Rossiya armiyasi Ukrainadagi urushda logistika bilan bog‘liq muammolarga duch kelganidan tashqari, oziq-ovqat, xarita, zarur tibbiy buyumlarga ega emasdi. Harbiylar ba’zi qurollardan foydalanish bo‘yicha ko‘rsatmalarni topish uchun Wikipedia’ga murojaat qilgan. The New York Times rus harbiylari urushga qanday jo‘natilgani haqida maqola e‘lon qildi.
Nashrga Rossiya qurolli kuchlarining 155-dengiz piyodalari brigadasi askarlari eski qurollar, xususan, 1970-yillardagi Kalashnikov avtomatlari bilan qurollangani keltiriladi. Kam tajribali armiyaga yollanganlar qurollardan qanday qilib to‘g‘ri foydalanish bo‘yicha Internetdan ma’lumot qidirgan.
Askarlar mamlakat bo‘ylab harakatlanish uchun eski xaritalarga tayangan, ba’zi xaritalar 1960-yillarniki bo‘lgan, harbiylarning ko‘pi mobil telefonlar orqali Rossiyadagi raqamlarga qo‘ng‘iroq qilgan. Bu esa Ukraina kuchlariga ularning joylashuvini aniqlash va hujum qilish imkonini bergan.
Dastlab bo‘linma komandirlari o‘z qo‘l ostidagilarga jangni ko‘rmasliklarini aytgan. Ammo askarlar o'z safdoshlari atrofida qanday qilib o‘ldirilayotganini ko‘rganida, ularga to‘liq haqiqat aytilmaganini tushungan. Oktabr oyida Ukrainaning Pavlovka shahri yaqinida ko‘plab safdoshlarining o‘limiga guvoh bo‘lgan Mixail ismli rus askari jurnalistlarga o‘z vzvodidagi 60 nafar askardan 40 nafari halok bo‘lgani, faqat sakkiz nafari og‘ir jarohatlardan qutulib qolganini aytgan.
“Bu urush emas. Bu rus xalqini o‘z qo‘mondonlari tomonidan yo‘q qilinishi”, — deydi u.
Nashr jurnalistlari Putin fevral oyi oxirida Ukrainaga bostirib kirishi bilan mamlakat armiyasiga yuqori darajada ishonch bildirganini yozadi. Rossiya harbiy rahbarlari Ukrainani tezda nazoratiga olishini kutgan va ofitserlarga Kiyevdagi harbiy paradlar uchun liboslar va medallar olib kelish buyurilgan. Biroq, Kreml rejasi amalga oshmagan.
Mavzuga doir:
Izoh (0)