kabob, lag‘mon, sho‘rva, norin va xonim kabi milliy taomlar pishiriladi, har birida yillar davomida sayqal topgan sir va “bir chimdim mehr” bor.
Chorsu “Ovqat bozori” — bu nafaqat ovqatlanish joyi, balki avlodlar osha davom etayotgan oshpazlik maktabidir. Bu yerning doimiy xaridorlari “Aziza opa somsalari”ni juda yaxshi bilishadi. Atayin shaharning turli burchaklaridan bu taʼmni his qilish uchun keladiganlar ham bor. Xo‘sh, bu somsaning mashhurlik siri nimada? “Daryo” ijodkorlari 34 yildan buyon bu brend nomini saqlab kelayotgan Qodirovlar oilasi bilan tanishdi.
Aziza opa kim? Bu savol ko‘pchilikni o‘ylantirsa kerak. Ayni kunlarda ota kasbini davom ettirayotgan kichik tadbirkor Abdulaziz Qodirov unga quyidagicha javob berdi.
— Aziza buvim hozir 74 yoshdalar, endi oilaviy biznesni biz yoshlar davom ettiryapmiz. 1991-yili dadam va amakim somsapazga shogird tushishgan, ustozlarining duosini olib, uyning bir chekkasida tandir qurib, somsa yopishgan. Buvim farzandlariga ko‘maklashish uchun uni bozorga olib chiqib sotgan ekan. Somsaning taʼmi odamlarga manzur bo‘lib, “Ismingiz nima? Sizni bozordagilardan nima deb so‘rasam bo‘ladi?”, deyishgan ekan. Shundan keyin u Aziza opa somsalari deb odamlar orasida tanilgan, deydi Abdulaziz Qodirov.
34 yildan buyon har kuni tandir-tandir somsa sotiladi. Uning narxi ham u qadar arzon emas. Somsaning shu darajada talabgorligining siri nimada?
— Hech qanday siri yo‘q. Hammasi juda oddiy, menimcha, duoda gap ko‘p, deb bilaman. Chunki dadamning aytishicha, ustozlari shu hovlida duo qilgan ekan, shu boisdanmi, bu yerda qilingan somsaning talabgorlari ko‘p bo‘ladi. Tadbirkorlikni rivojlantirish uchun boshqa yerlardan ham somsaxonalar ochmoqchi bo‘ldik, ammo natija kutilganidek bo‘lmadi. Keyin hamisha sarxil go‘sht ishlatamiz, 10 yildan beri bitta qassob bilan ishlaymiz. Yog‘siz, yaxshi pishadigan go‘shtdan olamiz. Xamirlarni oldindan muzlatib qo‘ymaymiz, shu kungacha bunday go‘shtdan ham foydalanganimiz yo‘q, deydi Abdulaziz Qodirov.
Aziza opa somsalarining bir donasi 25 ming so‘m. Uning qimmatligi xo‘randalar eʼtiroziga sabab bo‘lmaganmi?
— To‘g‘ri, qimmat, ammo bu pulning teng yarmi go‘sht olish uchun ketadi. Chunki har bir somsaga 90 gr dan go‘sht solamiz. Bir kilogramm go‘shtni 140 ming so‘mga olsang, undan 10-11 ta somsa chiqadi. Boshqa turdagi somsalarni ham qilib ko‘rdik. Ammo mijozlarimiz go‘shtni sevuvchi insonlar ekan, savdosi u qadar yurishmadi. Kuniga 600 taga yaqin somsani savdoga chiqaramiz. Doimiy mijozlarimiz bor, ularning ko‘pchiligini yoshi katta insonlar tashkil qiladi. Ular shu qadar sodiqki, hatto, ularning taxminiy nechanchi sanada kelishlarini ham bilamiz. Chunki nafaqat pullarini oldik, deb kelishadi. Har oy AQSH va Yevropaga ham muzlatilgan holda jo‘natib beramiz. Telefon qilib, “shu taʼmni sog‘indik”, deydiganlar juda ko‘p, deydi Qodirov.
Suratga olish paytida xorijlik xo‘randalarni ham ko‘rdik. Ko‘z tegmasin, ularning qadami uzilmayapti. Filippin, Tailand, Rossiya, Turkiya eng yaqini qo‘shni Qozog‘istondan kelishibdi. Ular bilan ingliz va rus tilida erkin gaplashayotgan Abdulaziz Qodirov xorijlik mijozlar sabab til o‘rgangani haqida gapirdi.
— “Ovqat bozori” turistik zona desa ham bo‘ladi. Har kuni kelishadi, o‘zbek milliy taomlarini yeyishadi. Savdo qilayotganda ular bilan gaplashish, nafaqat narxi, balki tarkibi haqida ham maʼlumot berish kerak. Shu bois, ingliz tiliga kursiga qatnab, tilni o‘rgandim. Somsa haqida ularning fikri turlicha. Ayrimlarga yoqadi, ayrimlari esa “juda yog‘li ekan”, deyishadi. Chunki xorijliklar qaynatilgan yoki dimlab pishirilgan taomlarni yeyishadi. Yog‘li somsalar ularning oshqozoniga og‘irlik qilishi mumkin, deydi Abdulaziz Qodirov.
Quyidagi havola orqali videoni to‘liq holda tomosha qilishingizni va fikrlaringizni yozib qoldirishingizni so‘raymiz.
Darvoqe, sizda ham bu biznes bilan shug‘ullanish fikri paydo bo‘lgan bo‘lsa, albatta, videoni tomosha qiling. Chunki unda somsadan qanday qilib daromad topish mumkinligi ham aytib o‘tilgan. Biznes g‘oya bor, ozgina g‘ayrat qilsangiz bo‘ldi.
Nargiza Murodova
Izoh (0)