“Daryo kundaligi”da 28-mart kuni sodir bo‘lgan eng muhim voqealar
“Daryo” nashri 28-martda O‘zbekiston va jahonda sodir bo‘lgan eng muhim voqealarni eʼtiboringizga havola etadi.
Armaniston Putinni hibsga olish qaroriga qo‘shildimi?
17-mart kuni Xalqaro jinoiy sud Rossiya prezidenti Vladimir Putinni Ukrainadagi harbiy jinoyatlarda ayblab, hibsga olishga order berdi.
24-mart kuni Armaniston Konstitutsiyaviy sudi Rim statuti mamlakat asosiy qonuniga zid emasligi haqidagi qarorini e’lon qildi. Bu degani, agar Yerevan Rim statutini ratifikatsiya qilsa, mamlakat rasmiylari Putin Armanistonga kelgan taqdirda, uni hibsga olishga majbur bo‘ladi.
Ayni vaziyatda Rossiya tomoni o‘zi tan olmaydigan Xalqaro jinoiy sudga nisbatan Armanistonning munosabatini nomaqbul deb hisobladi va Armanistonni Rim statutiga qo‘shilgan taqdirda ikki tomonlama munosabatlarda “o‘ta salbiy” oqibatlarga duch kelishidan ogohlantirgan.
Aslida Armaniston 2022-yil oxirida Rim statutini tan olish uchun Konstitutsiyaviy sudga murojaat qilgan. Buning sababi Ozarbayjonni Tog‘li Qorabog‘ bo‘yicha ikki tomonlama mojaro paytida sodir etilgan “jinoyatlar” uchun javobgarlikka tortish edi.
Ukraina Belarusni kuzatmoqda, u Rossiya tomonidan hujumga o‘tishi mumkin
Ukraina Davlat chegara xizmati spikeri Belarusdagi rus harbiylari soni kamayganini ma’lum qildi.
Hozir Belarus hududida 4 000 ga yaqin rossiyalik harbiy xizmatchi qoldi, biroq Belarus Rossiya bo‘linmalari uchun quruqlik va havo hududini berishda davom etmoqda.
Bu kamayish Rossiyaning Belarusdan tayyorlangan harbiy bo‘linmalarini olib chiqib ketgani va ular Rossiyadan Ukraina sharqiga joylashtirilayotgani bilan izohlandi.
25-mart kuni Rossiya prezidenti Putin Belarus hududida taktik yadro qurollari joylashtirilishini ma’lum qilgandi. Belarus rahbari Aleksandr Lukashenko agar Ukraina Buyuk Britaniyadan uranga boyitilgan snaryadlarni qabul qilsa, “dahshatli javob” bo‘lishini aytdi. Ukraina Qurolli kuchlari bosh shtabi Rossiya armiyasining Belarusdan hujum qilish xavfi bir yilgacha davom etishini bildirgan.
Iroqda urush olib borish haqidagi ruxsatnoma bekor qilinadi
AQSH Senati Iroqda jang olib borish uchun 1991 va 2002-yillarda qabul qilingan ruxsatnomalarni bekor qilish to‘g‘risidagi qonun loyihasini ma’qulladi. Bu haqda Reuters xabar bermoqda.
Kongress a’zolari ko‘p yillar davomida qonunchilar prezidentlarga harbiy xizmatchilarni urushga jo‘natish bo‘yicha haddan tashqari ko‘p vakolat berayotgani haqida bahslashib keladi. Yangi qonun loyihasi prezidentning harbiy vakolatlarini cheklash va konstitutsiyada ko‘rsatilgan holatlarda harbiy harakatlar boshlashni ma’qullash bo‘yicha Kongressning mutlaq huquqini tasdiqlashga mo‘ljallangan.
AQSHning Iroqdagi harbiy missiyasi yoki Iroq urushi 2003-yilda boshlangan. Vashington qo‘shin kiritilishini Saddam Husayn hukumati ommaviy qirg‘in qurollarini ishlab chiqarmoqda, degan taxmin bilan oqlagan va harbiylarni rejimni ag‘darishga chaqirgan. Mamlakatda eng ko‘p harbiy xizmatchilar 2008-yilda joylashtirilgan — prezident kichik Jorj Bush qaroriga binoan u yerga deyarli 158 ming kishi yuborilgan.
2011-yilda operatsiya tugagan deb e’lon qilindi va AQSHning keyingi prezidenti Barak Obama ko‘rsatmasiga ko‘ra, amerikalik harbiylarning aksariyati mamlakatni tark etdi.
O‘zbekistonda fevral oyida aniqlangan noqonuniy davlat xaridlari 25 mlrd so‘mga yetdi
O‘zbekistonda 2023-yilning fevral oyida 25 mlrd so‘mlik noqonuniy davlat xaridlari aniqlandi. Fevral oyida o‘tkazilgan tahlil natijalariga ko‘ra, vazirlik va idoralar tomonidan mazkur oyda jami 4,35 trillion so‘mlik 77 411 ta davlat xaridi amalga oshirilgan.
Korrupsiyaga qarshi kurashish agentligi qayd etishicha, o‘rganishlarda ayrim davlat buyurtmachilari tomonidan davlat xaridlarini amalga oshirishda qonunbuzilish holatlari aniqlanmoqda.
Bunday holatlar Uzbekistan Airports AJ buyurtmachiligida, “Hududiy elektr tarmoqlari” AJ Xorazm hududiy filiali buyurtmachiligida aniqlandi.
Mazkur holatlarda xarid komissiyasi tomonidan o‘zaro affillangan ishtirokchilar xarid qilish tartib-taomillarida ishtirok etishdan chetlatilmasdan, “Davlat xaridlari to‘g‘risida”gi qonunning 23-moddasi va “Raqobat to‘g‘risida”gi qonunning 14-moddasi talablari buzilgan.
Agentlik tomonidan kiritilgan taqdimnoma va so‘rovnomalar natijasida 12 ta davlat xaridi bekor qilingan hamda 7 ta maʼmuriy ish qo‘zg‘atilgan.
