Ukraina prezidenti Vladimir Zelenskiy ofisi maslahatchisi Mixail Podolyak Qrim ko‘prigidagi portlashga munosabat bildirdi. Bu haqda u Twitter’dagi sahifasida ma’lum qildi.
“Rossiyaning ommaviy qotillik qurollarini yetkazib berish uchun foydalanilgan barcha noqonuniy tuzilmalarni vayron qilish sabablaridan qat’i nazar, ular qisqa muddatli”, — degan Podolyak.
Ukraina xavfsizlik xizmati (UXX) esa “Putin rejimining timsollaridan biri yana qanday qilib harbiy yuklarga bardosh bera olmaganini qiziqish bilan kuzatayotgani”ni bildirdi. UXX zaxirasidagi general-mayor Viktor Yagun Qrim ko‘prigi butunlay vayron bo‘lsa yoki qisman buzilgan bo‘lsa, u holda rus harbiylari Ukrainaning bir qator bosib olingan hududlarini tark etishini aytdi.
U bunday ssenariy asosida Xerson va Zaporojye viloyatlarini tezda ozod qilish ehtimoli sezilarli darajada oshishi, chunki Rossiya bu yo‘nalishni zaxira va o‘q-dorilarni to‘ldirish uchun ishlatishini ilgari surdi.
Qrim ko‘prigidagi portlash
17-iyulga o‘tar kechasi Qrim ko‘prigida portlash sodir bo‘ldi. Rossiya rasmiylarining da’vo qilishicha, Ukrainaning yerusti dronlari ko‘prikka hujum qilgan, oqibatda ikki kishi halok bo‘lgan, 14 yoshli bola jarohatlangan.
Rossiya Tergov qo‘mitasi “Terakt” moddasi bo‘yicha ish qo‘zg‘atgan, Ukraina maxsus xizmatlari portlashni uyushtirganlikda gumon qilinmoqda. Ukraina OAV manbalarining aytishicha, buning ortida Ukraina Xavfsizlik xizmati va Ukraina dengiz floti turibdi. UXX portlash haqida batafsil ma’lumotni “Ukrainaning urushdagi g‘alabasidan keyin” berishini aytgan.
Rossiya prezidentining matbuot kotibi Dmitriy Peskov Rossiyaning barcha tegishli xizmatlari va idoralari Qrim ko‘prigidagi portlashdan so‘ng ehtimoliy yangi hujumlarga tayyor ekanini aytgan. U “maxsus harbiy operatsiya”ning maqsadlari orasida Qrim ko‘prigidagi portlashga javob ham bo‘lishini bildirgan.
Izoh (0)