Qozog‘iston sanksiyalarni qo‘llab-quvvatlamaydi, biroq ularni chetlab o‘tish uchun vositachi davlat sifatida xizmat ko‘rsatishni ham rejalashtirmagan. Bu haqda bosh vazir o‘rinbosari Serik Jumangarin ma’lum qildi.
Jumangarinning so‘zlariga ko‘ra, sanksiyalar bosimi tufayli Qozog‘iston iqtisodiyotiga zarar yetishi mumkin. Mamlakat o‘zining ishlab chiqarishiga ziyon keltirishni xohlamaydi.
Gap shundaki, bizda ishlab chiqarilayotgan va sanksiyalar chizig‘iga tushib qoladigan ayrim mahsulotlar mavjud. Biz bu tovarlarga nisbatan hech qanday cheklovlar joriy qilmoqchi emasmiz, chunki ularning ortida katta mehnat jamoalari, ba’zan esa ishlab chiqarish korxonalari joylashgan butun monoshaharlar turibdi. Shuning uchun bu masala juda muhim ahamiyatga ega, deya tushuntirdi u.
Shuningdek, Jumangarin Qozog‘iston sanksiyani chetlab o‘tish uchun vositachi davlat sifatida harakat qilmasligini aytdi. U avvalroq mamlakat Rossiyaga qarshi sanksiyalarga, ayniqsa, ular Qozog‘iston kompaniyalari manfaatlariga daxl qilsa, “ko‘r-ko‘rona” rioya qilmasligini ta’kidlagandi.
Savdo ishlab chiqaruvchilarimiz uchun taqiqlanishiga yo‘l qo‘ymaymiz, degan u.
Jumangarinning tushuntirishicha, Qozog‘iston baribir asosiy cheklovlarga rioya qilishda davom etadi, chunki u G‘arbning to‘g‘ridan to‘g‘ri sanksiyalarini “ko‘tara olmaydi”.
Qozog‘iston Rossiyaga qarshi xalqaro sanksiyalarga ochiqchasiga qo‘shilmadi, ammo savdo cheklovlarining aksariyatiga rioya qilishga harakat qildi, deb yozmoqda Bloomberg. Shunga qaramay, Qozog‘istonning ayrim kompaniyalari G‘arb davlatlari sanksiyalari ostida qoldi. Shundan so‘ng ularning kamida bir qismi yopilish jarayonida bo‘ldi.
Rossiya prezidenti Vladimir Putin noyabr oyi oxirida Qozog‘istonga tashrif buyurganida Ostonani mamlakatlar o‘rtasidagi munosabatlarni izdan chiqarishi mumkin bo‘lgan qadamlardan ogohlantirgandi. Respublika prezidenti Qosim-Jo‘mart To‘qayev o‘z mamlakatini Rossiyaning ishonchli strategik hamkori sifatida ta’riflagan.
Izoh (0)