Shimoliy Koreya yetakchisi Kim Chen In sentabr oyida Rossiyaga tashrif buyurib, Vladimir Putin bilan muzokaralar o‘tkazish niyatida, deb xabar bermoqda The New York Times gazetasi AQSH rasmiylariga tayanib.
Gazeta suhbatdoshlariga ko‘ra, KXDR va Rossiya rahbarlari 10—13-sentabr kunlari Vladivostokdagi Uzoq Sharq federal universiteti kampusida bo‘lib o‘tadigan Sharqiy iqtisodiy forumda ishtirok etadi.
Kim Chen In Pxenyandan Rossiyaga o‘zining zirhli poyezdida kelishi kutilmoqda. Manbalar Shimoliy Koreya yetakchisi Moskvaga ham tashrif buyurishi mumkinligini istisno etmagan.
Muzokaralar davomida tomonlar KXDRdan artilleriya snaryadlari va tankka qarshi raketalarni yetkazib berish masalasini muhokama qilishni rejalashtirgan. O‘z navbatida, Kim Chen In Rossiya Shimoliy Koreyani oziq-ovqat hamda sunʼiy yo‘ldoshlar va yadroviy suvosti kemalari uchun ilg‘or texnologiyalar bilan taʼminlashiga umid qilmoqda, deydi AQSH rasmiylari.
Amerika razvedkasi Rossiya va Shimoliy Koreya Ukrainadagi urushda rus harbiylari qo‘llaydigan qurol-yarog‘larni yetkazib berish bo‘yicha faol muzokaralar olib borayotgani haqida bir necha bor xabar bergandi. Iyul oyida Rossiya mudofaa vaziri Sergey Shoygu Shimoliy Koreyaga rasmiy tashrif bilan bordi. AQSH razvedkasi ushbu safarni muzokaralarga tayyorgarlik sifatida baholadi.
Izoh (0)