Migrantlar Rossiyada ishlab topgan mablag‘larini o‘z vatanlariga jo‘natayotgani sababli dollar kursini sun’iy ravishda rag‘batlantirmoqda. Bu haqda Rossiya Kommunistik partiyasi deputati Mixail Matveyev xabar berdi.
Rossiyada mehnat qilayotgan millionlab migrantlar har yili topgan mablag‘larini vatanlariga yubormoqda. Bu o‘tkazmalar bo‘yicha aniq ma’lumotlar bir necha yildan buyon yashirib kelinmoqda, biroq mavjud axborot o‘nlab milliard dollar miqdoridagi mablag‘ haqida so‘z borayotganini ko‘rsatmoqda, dedi Matveyev.
Uning so‘zlariga ko‘ra, 2023-yilda Rossiyadan Tojikistonga pul o‘tkazmalari hajmi 5,7 milliard dollarni tashkil etdi, bu mamlakat yalpi ichki mahsulotining taxminan yarmiga teng. Rossiyadan Qirg‘izistonga uning yalpi ichki mahsulotining qariyb uchdan bir qismiga teng bo‘lgan mablag‘, O‘zbekistonga esa YIMning 12-15 foizini (14,5 milliard dollardan ortiq) tashkil etuvchi pul mablag‘lari jo‘natilgan.
Yana Gruziya (2 milliard dollardan ortiq o‘tkazmalar), Armaniston (3 milliard dollardan ortiq), Qozog‘iston va boshqalar ham bor. Boshqacha aytganda, migrantlar va ularning Rossiyadagi diasporalari valyutaga bo‘lgan talabni va kurs o‘sishini sun’iy ravishda rag‘batlantirib, har yili banklarimizdan o‘nlab milliard dollarlik valyuta sotib olmoqda, dedi deputat.
Shuningdek, u “MDHning ko‘plab do‘st davlatlari Rossiya banklariga qarshi sanksiyalar joriy qilgani va MIR kartalari bilan ishlashdan bosh tortgani, bu esa ushbu davlatlarga Rossiyadan rubl o‘tkazmalarini qiyinlashtirgani”ni aytdi.
Bu migrantlarni Rossiyadan naqd valyutani olib chiqishga majbur qilmoqda, natijada rubl kursiga bo‘lgan bosim kuchaymoqda, deya qo‘shimcha qildi parlament a’zosi.
Putin rubl qulashi sababini boshqacha izohlamoqda
Rossiya prezidenti Vladimir Putin rublning qadrsizlanishi inflyatsiya darajasining oshishi bilan bog‘liqligini aytgan.
Rubl kursi bilan bog‘liq vaziyat nazorat ostida va vahima uchun hech qanday asos yo‘q, degan Putin.
U valyuta qiymatining pasayishi neft narxlarining o‘zgarishi bilan ham bog‘liqligini ta’kidlagan. Ekspertlar fikricha, yaqinda rublning sezilarli darajada pasayishiga asosiy sabab Rossiya banklariga qo‘yilgan sanksiyalar, jumladan, AQSHning “Gazprombank” boshchiligidagi bir qator banklarni SDN-ro‘yxatga kiritish to‘g‘risidagi qarori va o‘tgan yozda neft narxlarining pastligi tufayli valyuta tushumlarining qisqarishi bo‘lgan.
Izoh (0)