Eron Isroilga qarshi “qaqshatqich va keng qamrovli” hujumni rejalashtirmoqda. Bunga naqafat raketa va dronlar, balki muntazam armiya askarlari ham jalb etiladi. Bu haqda Eron va arab davlatlaridagi manbalariga tayanib, The Wall Street Journal xabar berdi.
Eronlik manbaga ko‘ra, Isroilga yangi hujum AQSHda 5-noyabrdagi prezidentlik saylovlaridan so‘ng, ammo 2025-yil yanvarida yangi prezident lavozimiga kirishishidan oldin sodir bo‘ladi. Amaldor Isroilga zarba Iroq hududidan berilishini inkor etmadi. Yahudiy davlati harbiy obyektlariga “avvalgidan ko‘ra ancha agressiv” zarba berilishi kutilmoqda.
The Wall Street Journal manbalari ta’kidlashicha, hujumda nafaqat Islom inqilob qo‘riqchilari korpusi, balki muntazam armiya askarlari ham qatnashishi mumkin. Bu qo‘riqchilar korpusini qo‘llab-quvvatlash bo‘lib, to‘liq armiya safarbarligini nazarda tutmaydi.
“Bizning harbiylarimiz odamlarni yo‘qotdi, shuning uchun ular javob qaytarishlari kerak”, deya izoh berdi Eron manbasi.
Isroilning Eronga hujumi
26-oktyabr kechasi yahudiy davlati armiyasi Erondagi harbiy obyektlarga havo hujumi uyushtirdi. Raketa ishlab chiqarish zavodlari va havo hujumidan mudofaa tizimlari nishonga olindi. Eron tomoni hujum qaytarilgani, biroq “cheklangan zarar” yetkazilganini bildirdi. To‘rt nafar harbiy xizmatchi halok bo‘ldi. Hujum munosabati bilan Eron Birlashgan Millatlar Tashkiloti Xavfsizlik kengashining favqulodda yig‘ilishini o‘tkazishga chaqirdi.
AQSH mudofaa vaziri Lloyd Ostin Eron “xato” qilmasligiga va vaziyatni yanada keskinlashtirmasligiga umid bildirdi hamda Isroil zarbalari o‘zaro hujumlarga chek qo‘yganini ta’kidladi.
Izoh (0)