Rossiya prezidenti Vladimir Putinning Rojdestvo munosabati bilan o‘t ochishni to‘xtatish rejimi haqidagi g‘oyasi unga nisbatan norozilikni kuchaytirdi va tanqidlarga sabab bo‘ldi, deb yozadi Urushni tadqiq qilish instituti (ISW).
Xususan, mutaxassislar qayd etishicha, rossiyalik harbiy, davlat va siyosiy arbob Igor Girkin (Strelkov) Putinning g‘oyasini Rossiya qo‘shinlari “mag‘lubiyati va taslim bo‘lishi yo‘lidagi mardona va qat’iy qadam” deb atadi.
Boshqa taniqli harbiy blogerlar, ISW hisobotida aytilishicha, Kremlni urush boshlagani uchun yana bir bora tanqid qilish uchun Putinning “sulh” haqidagi gaplaridan foydalangan.
Institut taxmin qilishicha, o‘t ochishni to‘xtatish rejimining e’lon qilingani, katta ehtimol bilan, bundan keyin ham axborot makonida Putin bilan o‘zaro manfaatli aloqalarni saqlab turgan shaxslar uchun g‘azab nuqtasi bo‘lib xizmat qiladi.
Shu bilan birga, ayrimlar Putinning bayonotidan foydalanib, u diniy qadriyatlar va odob-axloq himoyachisi, degan mazmundagi gaplarni tarqatishda davom etgan.
Avvalroq Rossiya Mudofaa vazirligi Ukrainani “Rojdestvo sulhi”ni buzganlikda ayblagandi. Ukraina harbiylari 6-yanvar kuni Moskva vaqti bilan soat 12:00 dan boshlab Donetskdagi Rossiya pozitsiyasini uch marta o‘qqa tutgani, Petrovskiy tumaniga jami 155 mm kalibrli o‘nta snaryad uchirgani aytilmoqda.
Rojdestvo sulhi
Rossiya prezidenti Vladimir Putin 6-yanvar soat 12:00 dan 7-yanvar kuni soat 24:00 ga qadar Ukrainadagi barcha to‘qnashuv chizig‘i bo‘ylab o‘t ochishni to‘xtatishni buyurgan. Mazkur qaror pravoslavlarning cherkovga borishi uchun qabul qilingan. Moskva Kiyevni ham o‘t ochishni to‘xtatishga chaqirgan.
Ukraina prezidenti Vladimir Zelenskiy Rossiya Rojdestvo bayramini niqob qilib, rus harbiylariga jihozlar, o‘q-dorilar yetkazib berish, safarbarlarni pozitsiyalarga yaqinlashtirishni ko‘zlaganini aytdi. Prezident ofisi rahbari maslahatchisi Mixail Podolyak Rossiya taklifini ikkiyuzlamachilik deb atadi. U sulhga rozi bo‘lish uchun Rossiya bajarishi kerak bo‘lgan ikkita shartni aytdi.
Ukraina Milliy xavfsizlik va mudofaa kengashi kotibi Aleksey Danilov ham sulh bo‘yicha o‘z fikrini bildirdi. U Rossiya bilan “Rojdestvo sulhi” bo‘yicha hech qanday muzokara olib borilmasligi, “tajovuzkor davlat” Ukraina hududini tark etishi kerakligini aytdi.
Izoh (0)