Eron prezidenti Mas’ud Pezeshkiyon mamlakatiga qarshi har qanday hujumga javob berilishini ma’lum qildi. Biroq Isroil mintaqadagi tajovuzni to‘xtatib, sulh tuzishga rozi bo‘lsa, bu javobning xususiyati va darajasi o‘zgarishini aytdi. Bu haqda Anadolu xabar berdi.
Vazirlar mahkamasining yig‘ilishida so‘zga chiqqan Pezeshkiyon Isroilning kuchayib borayotgan tajovuzkorligiga to‘xtaldi. U AQSH va Yevropa yetakchilarining bergan va’dasini esga oldi. Ular Eron HAMAS siyosiy byurosi rahbari Ismoil Haniyaning suiqasdi uchun Isroilga javob qaytarmasa, G‘azoda otashkesimga erishishga va’da bergan.
31-iyul kuni Eronning yangi prezidenti inauguratsiyasida ishtirok etish uchun Tehronga kelgan Ismoil Haniya Tehrondagi qarorgohiga hujumda halok bo‘lgandi.
Aynan sionistik rejim hukumatimiz faoliyatining birinchi kunidayoq Haniyaga suiqasd qilib, urush qo‘zg‘atishga urindi. Ba’zi mamlakatlarning tavsiyasiga ko‘ra, biz tinchlik o‘rnatish va begunoh ayollar hamda bolalarning o‘ldirilishini to‘xtatish umidida vazminlik ko‘rsatgan bo‘lsak-da, Isroil aksincha o‘z jinoyatlarini yanada kuchaytirdi.
Agar Isroil o‘z xatti-harakatlarini qayta ko‘rib chiqsa, o‘t ochishni to‘xtatishga rozi bo‘lsa va mintaqadagi ezilgan hamda begunoh odamlarni ommaviy qirg”inini to‘xtatsa, bu bizning qasos olishimiz kuchi va turiga ta’sir ko‘rsatishi mumkin, dedi Eron prezidenti.
Ayrim manbalarga ko‘ra, Eron Iroq hududi orqali Isroilga zarba berishni rejalashtirmoqda. Yahudiy davlati mazkur versiyaga tayyorgarlik ko‘rish maqsadida Iroqdagi “qonuniy nishonlar”ni aniqlagan.
Isroilning Eronga hujumi
26-oktyabr kechasi yahudiy davlati armiyasi Erondagi harbiy obyektlarga havo hujumi uyushtirdi. Raketa ishlab chiqarish zavodlari va havo hujumidan mudofaa tizimlari nishonga olindi. Eron tomoni hujum qaytarilgani, biroq “cheklangan zarar” yetkazilganini bildirdi. To‘rt nafar harbiy xizmatchi halok bo‘ldi. Hujum munosabati bilan Eron Birlashgan Millatlar Tashkiloti Xavfsizlik kengashining favqulodda yig‘ilishini o‘tkazishga chaqirdi.
AQSH mudofaa vaziri Lloyd Ostin Eron “xato” qilmasligiga va vaziyatni yanada keskinlashtirmasligiga umid bildirdi hamda Isroil zarbalari o‘zaro hujumlarga chek qo‘yganini ta’kidladi.
Izoh (0)