Bugungi kungacha kino ixlosmandlari asosan Gollivud filmlariga ko‘proq e’tibor qaratgan, chunki uzoq yillar davomida faqat xorijiy filmlar munosib loyihalar ustida ishlaydi, deb hisoblangan. Ammo hozirda ushbu nazariya haqiqatdan yiroqdir. Buning isboti tariqasida Qozog‘iston filmlarini misol keltirish mumkin. Qardosh xalq rejissyorlari bir necha yillardan buyon o‘zining yuksak mahoratini ajoyib filmlari orqali namoyon qilib kelmoqda.
“Dastur” (2023)
Muhim ijtimoiy mavzudagi mistik drama
Jamiyatda obro‘-eʼtibor qozongan Nursulton Ko‘pjasarulining qishloqdagi barcha fermer xo‘jaliklari egasi ekani bois, yolg‘iz o‘g‘il Bolatning yomon tarbiyasi tufayli bir nechta muammoga duch keladi. Uning o‘g‘li chekka qishloqlardan birida yashovchi, do‘mbira chaladigan qiz — Diananing e’tiboriga tushishga harakat qiladi. Buning uddasidan chiqolmay, u jahl ustida qizning nomusiga tegadi. Afsuski, Diananing qarshiliklariga qaramay, uning ota-onasi o‘sha shafqatsiz yigitga turmushga beradi. Turmushning ilk kunlaridan boshlab yosh kelinning hayotida dahshatli voqealar sodir bo‘la boshlaydi.
“Dastur” jamoatchilik fikri, eskirgan urf-odatlar va zo‘ravonlik haqidagi dahshatli, dramatik film.
“Chol” (2012)
Ernest Xemingueyning “Chol va dengiz” hikoyasi asosida suratga olingan film
Bosh qahramon o‘zining kichik oilasi va nabiralari bilan hozirgi Qozog‘istonning chekka qismida kun kechiradi. Kunlarning birida oilaning keksa boshlig‘i yaylovga qo‘y haydab ketadi, lekin dashtda adashib qoladi. Uyga yo‘lni izlab, u bir guruh bo‘rilarga duch keladi. Bu vaqtda uning yaqinlari allaqachon yordamga shoshiladi.
Qozoq rejissyori Ermek Tursunovning ushbu filmi turli avlodlar o‘rtasidagi muloqotning ahamiyati haqida hikoya qiladi.
“To‘maris” (2019)
2019-yilda rejissyor Akan Satayev tomonidan suratga olingan bo‘lib, unda massagetlar malikasi To‘maris va ahamoniylar davlati sultoni Kir II Buyuk haqida hikoya qilinadi. Jasur To‘maris yoshligidan ona mehrini bilmaydi va otasidan erta ayriladi. U dushmanlaridan qasos olish va bosqinchilarni mag‘lub etish uchun o‘zida katta kuch topishi kerak bo‘ladi.
Film qadimgi yunon tarixchisi Gerodotning asari asosida yaratilgan.
Izoh (0)