Шоу-бизнес

Жим Керри 63 ёшда: болалиги фургонда ўтган, фаррошлик қилган, “Оскар”га ҳатто номзоди ҳам қўйилмаган актёрнинг кўпчилик билмайдиган машаққатли ҳаёти

Машҳур комик актёрларидан бири Жим Керри 17 январь куни 63 ёшга тўлди. “Қудратли Брюс”, “Ниқоб”, “Беғубор ақлнинг абадий қуёши” фильмлари юлдузи болалигидан ҳар қандай инсонни хурсанд қилиш йўлини билган бўлса-да, ўзи кўп кулавермасди.

Фильмларини бир неча авлод томоша қилган комедия даҳоси ҳар доим кулгили юз ифодалари, ҳавас қиларли тана пластикаси ва чексиз энергия манбайи билан машҳур бўлиб, ҳатто энг аҳмоқона фильмни ҳам ажойиб томошага айлантира олган.

Жим Керри камбағал ва катта оилада туғилган, у оилада тўртинчи фарзанд эди. Актёрнинг онаси хонанда бўлган, аммо болаларини дунёга келтирганидан кейин ижодини тўхтатади. Жим Керрининг отаси эса ҳисобчи бўлиб ишлаган, бироқ ишдан кетгач, моддий қийинчиликлар сабаб оиласи билан фургонда яшашга мажбур бўлади.

“16 ёшимда жамиятнинг энг паст даражасида яшардик. Бола бўлсак-да, ишлашга мажбур бўлдик. Биз оилавий фаррошларга айландик — ошхоналарни, уйларни, ҳожатхоналарни тозалар эдик. Мен бутун дунёдан нафратланардим, ҳаёт отамга шундай муносабатда бўлганидан жуда хафа бўлганман”, дейди кейинчалик ҳаёти ҳақида сўзлаб берган актёр.

У оиладаги қийинчиликлар туфайли мактабни ташлашга мажбур бўлади: дарс ўрнига ишга боради, шу сабабли ўрта маълумотни ололмади.

Жим Керри болалигида ҳам танишларига тақлид қилишни ёки қаҳрамонларни гавдалантиришни яхши кўрарди. У 15 ёшга тўлганида отаси маҳаллий “Як-Як” клубида ўз саҳна асарларини ижро этиш таклифини беради. Бўлажак актёр олқиш ўрнига камситилади. Кейинчалик Жим ўша ҳолат ҳақида:

“Бу даҳшатли эди. Томошабинлар уст-бошимга қараб мазах қилишди. Улар бир оғиз сўз айтишимга ҳам беришмади: ҳуштак чалишди, қичқиришди, бақиришди ва ҳатто мени ечинтириб, хочга михлашни талаб қилишди. Ким билади, қочиб кетмаганимда балки, шундай қилишарди ҳам”, деган.

Биринчи муваффақиятсизликларга қарамай, комедик актёр келажакда яна пародия йўналишига қайтади ва ҳатто бир вақтлар унинг устидан кулишган клубда яна чиқиш қилади.

Жим Керрининг карьерасидаги биринчи асосий роллардан бири Eys Ventura бўлган. Бироқ фильм бунга қадар мураккаб йўлни босиб ўтади: сценарийга ҳомий топилмайди, Америкадаги энг яхши комедиячилар фильмда иштирок этишдан бош тортади. Натижада Жим Керри бош ролни ўйнайди: у қаҳрамонининг ўзига хос характери ва соч турмагини ўйлаб топади.

Комедия 100 миллион доллар даромад қилган, актёрнинг машҳурлиги кескин ошган бўлса-да, танқидчилар лойиҳани совуққонлик билан қабул қилади, ҳатто янги кашф қилинган юлдузни “Олтин малина” мукофотига номзод қилиб кўрсатишади. Бироқ Жим Керри ҳали ҳам “Eys Ventura: Уй ҳайвонлари детективи” фильмини ўз карьерасидаги энг муҳим кинокартиналардан бири деб билади.

Жим Керри дунё бўйлаб томошабинларнинг муҳаббати ва оламшумул муваффақиятга эришган бўлишига қарамай, шахсий ҳаёти ҳавас қиларли эмасди. Актёр биринчи севгилиси Мелисса Уомер билан ажрашгандан сўнг (улар саккиз йил бирга ҳаёт кечирган), депрессияга тушиб қолади.

Кейин Лорен Холлига уйланади, бироқ бу никоҳ атиги 10 ой давом этади.

Шундан сўнг актёр 2012 йилда Катриона Уайт билан муносабатларини маълум қилади, аммо жуфтлик бир неча ой ичида ажралади — 3 йилдан кейин яна бирга бўлишга ҳаракат қилишади. Бу уриниш ҳам муваффақиятли бўлмайди: Катрина Жим билан охирги марта ажрашганидан 5 кун ўтгач, жонига қасд қилади. Натижада унинг собиқ турмуш ўртоғи ва онаси Жим Керрини судга беради.

Жим Керри интервьюларнинг бирида “Оскар” мукофотини олишни орзу қилишини айтган. “Мен миннатдорлик нутқим билан камера қаршисига чиқмагунимча тинмайман. Нима ҳақда гапираётганимни тушундингизми? “Оскар”ни қандай олишимни ва уни олиш учун нима қилишим кераклигини билмайман. Ҳа, мен жуда мағрурман”, деган Жим Керри мукофот ҳақида.

Актёр кинодаги 50 йиллик фаолияти ва 70 дан ортиқ фильмда суратга тушишига қарамай, жаҳон миқёсидаги энг нуфузли кино мукофотга номзодлик ҳам қила олмади. Жим Керри МTV Movie Awards номинациялари (22 та) ва мукофотлар (10 та) сони бўйича рекордчи ҳисобланади.

Актёр иширокидаги энг сара фильмлар:

“Труман томошаси” (1998)