Amerika Urushni o‘rganish instituti (ISW) o‘z kundalik sharhida Vladimir Putinning Rossiya go‘yoki Ukrainadagi urushni imkon qadar tezroq tugatishni xohlayotgani, ammo “behuda yo‘qotishlar”ning oldini olish uchun jangovar harakatlar sur’atini kuchaytirmoqchi emasligi haqidagi so‘nggi bayonotlariga e’tibor qaratdi.
ISW tahlilchilarining fikricha, bu bayonotlar Rossiyaning noreal maqsadlariga erishish uchun tobora ko‘proq qurbon berishga majbur bo‘layotgan mahalliy rus auditoriyasiga Putinning qimmatga tushgan urushini oqlash bo‘yicha Kreml sa’y-harakatlarining bir qismi.
Ta’kidlanishicha, Rossiya harbiylari 3-iyul kuni Lisichansk boy berilganidan buyon Ukrainada hech qanday muhim g‘alabaga erishmagan. Putin va Mudofaa vazirligi rasmiylari so‘nggi kunlarda harbiy muvaffaqiyatsizliklar uchun bir necha bor noaniq bahonalar keltirdi.
Putin mas’uliyatni to‘nkamoqchi bo‘lganlardan biri — Rossiya Qurolli kuchlari Bosh shtabi boshlig‘i Valeriy Gerasimov, deydi ISW mutaxassislari. U yaqinda uzoq tanaffusdan so‘ng birinchi marta televizorda ko‘rsatilgan.
“Kreml qariyb o‘n oy davomida Gerasimovni ommaga ko‘rsatmadi”, — deyiladi xabarda. Bosh shtab rahbarining jamoat oldida paydo bo‘lishi, ISW ma’lumotlariga ko‘ra, uni “ushbu urush uchun mas’ul bo‘lgan navbatdagi shaxs” sifatida ko‘rsatishga urinishlar bilan bog‘liq bo‘lishi mumkin.
Putin Ukrainadagi harbiy muvaffaqiyatsizliklar uchun javobgarlikni o‘zidan soqit qilmoqchiligi haqida avval Britaniya razvedkasi ham xabar bergandi.
Mavzuga doir:
Izoh (0)