Rossiya prezidenti matbuot kotibi Dmitriy Peskov Odessadagi port infratuzilmasi obyektlariga tungi hujum Qrim ko‘prigi uchun javob zarbalari ekanini aytdi. Bu haqda “Gazeta.ru” xabar berdi.
18-iyulga o‘tar kechasi Ukraina harbiylari Odessa osmonida Rossiyaning 6 ta “Kalibr” raketasini, shuningdek, Odessa va Nikolayev viloyatlarida 25 ta Shahed kamikadze dronlarini urib tushirgandi.
Peskov o‘z bayonotida uchuvchisiz katerlar yordamida Rossiyaga “qarshi hujum uchun tayyorlanayotgan obyektlarga” va Odessada ushbu katerlar ishlab chiqarilgan joylarga zarba berilganini aytdi. Shuningdek, Nikolayev va Odessa viloyatlarida 70 ming tonnaga yaqin yoqilg‘i saqlangan omborlar vayron bo‘lgani ta’kidlanmoqda.
Odessa viloyati ma’muriyati rahbari Oleg Kiperning aytishicha, Odessada urib tushirilgan raketalarning bo‘laklari port infratuzilmasi obyektlari va bir nechta xususiy uylarga zarar yetkazgan. Ulardan birida tinch fuqaro jarohatlangan.
Ukraina prezidenti ofisi rahbari Andrey Yermak Rossiyaning Ukraina janubiy viloyatlariga hujumini Ukraina donini eksport qilishiga xalal berishga urinish deb baholadi.
“Rossiyaning Odessa va Nikolayevga raketalar va dronlar yordamida amalga oshirgan tungi hujumi terrorchi mamlakatning Ukraina oziq-ovqat eksportiga qaram bo‘lgan turli mamlakatlardagi 400 million kishining hayotini xavf ostiga qo‘ymoqchi ekaniga yana bir dalilidir”, — dedi u o‘zining Telegram-kanalida.
Qrim ko‘prigida portlash
17-iyul tongda Qrim ko‘prigida portlash sodir bo'ldi, oqibatda yo‘lning bir qismi suvga tushib ketdi. Portlash oqibatida ikki nafar rossiyalik halok bo‘lgan.
Ba’zi OAV manbalarga tayanib, bu Ukraina xavfsizlik xizmati (UXX) va Ukraina harbiy-dengiz kuchlari tomonidan amalga oshirilgan maxsus operatsiya bo‘lganini xabar qildi, biroq UXX ko‘prikdagi ushbu hujum tafsilotlariga aniqlik kiritmadi.
Kreml munosabati
Rossiya prezidentining matbuot kotibi Dmitriy Peskov Rossiyaning barcha tegishli xizmatlari va idoralari Qrim ko‘prigidagi portlashdan so‘ng ehtimoliy yangi hujumlarga tayyor ekanini aytdi. U “maxsus harbiy operatsiya”ning maqsadlari orasida Qrim ko‘prigidagi portlashga javob ham bo‘lishini ta’kidladi.
“Biz bu terakt sabablari va uning ortida kimlar turganini bilamiz. Bu bizdan yanada sovuqqonlik, qo‘shimcha chora-tadbirlar va qo‘shimcha mehnat talab qiladi”, — dedi Peskov.
Putin munosabati
Rossiya prezidenti voqeani “Kiyev rejimining terrorchilik harakati” va “ma’nosiz jinoyat” deb atadi va Qrim ko‘prigidan harbiy transport uchun “uzoq vaqtdan beri foydalanilmayotganini” qo‘shimcha qildi.
“Albatta, Rossiyadan javob bo‘ladi. Mudofaa vazirligi tegishli takliflarni tayyorlamoqda”, — dedi Putin.
Izoh (0)