Daryo” nashri 16-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiyaning Ukrainaga aralash hujumidan maqsadlari
16-fevralga o‘tar kechasi Rossiya Ukrainaga raketa va uchuvchisiz uchoqlar yordamida “aralash hujum” uyushtirdi. Bu haqda Ukrainaning “Janub” Qurolli kuchlari operativ qo‘mondonligi matbuot kotibi Natalya Gumenyuk ma’lum qildi.
Xususan, Gumenyakning so‘zlariga ko‘ra, rus qo‘shinlari sakkizta “Kalibr” raketasini uchirgan. Barcha raketalar — oltitasi Nikolayev viloyati, ikkitasi Xerson viloyati ustida urib tushirilgan.
“Afsuski, shu bilan bir qatorda dushman mag‘lubiyatning boshqa usullarini ham qo‘lladi – bu aralash hujum edi, xususan, dron va strategik samolyotlar yordamida amalga oshirildi. Lvov viloyatida zarbalar ayrim nishonlarga teggan”, — dedi u.
Ukraina prezident ofisining rahbari Andrey Yermak Rossiya qo‘shinlari “taktikasini biroz o‘zgartirganini” aytdi. “Ular soxta nishonlardan foydalangan holda faol razvedka ishlarini olib bormoqda”, — deb yozgan Yermak Telegram’da.
Yermakning so‘zlariga ko‘ra, hujumdan boshqa hududlar ham jabr ko‘rgan. Xususan “Ukrainaning shimoli, g‘arbiy qismi, shuningdek, Dneprbo‘yi va Kirovograd viloyatlariga zarbalar berilgan.
Ukrainadagi bosqinda to‘g‘ridan to‘g‘ri ishtirok etmayotgan Belarus. Lukashenko Putin bilan uchrashadi
Minsk agar Belarusga qarshi tajovuz sodir etilsagina harbiy harakatlarda qatnashishga tayyor. Bu haqda 16-fevral kuni respublika prezidenti Aleksandr Lukashenko jurnalistlar bilan uchrashuvda aytib o‘tdi.
“Men hozircha faqat bir holatda rossiyaliklar bilan birga Belarus hududidan turib jang qilishga tayyorman: agar u yerdan (Ukrainadan) bir nafar bo‘lsa ham askar mening xalqimni o‘ldirish uchun Belarus hududiga qadam bossa. Agar ular Belarusga qarshi tajovuz qilsa, javob eng og‘ir bo‘ladi, urush esa butunlay boshqacha tus oladi”, — dedi Lukashenko.
Uning aniqlik kiritishicha, bu shart nafaqat Ukrainaga, balki “boshqa qo‘shnilarga” ham tegishli.
Belarus Rossiyaning Ukrainadagi bosqiniga to‘g‘ridan to‘g‘ri ishtirok etmayapti, Belarus armiyasi Ukraina hududiga kirmagan. Urushni tadqiq qilish instituti (ISW) tahlilchilari xulosasiga ko‘ra, Aleksandr Lukashenko, katta ehtimol bilan, Rossiya prezidenti Vladimir Putinning Ukrainadagi urushda qatnashish taklifini rad etgan.
Shuningdek, jurnalistlar bilan uchrashuvda Lukashenko ertaga, 17-fevral kuni Putin bilan uchrashishini ma’lum qildi.
Janubiy Koreya o‘zining rasmiy hujjatida Shimoliy Koreyani dushman deb atadi, Yaponiya bilan qadriyatlar birlashtiriladimi?
Janubiy Koreya Mudofaa vazirligi 2022-yilgi mudofaa bo‘yicha Oq kitobida Shimoliy Koreya rejimi va harbiy kuchlarini so‘nggi olti yil ichida birinchi marta “dushman” deb atadi. Bu haqda Yonhap agentligi xabar beradi.
“Chunki Shimol hukmron partiya Markaziy qo‘mitasining 2022-yil dekabrida bo‘lib o‘tgan yalpi majlisida bizni shubhasiz dushman deb belgilagan va o‘z yadroviy dasturidan voz kechmagan holda harbiy tahdid tug‘dirishda davom etmoqda, Shimoliy Koreya rejimi va harbiylari — bu tahdid ijrochilari — bizning dushmanlarimizdir”, — deya hujjatdan iqtibos keltirgan agentlik.
Shimoliy Koreya armiyasi birinchi marta 1995-yilda Janubiy Koreya mudofaa siyosati hujjatida “dushman” deb belgilangandi. 2004-yilgi versiyada “dushman” iborasi, murosa fonida “to‘g‘ridan to‘g‘ri harbiy tahdid” bilan almashtirildi.
Keyinchalik 2018 va 2020-yillarda Shimol bilan yarashishga intilgan prezident Mun Chje In davrida bu nom rasmiy qaydlardan olib tashlangan edi. Oq kitob Janubiy Koreya Milliy Mudofaa vazirligining rasmiy hujjatidir. U har ikki yilda bir marta nashr etiladi va mamlakatning harbiy siyosati haqidagi ma’lumotlarni o‘z ichiga oladi.
Oq kitobda Yaponiya 2018-yildan beri birinchi marta “yaqin qo‘shni” nomini oldi. “Koreya Respublikasi va Yaponiya qadriyatlarni birlashtirmoqda.
Dovondagi qor ko‘chkisi bo‘yicha rasmiy ma‘lumot berildi
Qamchiq dovonida qor ko‘chkisi sodir bo‘lgani haqida xabarlar tarqaldi. Favqulodda vaziyatlar vazirligi axborot xizmati holat yuzasidan maʼlumot berdi.
Xabarga ko‘ra, voqea Toshkent–O‘sh xalqaro avtomobil yo‘lining Qamchiq dovoniga to‘g‘ri keladigan qismida sodir bo‘lgan.
15-fevral kuni soat 22:40 da yo‘nalishning yuqorida aytilgan qismida hajmi 1300 metr kub bo‘lgan qor ko‘chkisi sodir bo‘ldi. Qor massasining bir qismi yo‘lga tushgan.
Qayd etilishicha, ushbu hodisa natijasida hech kim jabrlanmagan. Voqea joyiga zudlik bilan yetib kelgan Favqulodda vaziyatlar vazirligi xodimlari yo‘lni qor massasidan tozalashgan.
Favqulodda vaziyatlar vazirligi axborot xizmati dovon yopilgani sababli Ohangaron—Angren—Andijon qo‘shimcha temiryo‘l reysi amalga oshirilganini maʼlum qildi.
Izoh (0)