Ukrainaga qarshi urushda qatnashgan kamida 48 ming nafar rossiyalik bedarak yo‘qolgan. Bu haqda Rossiya mudofaa vaziri o‘rinbosari Anna Sivilyeva Davlat Dumasidagi davra suhbatida ma’lum qildi.
Rossiya harbiy xizmatchilarining jasadlarini aniqlash uchun ularning qarindoshlari tomonidan 48 ming DNK testi o‘tkazildi, dedi Sivilyeva.
Uning so‘zlariga ko‘ra, bu odamlarni topish va shaxsini aniqlash uchun qarindoshlaridan DNK “mutlaqo tekin” olinadi.
Davra suhbatida ishtirok etgan Davlat dumasi Mudofaa qo‘mitasi rahbari Andrey Kartapolov deputatlardan bedarak yo‘qolganlar sonini hech qayerda aytmaslikni so‘radi.
“Bu maxfiy va juda nozik maʼlumotlar. Yakuniy hujjatlarni tuzayotganimizda ham, bu raqamlar hech qayerda tarqalmasligi kerak”, dedi u.
Sivileva shundan so‘ng aniqlik kiritishga shoshildi:
“Men bedarak yo‘qolganlarning emas, bizga murojaatlarning sonini berdim. Bu ko‘rsatkich statistika emas, shunchaki so‘rovlardir”.
- Sivilyeva Rossiya prezidenti Vladimir Putinning amakivachchasi va energetika vaziri Sergey Sivilyevning rafiqasi. U AQSH va Yevropa ittifoqining sanksiyalar ro‘yxatiga kiritilgan.
Avvalroq Rossiya viloyatlari Ukrainadagi urushda halok bo‘lgan ishtirokchilarning jasadlarini aniqlash uchun maxsus vositalarni ommaviy ravishda sotib olishni boshlagani ma’lum bo‘lgandi.
“Vyorstka” nashrining qayd etishicha, joriy yilning yanvaridan noyabr oyining o‘rtalariga qadar buning uchun jami 182,9 million rubl (taxm. 2 mln dollar) ajratilgan, bu 2023-yilga nisbatan deyarli ikki baravar ko‘pdir.
Pentagon maʼlumotlariga ko‘ra, noyabr oyiga kelib Rossiyaning Ukrainadagi umumiy yo‘qotishlari 615 ming kishini tashkil etgan: 115 ming kishi halok bo‘lgan va 500 ming kishi jarohatlangan. Iyun oyida Putin Ukraina armiyasining yo‘qotishlarini e’lon qilib, ularni Rossiya bilan solishtirdi. Uning so‘zlariga ko‘ra, 27 oylik urush davomida Rossiya 135 mingga yaqin odamni yo‘qotgan.
Shu bilan birga, Mediazona va BBC qo‘shma tadqiqotida noyabrda urush boshlanganidan beri 80 973 nafar rossiyalik harbiy halok bo‘lganini tasdiqlashga muvaffaq bo‘ldi.
Buyuk Britaniya Mudofaa vazirligi Rossiya armiyasining umumiy yo‘qotishlarini 610 ming kishiga baholagan, ulardan 200 ming kishi halok bo‘lgan va 400 ming kishi jarohatlangan.
Izoh (0)